Marako 7

Kit pwony pa kwari

(Mat 15:1-9)

1Luparicayo ki Lupwonycik mogo ma gua ki i Jerucalem gucoke bot Yecu. 2Guneno jo mogo ma ikin lupwonyene ma pe gilubu pwony me tekwaro, ento gicamo ma pe gulogo cinggi. 3Pien Luparicayo ki Lujudaya ducu ka pe gulogo cinggi kakare pe gicamo, pien gumako pwony me tekwaro1 4Ka gudwogo ki i cuk pe gicamo, nio ka gulwoke. Dok gitye ki lwak kit pwony mapol ma gin lubu, macalo kit me lwoko kikopo, agulu ki jami mola ducu. 5Luparicayo ki Lupwonycik gupenyo Yecu ni, “Pingo lupwonyeni pe gilubu pwony pa kwariwa? Pingo gicamo ki cinggi ma pe gulogo ma lubu tekwaro” 62 Yecu odok iye botgi ni: “Wun lugoba, Icaya con oloko ikomwu kakare, macalo en ocoyo ni Lubanga owaco ni:

‘Rok man kara giwora ki del doggi

nono, ento cwinygi pe ikoma wa ki acel;

7giwora nono,

pwony ma gipwonyo obedo pwony ma mako kit pa dano.’

8Wuweko cik pa Lubanga, kun wuketo cwinywu kalubu kit pa dano.”

9Yecu dok owaco botgi ni, “Wutimo ber pi kwero Cik pa Lubanga, wek wulub giwu kit tekwarowu! 103 Moses yam owaco ni, ‘Wor woru ki meni’; dok ni, ‘Ka ngat ma oceno wone nyo mine, kibineke woko’; 11ento wun wuwaco ni, ‘Ka dano mo owaco ki wone nyo mine ni, Gin ma kono akonyi kwede en lim me Korban’ (teloke ni, gin ma gimiyo ki Lubanga), 12en pe dok omii lim mo me konyo wone nyo mine, 13kun wumiyo lok pa Lubanga doko goro, pien wupwonyo dano ni gulub kit tekwarowu. Dok wutiyo bene gin mapol macalo meno.”

Gin ma balo dano

(Mat 15:10-20)

14Yecu dok olwongo lwak bote, ci owaco botgi ni, “Wun ducu wuwiny loka, ci wuniang. 15Pe tye gin mo ma donyo i dano ma a ki woko matwero balo en, ento gin ma a ki i dano en aye balo dano. 16Ma tye ki it me winyone, owiny.”

17Ka oweko lwak woko, ci odonyo i ot, lupwonyene gucako penye pi carolok meno ma obolo ni. 18En ogamo ni, “Kara wun bene peya wuniang tere bo? Pe wungeyo ni, gin ducu ma donyo i dano ma a ki woko pe twero balo en? 19Pien pe odonyo wa i cwinye, ento wok kato i cin iye, ci kato woko.” (Ka otyeko wacone ki meno, nyutu ni olonyo kwa cam ducu.) 20Yecu dok owaco ni, “Gin ma a ki i dano aye balo dano. 21Pien gin ma a ki i cwiny dano, en aye bedo ki tam maracu, cot, kwalo kwo, nek, abor, 22paro lim, bal maracu, bwolo dano, kwele, nyeko, yet, wake me mingo. 23Tim magi maracu ni ducu gia ki i cwiny dano, gin aye gibalo dano.”

Niye pa dako me Curo-poiniki

(Mat 15:21-28)

24Yecu ocako a ki kunu, ocito wa i lobo matye cok ki Turo ki Cidon. Ci odonyo i ot mo kunu; onongo en pe mito ni ngat mo onge ni etye kunu, ento en pe twero kane. 25Cutcut dako mo ma nyare tye ki cen owinyo pire, ci obino oryebe katyene. 26Dako meno onongo Lagrik, ma roke Curo-poiniki. Ocako lego Yecu ni oryem cen woko ki ikom nyare. 27Yecu owaco ni, “Kong iwek lutino gukwong yeng, pe ber kikwany cam pa lutino, kibol ki gwogi.” 28Dako meno odok iye ni, “Rwoda, meno iwaco kakare; kadi bed kumeno ci lutino gwogi ma gitye ite meja gin bene gicamo ngide cam pa lutino do!”

29Yecu owaco ni, “Pi lok ma iloko ni, ber dong idok paco, cen dong otyeko a woko ki ikom nyari.” 30En odok paco, ci onongo latin tye obutu iwi kitanda, ma cen dong otyeko oa woko ki ikome.

Yecu ocango dano ma ite oding ma telebe oto

31Yecu oa ki i lobo ma cokcok ki Turo, ci owok ki i Cidon, ka okato ocito wa i nam Galilaya, ka otuc kwede wa i dye lobo Dekapoli. 32Ci gikelo bote dano ma ite oding ma te lebe oto. Gin gucako bako doggi bote ni oket cinge ikome. 33Yecu ocako mako en ki ikin lwak otere cen i mung. Ocako keto cinge i it dano meno, ka ongulu laa ci ogudu lebe. 34Yecu oneno malo i polo, ocur, kun waco ni, “Eppata,” ma teloke ni, “Yabe.” 35Ite oyabe woko ki telebe bene ogonye, ocako lok atir. 36Yecu ocikogi ni pe gutit ki ngat mo; ento kadi bed ocikogi kumeno, gin bene gumede ameda ki tito pire. 37Gin gubedo kaurune makato ducu, ma kun giwaco ni, “En otimo gin ducu maber; pien omiyo jo ma itgi oding owinyo lok, ki jo ma telebgi oto giloko.”