Marako 8

Yecu omiyo cam ki jo alip angwen

(Mat 15:32-39)

1Ikare meno, ka lwak dok gucoke mapol, kun pe gitye ki gin acama, ci Yecu olwongo lupwonyene bote, ocako waco botgi ni, 2“Kica maka ikom lwak man, pien gutyeko bedo kweda kany pi nino adek ma kun pe gitye ki gin acama mo. 3Ka acwalogi ni gudok wa tugi ki kec, ci kec bibwoyogi woko i yoo, pien jo mukene ikin gi gua ki kamabor.” 4Lupwonyene gudok iye ni: “Dano mo, twero miyo mugati maromo jo man i tim kany ningning?” 5Yecu openyogi ni, “Wutye ki mugati adi?” Gugamo ni, “Abiro.” 6Ociko lwak ni gubed piny i ngom. Omako mugati abiro ni, opwoyo, ka obaro igi, ocako miyo bot lupwonyene wek guket inyimgi, ci guketo inyim lwak. 7Onongo gitye ki rec matino manok bene. Yecu ka dong olego iye gum, ociko ni magi bene myero giket inyimgi. 8Lwak gucamo nio ka guyeng. Gucako coko ngide cam ma oloyogi ni, oromo adita abiro mupong. 9Jo ma onongo gitye kunu welgi onongo romo jo alip angwen. 10Ka ociko lwak, ci odonyo i yeya cutcut kacel ki lupwonyene, ocito wa i lobo Dalmanuta.

Luparicayo gulego pi lanyut

(Mat 16:1-4)

111

Luparicayo gubino bot Yecu ci gucako pyem kwede, kun gimito lanyut ma a ki bot Lubanga, me teme. 122 Yecu ocur ki i cwinye matek kun waco ni, “Pingo dano me kare man gimito lanyut? Adada, awaco botwu ni, pe gibimiyo lanyut mo bot dano me kare man.” 13Yecu oa woko ki botgi, ci odonyo i yeya, ongolo nam okato wa loka ca.

Tobi pa Luparicayo ki tobi pa Kerode

(Mat 16:5-12)

14Lupwonyene wigi onongo owil woko ka tero mugati, onongo gitye ki mugati acel keken i yeya. 153 Yecu ocikogi matek tutwal kun waco ni, “Wugwoke ikom tobi pa Luparicayo ki tobi pa Kerode.” 16Lupwonye gubedo ka laro lok keken gi kun giwaco ni, “Pe watye ki mugati.” 17Ka Yecu ongeyo ci openyogi ni, “Pingo wubedo ka laro lok ni pe wutye ki mugati? Peya wuniang ce? Pe wumako maber? Cwinywu pud nwang? 184 Wutye ki wangwu, ci pe wuneno kwede? Wutye ki itwu, pe wuwinyo kwede? Wun pe wupo ce? 19Ka yam abaro i mugati abic pi jo alip abic ni, ci wucoko ngide aduku adi?” Gugamo ni, “Apar wiye aryo.” 20“Ka yam abaro i mugati abiro pi jo alip angwen ni, onongo wucoko ngide opongo adita adi?” Dok gugamo ni, “Abiro.” 21En openyogi ni, “Peya wuniang aye?”

Yecu ocango latowang i Betecaida

22Gin gucako bino i Betecaida, ci jo mogo gukelo bote laco ma wange oto woko, gubako doggi ni obong kome. 23Yecu ocako mako cing laco ma wange otoni, ci otere woko wa inge gang. Ongulu laa i wange, ka dok oketo cinge ikome, ci openye ni, “Ineno gin mo dong?” 24Laco meno otingo wange malo, ocako waco ni, “Aneno kom dano; ento pud ginen macalo yadi ma woto.” 25Yecu dok onwoyo keto cinge iwang lawange oto. Ci wange odok kakare maneno piny maber. 26Yecu ocwalo en wa i paco tugi, kun cike ni, “Pe idony ikin gang ma kunu.”

Petero otucu lok ikom Yecu

(Mat 16:13-20; Luk 9:18-21)

27Yecu ki lupwonyene gucito ikin gangi me Cecaria Pilipi. Ikare ma gitye i yoo, en openyo lupwonyene ni, “Dano mono giwaco ni an anga kaa?” 285 Guwaco ni, “Jon Labatija; jo mogo giwaco ni, ‘Eliya’, ki jo mukene ni in ngat acel ikin lunebi.” 296 Dok openyogi ni, “Ento wun kono wulwonga mono ni an anga?” Petero ogamo ni, “In i Kricito ma Lubanga oyero.” 30Ci Yecu ocikogi matek ni pe gutit pire ki dano mo.

Yecu otito pi tone

(Mat 16:21-28; Luk 9:22-27)

31Yecu ocako pwonyo lupwonyene ni: “Wod pa dano myero olim can madwong, dok ludongo ki ajwaki madito pa Lubanga ki Lupwonycik myero gukwere woko. Gin bineke, ento en bicer woko inge nino adek.” 32Yecu oloko lok meno atyer kamaleng. Ci Petero otero en cen, ocako juke matek. 33Yecu oloke bot lupwonyene ci ojuku Petero ki tek, kun waco ni, “A woko ki inyima, in Catan! Pien tami pe lubu pa Lubanga, ento pa dano.” 347

Yecu olwongo lwak bote kacel ki lupwonyene, ci otito botgi ni, “Kace dano mo mito lubu kora, myero okwong kwere kekene, ka ocak tingo yatariyane, olub ki kora. 358 Pien dano ma mito laro kwone birwenyone arwenya, ento ka dano mo orwenyo kwone pira ki pi lok me Kwena Maber, en aye bilaro kwone. 36Konyo dano ma olimo lobo ducu ki gin ango mono, kace kwone gikwanyo woko? 37Dano dok bimiyo kit gin ango ma ka kwone? 38Kace dano mo lewic omake ikoma ki iloka ikare man me bal ki weko Lubanga, Wod pa dano bene lewic bimake ikome ikare ma en bidwogo ki deyo pa Wone kacel ki lumalaika maleng.”