Marako 10

Lok ma Yecu opwonyo ikom keto nyom

(Mat 19:1-12; Luk 16:18)

1Yecu oa woko ki kunu, ci obino wa i lobo Judaya ma loka Jordan, ci lwak dok gucoke bote; ocako pwonyogi doki, macalo kit pwonye tye kwede.

2Luparicayo mogo gubino bote, ci gucako omo cwinye kun gipenye ni, “Cik miyo twero ni laco oryem dakone woko?”

3Yecu ocako gamo doggi ma kun penyogi ni, “Moses yam ocikowu ningning?” 41

Gugamo ni, “Moses yam omiyo twero ki laco me coyo waraga me laryem dakone wek, nyomgi oket woko.”

5Yecu owaco botgi ni, “Moses omiyowu cik meno pi cwinywu ma nwang. 62 Ento nia i acaki lobo ‘Lubanga oketo laco ki dako.’ 73 ‘Pimeno laco weko wone ki mine, moko ikom dakone matwal. 8Ci gin aryoni dong gidoko kom acel.’ Gin pe dok gibedo kom aryo, dong gibedo kom acel keken. 9Gin ma Lubanga oribo kacel dano pe opok kin gi.”

10Ka onongo gitye i ot, ci lupwonyene gupenye ikom lok meno. 114 En owaco botgi ni, “Ka laco mo oryemo dakone, ce dok onyomo dako mukene, laco meno otimo abor, nongo obalo inyim dakone; 12ki dako bene kitmeno, kace oa woko ki bot cware dok ogero laco mukene, ci dako meno otimo abor.”

Yecu omiyo gum ikom lutino

(Mat 19:13-15; Luk 18:15-17)

13Ka lwak gukelo lutinogi bot Yecu ni wek en obong komgi, ci lupwonyene gujukugi. 14Ka Yecu oneno ci cwinye ocwer matek, ocako waco botgi ni, “Wuwek lutino gubin bota, pe wugeng gi; pien ker pa Lubanga tye pi jo macalo gin. 155 Adada awaciwu ni, dano ma pe oye jolo ker pa Lubanga macalo latin, pe bidonyo i kere kadi matidi mo.” 16Ocako tingogi i kore omiyogi gum, kun keto cinge ikomgi.

Awobi ma lalonyo

(Mat 19:16-30; Luk 18:18-30)

17Ka Yecu oa obino wa i yoo, ci dano mo ocako ringo i kor, ci orumu conge inyime kun penye ni, “Lapwony maber, atim ango wek alim kwo ma pe tum?” 18Yecu owaco bote ni, “Pingo ilwonga ni aber? Pe tye dano mo maber, kono Lubanga kene aye ber. 196In ingeyo cik, ni, ‘Pe ineki; Pe i tim abor; Pe ikwal gin mo; Pe ibed caden me goba; Pe ibum dano mo; Wor woru ki meni.’” 20En ocako gamo ni, “Lapwony, atyeko mako cik magi ducu nia wa i ka tinona.” 21Yecu ociko wange onene ci cwinye omare, owaco bote ni, “Gin mo acel aye pud orem boti. Kong icit icat jamini ducu ma itye kwede ci imii lime ki lucan, ci i bibedo ki lwak lonyo ma gikano piri i polo. Ka dong ibin icak lubu kora.” 22Awobi meno ka owinyo Yecu oloko bote kitmeno, ci wange obale woko, ocako dok cen ki cwercwiny, pien onongo en tye ki lwak lim madwong.

23Yecu olworo wange ci owaco bot lupwonyene ni, “Bibedo tek mada bot jo ma lulonyo me donyo i ker pa Lubanga!”

24Lupwonyene guuru lokenu matek. Yecu dok ocako wacogi ni, “Lutino, donyo i ker pa Lubanga tek marac! 25Kinaga twero donyo iwang libira7 oyot, makato lalonyo me donyo i ker pa Lubanga!” 26Ci omiyo lwak guuru matek, ci gupenyo ni, “Ka kitmeno, ci anga dok ma lare?” 27Yecu ocako nenogi, ci owaco ni, “Ki bot dano pe twere, ento ki bot Lubanga twere, pien gin ducu twere ki bot Lubanga.” 28Petero ocako wace ni, “Ce wan kono ma waweko jamiwa ducu, ci walubu in ni?” 29Yecu owaco ni, “Adada awaco ki wun ni, pe tye ngat mo ma oweko ode, nyo omege, nyo nyimege, nyo mine, nyo wone, nyo lutino, nyo potine, pira ki pi lok me Kwena Maber, 30ma en pe bilimo lwak jami makato meno tyen miya ikare man, gin aye odi, omego, lamego, mego, lutino, ki poti, kacel ki ayelayela pa dano; ka dok wa ikare me anyim en binongo kwo ma pe tum. 318 Lwak jo mapol ma gin gubedo jo mukwongo yo aye gibidong cen, ki jo ma gudong cen, gin aye dok bitelo yo.”

Yecu dok onwoyo tito pi tone tyen me adeke

(Mat 20:17-19; Luk 18:31-34)

32Ikare ma gitye i yoo ma cito Jerucalem, ma kun Yecu aye tye ka telogi yoo, guuru matek, dok lupwonyene gubedo ki lworo. En dok ocako tero lupwonyene apar wiye aryo, ci otito botgi gin ma bitime ikome, 33kun waco ni. “Nen ba, wan dong watye kaito malo i yoo me cito Jerucalem. Wod pa dano dong kibimiye i cing ajwaki madito pa Lubanga ki Lupwonycik, kibingolo to iwiye, ci kibimiye i cing Lurok; 34kibingale, gibingulu laa ikome dok kibipwode ki del, ci kibineke; ento en bicer woko inge nino adek.”

Lega pa Yakobo ki Jon

(Mat 20:20-28)

35Yakobo ki Jon gin lutino pa Jebedayo, gubino inyim Yecu, ci guwaco ni, “Lapwony, wamito in i tim ki wan gin ma wamito legi pireni.” 36En ocako penyogi ni, “Wun wumito ni atim ki wun kit gin ango?” 37Gugamo, ni, “Ye wek ngat acel obed kangeti tung lacuc ki acel bene obed kangeti tung lacam ikare me deyoni.” 38Yecu owaco botgi ni, “Wun pe wungeyo gin ma wulego. Wun wutwero mato ki kikopo ma abimato kwede ni; onyo wutwero limo batija kit ma kibatija ki an kwedeni?” 39Gugamo ni, “Watwero.” Yecu dok owaco botgi ni, “Kikopo ma an abimato kwede ni, wun bene wubimato kwede, ki kit batija ma kibibatija kwede an ni, wun bene kibibatijawu kwede; 40ento lok me bedo ikom bada ma lacuc nyo me lacam pe an aye apoko. Meno bibedo pa jo mayam dong kiyubu pirgi wa con.”

41Ka lupwonye mukene aparni guwinyo loke, ci cwinygi ocako cwer ikom Yakobo ki Jon. 429 Yecu ocako lwongogi bote, ci owaco botgi ni, “Wun wungeyo ni, jo ma kilwongogi ni gin lulo Lurok giloyo dano ki tek, dok luditogi bene gibedo ki twero ikomgi. 4310 Pe myero wun wubed kitmeno; ento ngat ma mito bedo ladit ikinwu en aye myero obed laticwu, 44ki ngat ma mito bedo mukwongo ikinwu, en aye myero obed opiiwu ducu. 45Kadi wa Wod pa dano bene pe obino ni ki tiine, ento en aye etii ki dano; en obino pi dyero kwone me bedo lakok dano mapol.”

Yecu ocango latowang ma nyinge Bartimayo

(Mat 20:29-34; Luk 18:35-43)

46Ka gubino i Jeriko, ci ikare ma en dong tye ka a woko ki i Jeriko, kacel ki lupwonyene ki lwak madwong, ci latowang ma nyinge Bartimayo, wod pa Timayo, ma en lakwac onongo obedo piny inget yoo. 47Ka owinyo ni meno aye Yecu me Najaret, ocako dange ni, “Yecu Lakwar Daudi, tima kica ba!” 48Lwak gujuke matek ni oling, ento en omede ameda ki dange ni, “Lakwar Daudi, tima kica ba!” 49Ka Yecu ocung, ci owaco ni, “Wulwonge obin.” Gucako lwongo lawange oto ni, “Dong idii cwinyi, a malo, en tye kalwongi.” 50En otugi bolo ginarukane woko, ci oa malo, obino bot Yecu.

51Yecu ocako penye ni, “Imito atimi gin ango?” Ci latowang ogamo ni, “Lapwony, amito wanga onen piny do.”

52Yecu ocako waco ni “Dong iciti, niye ni ocangi.” Ocako neno piny cut, ci olubu kor Yecu kun woto kwede i yoo.