Lulevi 22

Gityer omyero obed maleng

1Rwot dok owaco bot Moses ni, 2“Tit ki Aron ki awobene ni omyero gugwoke ikom gityer maleng pa jo Icrael ma gudyero bota, wek pe gupyed nyinga malengi. An a Rwot. 3Ikare pa likwayowu ducu, ka ngat mo ma ikin likwayowu onyiko cok ki gin maleng ma jo Icrael gudyero bot Rwoti ma kun kome kikeni, dano meno dong pe bitic i keno tyer. An a Rwot.

4Dano mo ikin likwayo pa Aron ma ladobo, nyo ma kome cwer tut, pe ocam gin maleng nio ka kome ocang. Ajwaka mo keken bidoko keni pi gudu kom dano ma oto, nyo ka kodine me cone omol ikome, 5nyo ka ogudu gin ma lakalaka matwero miyo en doko keni, nyo ka ogudu dano ma kenine twero kobo ikome, nyo kwayi gin mo matwero miyo en doko keni. 6Ajwaka mo keken ma ogudu gin macalo meno bibedo keni nio wa otyeno, dok pe bicamo gin maleng ka peya olwoko kome ki pii. 7Ka ceng dong opoto, ci bibedo ma olony, lacen en twero camo gin maleng, pien meno aye cam ma mere. 8En pe ocam geng lee ma oto kene, nyo lee ma nguu oneko, wek pe obale kwede odok keni. An a Rwot.

9Ajwaki ducu gumak gin ma aciko, wek bal pe odok iwigi, mamiyo gibito ka gipyede ikom gin ma aciko; An a Rwot ma alonyogi gubed maleng.

10Dano ata pe ocam gin maleng. Dano ma labedo bot ajwaka, nyo lapakaca, pe ocam gin mo maleng. 11Ento ka ajwaka owilo opii ki lim, ma odoko calo gipinye, en twero camo, ki opii ma kinywalogi i ode bene gitwero camo came. 12Ka nya pa ajwaka onyome ki laco ma pe a ki i kaka pa ajwaki, ci nyarenu aye pe dong bicamo gin maleng ma kityero. 13Ento ka nya pa ajwaka odoko dato, nyo cware oryeme, kun pe tye ki latin mo, ci odwogo iot pa wone macalo yam obedo iye ma pud tidi, ci en twero camo cam pa wone, ento dano ata pe ocam.

14Ka dano mo ocamo gin mo maleng ma pe ocamo akaka, en bimedo acel me abic ikom wele, ci culu wang gin meno maleng bot ajwaka. 15Ajwaki pe gupyed jami maleng pa jo Icrael ma gityero bot Rwot, 16wek bal ki alii pe odok iwigi pi camo jamigi maleng; pien An a Rwot ma alonyogi gubed maleng.”

17Rwot owaco bot Moses ni 18“Wac bot Aron ki awobene ki bot jo Icrael ducu ni, ka ngat mo ma i ot pa jo Icrael, nyo labedo mo ma i Icrael, miyo gityer mere, kadi obed me cobo kwong, nyo gityer ma iye opwoyo ma otyero bot Rwot me gitum awanga, 19Lubanga biye gamone ka wubikelo wod twon, nyo nyok romo, nyo nyok dyel ma kome pe kimwonyo. 201Ento pe wutyer gin mo ma kome kimwonyo, pien pe kibiye gamone pirwu. 21Ka dano mo okelo gityer me berbedo bot Rwot, pi cobo kwong nyo pi gityer ma iye opwoyo, ma okwanyo ki ikin dyangi, romi nyo dyegi, kibigamo ma komgi becone labongo mwonyo mo. 22Lee ma wange oto, nyo ma tyene otur, nyo ma ongol, nyo ma kome cwer tut, nyo ma angoli omako, nyo kit two macalo meno, pe wutyer bot Rwot, pe wumigi me bedo gityer ma kiwango ki mac bot Rwot iwi keno tyer. 23Wutwero kelo twon nyo nyok romo ma tyene olot mabor nyo ma cek adunu wek obed gityer ma iwu opwoyo, ento pe kibigamone pi cobo kwong. 24Pe wutyer bot Rwot lee mo ma mane obwac, nyo ma kinyoto woko, nyo ma kikayo, nyo ma kikwanyo woko, pe wutum lee ma kitmeno i lobowu. 25Dok pe wutyer lee mo macalo meno ma wugamo ki bot larok obed cam pa Lubangawu. Pe kibigamogi pirwu, pien komgi kimwonyo pi bal matye ikomgini.”

26Rwot owaco bot Moses ni, 27“Ka kinywalo wod twon, nyo romo, nyo dyel, kong obed bot mine pi nino abiro; nia inino me aborone kibiye gamone me bedo gityer ma kiwango ki mac bot Rwot. 28Ento pe wubitumu min dyang nyo min romo, nyo min dyel ki latine inino acel. 29Kace wutumu gityer me pwoc bot Rwot wutum ikit mamiyo kiye gamowu. 30Wubicamone inino meno kikome; pe wuwek mo odong nio wa odiko; An a Rwot.

31Kitmeno wugwok cika ducu, wucobgi; An a Rwot. 32Pe wupyed nyinga maleng, ento jo Icrael myero gunge ni an aleng; An a Rwot ma alonyowu wubed maleng, 33ma ceng akwanyowu woko ki i lobo Ejipt wek abed Lubangawu. An a Rwot.”