Marako 9

1Dok oloko botgi ni, “Adada awaco ki wun ni, tye jo mogo ma gucung ikinwu kany ma pe gibibilo to wa ki acel, nio wang ma guneno ka ker pa Lubanga bino ki tekone.”

Kom Yecu oloke mapat

(Mat 17:1-13; Luk 9:28-36)

21

Ka nino okato abicel, ci Yecu otero Petero ki Yakobo ki Jon, ocako yito kwedgi iwi got mabor i mung gin ken gi. Kome ocako loke inyimgi, 3ginarukane odoko tar ma wil, matar dok tutwal; pe tye lalwok bongo mo iwi lobo matwero lwoko lony matar marom meno. 4Ci Eliya ki Moses gucako nen botgi, gubedo kalok ki Yecu. 5Petero ocako penyo Yecu ni, “Lapwony, bedo kany ber mada; wek dong wayub bolo adek, acel meri, acel pa Moses, ki acel pa Eliya.” 6Onongo Petero pe dong ngeyo kit gin ma myero eloki, pien onongo lworo omakogi mada. 72 Pol ocako bino ci tipune oumu komgi woko lipuk, ci dwon owinye ki i pol, ma waco ni, “Man aye Woda ma amaro; wuwinye.” 8Lupwonye gucako ngiyo piny oyotoyot, ci wanggi pe omedo ki neno dano mo, guneno kom Yecu matye kwedgi ni keken.

9Ikare madong gitye ka lor piny ki iwi got, Yecu ocikogi ni pe gutit loke bot dano mo ikom gin ma guneno, nio wang ma Wod pa dano ocer ki ikin jo ma oto. 10Lupwonye gumako lok meno, gubedo ka penye keken gi ni, “Cer ki ikin jo ma oto kono teloke ango?” 113 Gucako penyo Yecu ni, “Pingo Lupwonycik gin waco ni, Eliya aye kong kwongo bino?”

12Yecu otito botgi ni, “Adada Eliya aye myero okwong bino, ka wek ocak dwoko jami ducu obed kakare. Ento lok man dok kicoyo ikom Wod pa dano pingo kaa, ni, myero en kong olim can madwong, ka dok ni, kibicaye matek? 13Ento dong atito botwu atir ni Eliya dong otyeko bino wa con, ci gutyeko timo gin ma gimito ikome, macalo yam kicoyo ikome.”

Yecu ocango awobi matye ki cen

(Mat 17:14-21; Luk 9:37-43a)

14Ka gubino piny bot lupwonye mukene, ci guneno lwak mapol gurumugi dyere, kun Lupwonycik gitye ka pyem kwedgi. 15Ka lwak guneno Yecu, guuru en mada, gutware oyotoyot guringo ka mote. 16Yecu openyogi ni, “Wubedo ka pyem kwedgi pi lok ango?”

17Ci dano mo acel ki ikin lwak ogamo doge ni “Lapwony, wayi onongo akelo woda boti. En tye ki cen ma pe loko, 18ka tek cen omako i kabedo mo, ci tugi retone woko piny likung, ci bwoyo yenyo idoge, cako kayo lake bene matek, kun poyo kome lirikrik. Apenyo lupwonyeni ni guryem woko, ci ryemone oloyogi.” 19Yecu ocako gamo ni, “Wun yalwak ma niye wu lam, abibedo kwedwu nio wa awene? Dok abidiyo cwinya ikomwu nio wa awene ba? Wukel en bota kany.” 20Gukele bot Yecu. Ka cen oneno Yecu, ci oyengo kom awobi meno, orete woko piny; ocako ngene i ngom ma kun bwoyo yenyo idoge. 21Yecu openyo wone ni, “Two man obedo ka time kit man pi lwak kare marom mene?” Wone ogamo ni, “Nia wa ka tinone. 22Otemo neke woko tyen mapol; ikare mukene rete i mac kadi wa i pii gu. Kace itwero timo iye gin mo, ci tim ber, ikonywa do.”

23Yecu ogamo doge ni, “Kace atwero? Gin ducu twere ki bot dano maye.” 24Won latin ogamo doge oyotoyot kun dange matek ni, “Aye; kony niyena ma lam mo ni.”

25Ka Yecu oneno lwak giringo gibino bote, ci ogere iwi cen kun waco ni, “In cen ma pe ilokoni, ma iti odingi, aciki ni, a woko ki ikom awobi man, pe dok idwog ikome matwal.”

26En oredo matek, ci ocako jake ajaka ki tek, ka oa woko ikome. Awobini kong obedo macalo dano ma oto, omiyo jo mapol guwaconi, “En dong oto woko ada.” 27Ento Yecu omako cinge, oile kwede malo, ci en ocung.

28Ma Yecu odonyo i ot, kama gubedo iye ken gi, ci lupwonyene gupenye ni, “Gin ango ma ogengowa ryemone?” 29En owaco botgi ni, “Kit cen macalo man pe ryeme pi gin mo, ento ki lega keken.”

Yecu dok otito pi tone

(Mat 17:22-23; Luk 9:43b-45)

30Gua woko ki kunu, gungolo ki i Galilaya. Yecu onongo pe omito ni dano mo onge pire, 31pien onongo en tye ka pwonyo lupwonyene kun waco ki gin ni, “Wod pa dano kibimiye i cing dano; kibineke woko, ci en bicer woko inge nino adek.” 32Ento gin pe guniang telok meno, dok gulworo penye.

Anga ma ladit ikin gi?

(Mat 18:1-5; Luk 9:46-48)

33Gubino i Kapernaum. Ka gitye i ot, Yecu ocako penyogi ni, “Wubedo ka laro lok ango i wangayo kekenwuni?” 344 Gin guling alinga, pien gubedo ka laro lok keken gi i wangayo ni, “Anga mono ma rwome dit ikin gi?” 355 Yecu ka obedo piny ci olwongo jone apar wiye aryo, ocako waco ki gin ni, “Ka dano mo mito bedo mukwongo, myero en aye odong cen inge luwote ducu, en aye obed latic ma megi ducu.” 36Okwanyo latin mo, ci omiyo ocung ikin gi, ka otingo i kore ci okwako, ocako waco botgi ni, 376 “Dano mo ma ojolo latin acel macalo man pi nyinga, meno rom aroma ma ojolo an; ka dok dano ma ojolo an, meno rom aroma ma ojolo ngat ma oorani.”

Ngat ma pe lakworwa nongo en lawotwa

(Luk 9:49-50)

38Jon owaco bot Yecu ni, “Lapwony, waneno ngat moni ka tye ka ryemo cen ki nyingi, ma en pe nywako wot kwedwa, ci wajuke woko.” 39Ento Yecu ogamo ni, “Pe wujuke; pien pe tye dano mo ma tiyo tic matek ki nyinga, matwero waco lok mo marac ikoma oyot. 407 Pien ngat ma pe lakworwa, en aye lawotwa. 418 Adada awaco ki wun ni, dano mo ma bimiyowu pii me amata i kikopo, pien wun jo pa Kricito, limo mote pe biloyo en kadi matidi mo.”

Lok ma omiyo dano poto ibal

(Mat 18:6-9; Luk 17:1-2)

42“Ka dano mo omiyo ngat mo acel ma ikin jo magi matino ma guye an ni opoto ibal, ci bedo ber makato ducu ka kitweyo kidi rego madit i ngute ci kibole kwede wa i nam. 439 Kace cingi aye omiyo i poto ibal, ci tong ingun woko, twara ma idonyo i kwo ma cingi lakucel peke, ber makato ma giboli i Geena ma itye ki cingi aryo ducu, kun idonyo kwedgi i mac ma pe to. [44Kama kwidi ma camogi pe to, ki mace bene pe to.] 45Kace tyeni aye omiyo i poto ibal, ci tong woko, twara ma idonyo i kwo ma tyeni lakucel peke, ber makato ma kono kiboli ki tyeni aryo i Geena. [ 46Kama kwidi ma camogi pe to, ki mace bene pe to.] 4710 Kace wangi aye omiyo i poto ibal, ci kol woko; twara ma idonyo i ker pa Lubanga ki wangi acel, kato ma kono kiboli ki wangi aryo ducu i Geena, 4811 kama kwidi ma camogi pe to, ki mace bene pe to.

49Dano acel acel kibilonyo ki kado me mac kit macalo kado lonyo gitum. 5012 Kado atwona ber, ento kado atwona ka odoko bot, ci dok kibiyubu ningning wek odok mamit? Wubed ki kado i iwu, dok wubed ki kuc kekenwu.”