Lulevi 23

Nino madito pa jo Icrael ma kiciko

1Rwot owaco bot Moses ni, 2“Wac bot jo Icrael ni, magi aye nino madito ma Rwot ocikogi, ma wubitucu pirgi ni gubed gure maleng. 31Wubitiyo tic nino abicel, ento inino me abirone en ceng Cabit me yweyo mot. Pe wutii iye tic mo i kabedo ducu ma wubibedo iye; pien meno ceng Cabit pa Rwot, en aye gure maleng.

Karama me Kato ki nino madito me Mugati ma Tobi pe iye

(Wel 28:16-25)

4Magi aye nino madito mogo ma Rwot ociko pirgi me gure maleng ma wubikwero i karegi kit ma Rwot ociko. 52Idwe mukwongo inino dwe apar wiye angwen otyeno, en aye Karama me Kato pa Rwot. 63Ikom nino dwe apar wiye abic me dwe acelu en nino madit pa Rwot me Mugati ma Tobi Pe iye; wubicamo Mugati ma Tobi Pe iye pi nino abiro. 7Ikom nino mukwongone wubibedo iye ki gure maleng; pe wubitiyo iye tic mo. 8Ento wubityero gityer ma kiwango ki mac bot Rwot pi nino abiro; inino me abirone wubibedo ki gure maleng, pe wubitiyo iye tic mo.”

Karama me kac mukwongo

9Rwot dok owaco bot Moses ni, 10“Wac bot jo Icrael ni, ka dong wuo i lobo ma abimiyowu, ka wukayo iye kac, ci wubikelo wic larita cam me wi mwaka bot ajwaka. 11En bikwato wic larita cam inyim Rwot, wek oye gamowu; ajwaka bikwato inino ma lubu ceng Cabit. 12Inino ma wubikwato iye wic laritani, en aye wubityero iye latin nyok romo ma dite romo mwaka acel, ma kome pe kimwonyo, obed gitum awanga bot Rwot. 13Gityer me moko kwon ma wutyero kacel kwede bibedo moko kwon mapwote maromo awalkwon aryo, ma kirubu ki moo, ma kibityero kun kiwango ki mac bot Rwot obed gin ma ngwece kur ma yomo cwiny Rwot. Gityer amatane bibedo bwino maromo cupa aryo ki nucu. 14Pe wucam mugati, pe wumwod nyig bel ma kicelo nyo manumu, nio wa inino meno kikome, wang ma wukelo gityer pa Lubangawu; meno bibedo cik matwal wa ikare pa likwayowu ducu, ikabedo ducu ma wubibedo iye.

Kwero Karama me Kac

(Wel 28:26-31)

154

Ka dok wubikwano cabit abiro kulu kun wucako ki nino ma lubu cabit, en aye nino ma wutyero iye wic larita cam me gityer akwata. 16Wukwan nino pyere abic nio inino ma lubu cabit me abirone, ka dong wucak kelo gityer me moko ngano manyen bot Rwot. 17Wubikelo ki ikabedowu mugati aryo me awalkwon aryo ma kitedo ki moko maromo awalkwon aryo; kibitedogi ki moko mapwote ma nongo kirubu iye tobi, gubed wi mwaka ma kityero bot Rwot. 18Dok wubikelo lutino romi abiro me mwaka acel acel ma komgi pe kimwonyo ki mugati meno, kacel ki wod twon acel ki nyogi romi aryo. Gibibedo gitum awanga bot Rwot, kacel ki gityer me moko kwon ki gityer amata ma otikogi; gin gityer ma kiwango ki mac, gin ma ngwece kur ma yomo cwiny Rwot. 19Dok wubityero nyok dyel acel obed gitum me bal, ki lutino nyogi romi aryo me mwaka acel acel gubed gityer me berbedo. 20Ajwaka bikwatogi kacel ki mugati me wi mwaka gubed gityer akwata inyim Rwot, kacel ki lutino nyogi romi aryonu; gibibedo maleng bot Rwot, pi ajwaka. 21Inino meno kikome, wubibedo ki gure maleng ma wutito pire kamaleng; pe wutii iye tic mo. Meno bibedo cik matwal wa ikare pa likwayowu ducu, ikabedo ducu ma wubibedo iye. 225

Ka wukayo cam ma ocek i lobowu, pe wuka woko ducu nio wa inget potowu, pe dok wubed ka beko obote ma odong ikare me kac. Wubiwekogi pi konyo lucan ki lubedo. An a Rwot Lubangawu.”

Karama me acaki mwaka manyen

(Wel 29:1-6)

23Rwot owaco bot Moses ni, 24“Wac bot jo Icrael ni, i dwe me abiro, inino dwe acel, wubikwero iye nino me yweyo mot, nino me po ma kitucu pire ki koko gwara, nino me gure maleng. 25Pe wutii iye tic mo, dok wubityero iye gityer ma kiwango ki mac bot Rwot.”

Nino madit me kwanyo bal

(Wel 29:7-11)

266

Rwot dok owaco bot Moses ni, 27“Inino dwe apar me dwe man me abironi en aye bedo nino me kwanyo bal. Bibedo botwu nino me gure maleng; wubibedo i nirii kec inino meno, dok wubityero gityer ma kiwango ki mac bot Rwot. 28Pe wutii tic mo inino meno, pien en aye nino me kwanyo bal, pi timo gin lakwany bal ki ikomwu inyim Rwot Lubangawu. 29Ngat ma pe bibedo i nirii kec inino meno pe kibikwano ikin jo pa Lubanga. 30Ngat ma bitiyo tic mo inino meno abineko woko wek pe obed ikin lutugi. 31Pe wutii iye tic mo; meno bibedo cik matwal wa ikare pa likwayowu ducu, ikabedo ducu ma wubibedo iye. 32Meno aye bibedo botwu ceng Cabit me yweyo mot, ci wubibedo i nirii kec, inino dwe abongwen cake otyeno nio wa orwone otyeno en aye wubiywe mot.”

Karama me bolo

(Wel 29:12-40)

337

Rwot dok owaco bot Moses ni, 34“Wac bot jo Icrael ni, i mwaka ducu karama me kwero kare me bedo i bolo bicake inino dwe apar wiye abic me dwe me abiro, ci bityeko nino abiro. 35Ikom nino mukwongo wubibedo iye ki gure maleng; pe wutii iye tic mo. 36Wubityero gityer ma kiwango ki mac bot Rwot pi nino abiro. Inino me aborone wubibedo iye ki gure maleng, ma wubityero iye gityer ma kiwango ki mac bot Rwot; meno coke madit me woro Lubanga, pe wutii iye tic mo.

37Magi aye nino madito ma Rwot ociko, ma wubitito ki lwak ni gin aye kare me gure maleng, pi tyero bot Rwot gityer ma kiwango ki mac, gitum awanga, gityer me moko kwon, gitum mukene, ki gityer amata, kun acel acel bedo ki ninone ma otike. 38Wubimedo karama magi ikom ceng Cabit pa Rwot me kare ducu, ki ikom mot mewu, ikom gityer mewu ducu me cobo kwong, ki ikom gityerwu ducu ma iwu opwoyo ma wumiyo bot Rwot.

39Ikom nino dwe apar wiye abic me dwe me abiro, ka dong wucoko cam ma ocek i lobo, wubikwero nino madito pa Rwot pi nino abiro; nino mukwongo bibedo nino me yweyo mot, ki nino me aborone bene bibedo nino me yweyo mot. 40Inino mukwongo wubicoko iye nyig yat mabecone, ki jang otit, ki jang yat ma oluk, ki yat oget ma inget kulu; ci wubibedo ki yomcwiny inyim Rwot Lubangawu pi nino abiro. 41Wubikwero nino madito man pa Rwot pi nino abiro mwaka ki mwaka; meno bibedo cik matwal wa ikare pa likwayowu ducu; wubikwerone i dwe me abiro. 42Wubibedo i bolo pi nino abiro; lutino anywali ducu ma i Icrael bibedo i bolo, 43wek likwayowu gunge ni, yam amiyo jo Icrael gubedo i bolo ikare ma akwanyogi woko ki i lobo Ejipt. An a Rwot Lubangawu.”

44Kitmeno Moses otito bot jo Icrael pi nino madito ducu ma Rwot ociko pirgi.