Marako 6

Kikwero Yecu i Najaret

(Mat 13:53-58; Luk 4:16-30)

1Yecu oa woko ki kunu, odok i lobo tugi, lupwonyene gulube. 2Ocako pwonyogi i kacoke i ceng Cabit. Jo mapol ma guwinye, guuru, kun giwaco ni, “Laco man onongo ryeko man ducu ki kwene? Kit ryeko ango ma kimiye ni? Dok kit tic ango matek madito marom man ma en tiyogi ni? 3Man pe lapac, wod pa Maliam, omin Yakobo, ki Yoce, ki Juda ki Cimon? Dok nyimegine pe gitye botwa kany?” Ci cwinygi ocako a woko ikome. 41 Yecu owaco ni, “Lanebi kiketo deyo ikome, ento pe kiketo deyo ikome ki i lobo tugi ki ikin jo tugi, ki i ode.” 5Pe otiyo tic matego kunu, ento oketo cinge ikom lutwo mogo keken, ci gucang. 6Yecu ouru pien pe gitye ki niye. En obedo kawire ikin gangi kun pwonyo dano.

Yecu ooro lupwonye apar wiye aryo

(Mat 10:5-15; Luk 9:1-6)

7Yecu olwongo bote lupwonyene apar wiye aryo, ci oorogi ki aryo aryo, omiyogi twero ikom cen. 82 Ocikogi matek ni pe guwot ki gin mo, kono odo keken, labongo cam mo, kadi opiru, kadi lim mo i del pyergi; 9ento guwot kun giruku war tyen gi, pe guwot ma gubamo kanyi aryo ikomgi. 10Ocikogi ni, “Ka wudonyo i ot mo, wubed kenyo nio ka wubia ki i kabedo meno. 113 Kabedo ducu ma pe bijolowu, onyo biwinyowu, kace wubia woko ki kunu, ci wuteng apwa woko ki i tyenwu wek obed caden botgi.” 12Kitmeno gucako cito, gutito lok ni myero dano onguti. 134 Guryemo lwak cen mapol, dok guwiro lutwo mapol ki moo kun gicangogi.

To pa Jon Labatija

(Mat 14:1-12; Luk 9:7-9)

145

Rwot Kerode owinyo pire, pien onongo nying Yecu dong oywek tutwal. Jo mogo guwaco ni, “Jon Labatija aye ocer woko ki ikin jo ma oto; en aye ma omiyo lakit teko macalo meno tye katic ikome.” 15Ento jo mukene guwaco ni, “En Eliya,” jo mukene ni, “En lanebi, cal ki ngat mo ikin lunebi macon.”

16Ka Kerode owinyo pire ci owaco ni, “Jon mayam atongo wiye en aye ocer woko.” 176 Pien Kerode yam ooro dano, gumako Jon, gutweyo ibuc, pi Kerodia ciomine, dako pa Pilipo, mayam okwanyo me bedo dakone. 18Pien Jon onongo owaco bot Kerode ni, “Cik pe oye ni ibed ki ciomeru.” 19Kerodia obedo ki kec cwiny ikome, omito neke woko, ento pe otwero, 20pien Kerode onongo lworo Jon, dok onongo ngeyo ni en dano ma kite atir, dok maleng, ci obedo ka gwoke maber. Ka owinyo lok ma en otito, loke otwoyo doge woko, ento pire obedo mit bote kawinyo loke. 21Ento kare maber oromo inino ma Kerode oyubu iye karama me nipo pi nywale, ci olwongo iye ludito pa miri, ludito wilweny ki ludongo me Galilaya. 22Nya pa Kerodia odonyo i ot omyelo, ci oyomo cwiny rwot Kerode ki welone. Rwot owaco bot latin anyaka ni, “Lega gin ducu ma i mito, abimiyi.” 23Okwongo akwonga kun waco ni, “Gin ducu ma ibilega abimiyi, kadi bed nucu kera.” 24Latin anyaka okato woko, openyo mine ni, “Abilego gin ango?” Odok iye ni, “Leg wi Jon Labatija.” 25Oyotoyot odwogo i ot bot Rwot ki mit kom, olege ni, “Amito imiya wi Jon Labatija i wee kombedi.” 26Rwot Kerode okumu matek, ento pi kwonge ki pi welone omiyo pe omito twono en. 27Oyotoyot rwot ooro acikari ma gwoko en, ocike ni okel wi Jon. Acikari ocito ongolo ngut Jon ki i ot buc, 28okelo wiye i wee, omiyo bot latin anyaka; nyako omiyo bot mine. 29Ka lupwonye pa Jon guwinyo pire, gucito gutingo kome, guyiko i lyel.

Yecu omiyo cam ki jo alip abic

(Mat 14:13-21; Luk 9:10-17; Jon 6:1-14)

30Lupwonye gudwogo bot Yecu gutite lok ducu ma gutiyo ki ma gupwonyo. 31En owaco botgi ni, “Wubin kakenwu kama dano pe iye, wek wuywe manok.” Pien jo mapol onongo gubedo kabino, ki gidok cen, kun gigwenye agwenya, omiyo pe gubedo ki kare mo me cam. 32Gucito ken gi ki yeya i kabedo ma dano pe iye. 33Jo mapol gunenogi ka gicito, ma gungeyogi, ci guringo kunu ki tyen gi kun gia ki i taun ducu. Gin aye gukwongo oo kunu wiati. 347 Ka Yecu okato iwi tera, oneno lwak madwong; kica ocako make ikomgi, pien gitye macalo romi ma gipeke ki lakwat; ci opwonyogi ki lok mapol. 35Ka oo otyeno, ci lupwonyene gubino bote guwaco ni, “Kabedo man tye i dye tim, cawa bene dong okato. 36Cwal lwak gucit ikin paco ki i gangi ma cokcok, guwil ginacama pirgi ken gi.” 37Ento en odok iye ni, “Wun aye wumigi ginacama.” Gin gugamo ni, “Wacit wawil mugati me denari miya aryo, wamii botgi wek gucam?” 38Ento en openyogi ni, “Wutye ki mugati adi? Kong wucit wunen.” Ka gungeyo guwaco ni, “Abic, ki rec aryo.” 39Yecu ociko jo ducu ni gubed piny i dul ki dul, ikom lum alita. 40Kitmeno lwak gubedo piny i dul ki dul, miya miya, ki pyere abic pyere abic. 41Okwanyo mugati abic ki rec aryo, oneno malo i polo olego gum, obaro i mugati, omiyo ki lupwonyene wek guket inyim lwak; dok opoko rec aryo ikin gi ducu. 42Gin ducu gucamo, guyeng. 43Ci gucoko ngide mugati ma odong, ki rec bene, opongo aduku apar wiye aryo. 44Jo ma gucamo mugati giromo co alip abic.

Yecu owoto iwi nam ki tyene

(Mat 14:22-33; Jon 6:15-21)

45Oyotoyot Yecu ociko lupwonyene ni gudony i yeya, gukwong nyime me cito loka nam, wa i Betecaida, pien onongo en pud ciko lwak. 46Ka dong ocikogi, ci ocito iwi got ka lega. 47Ka piny oyutu, yeya onongo dong tye wa i dye nam, en kene aye onongo tye iwi tura. 48En onenogi kun gicane ki cero yeya, pien onongo yamo kodo bino ki inyimgi. I kine me koko gweno, en ocako bino botgi kun woto iwi nam ki tyene. Yecu otime macalo mito katogi akata, 49ento ma gunene kun woto iwi nam ki tyene, gutamo ni gwok onyo gemo mo, ci gudange matek; 50pien gin ducu gunene, cwinygi opoto matek. Ento oyotoyot oloko kwedgi kun waco ni, “Wudii cwinywu. An enu; gwok wulwor.” 51Odonyo botgi i yeya, ci yamo oling mot. Gin guuru matek tutwal ki i cwinygi, 52pien nakanen pe guniang lok ma ikom mugati, ento cwinygi pud obedo nwang.

Yecu ocango two i Genecaret

(Mat 14:34-36)

53Ka dong gukato loka nam, ci gukato wi tura i lobo Genecaret, gutweyo yeya kunu. 54Ka gutyeko a woko ki i yeya, ci lwak gungeyo Yecu oyotoyot. 55Gucako ringo gurumu kabedo ducu matye kunu, kun gikelo bote lutwo ma gutingogi ki kitara, giterogi i kabedo ducu ma guwinyo ni en tye iye. 56I kabedo ducu mayam en obino iye, ikin paco, taun madito, ki ikin caro, gipyelo lutwo wa i cuk, kun gibako dog gi bote ni oye wek gugud kadi dog ginarukane keken; ci lutwo ducu ma gugudo ginarukane gucang.