Lulevi 21

Ajwaki myero gubed jo maleng

1Rwot owaco bot Moses ni, “Lok ki ajwaki ma gin awobe pa Aron, iwac botgi ni; ngati mo ikin gi pe obale odok keni pi gudu kom dano ma oto ma ikin lutugi, 2nikwanyo ka obedo mine, wone, wode, nyare, omine; 3nyo lamine ma bedo i ode ma peya kinyomo. 4Laco pe bibale me doko keni pi dano ma oto i dog ot ma en onyomo iye, meno kelo cac ikome. 51Ajwaki pe gulyel yer wigi, pe gulyel teng yer tikgi, pe gibigwero komgi pi kumu pi to. 6Gin bibedo jo maleng pi Lubangagi, pe guket cac inying Lubangagi, pien gin aye gityero gityer ma kiwango ki mac bot Rwot, en cam pa Lubangagi; pimeno myero gubed jo maleng. 7Ajwaka pe binyomo dako ma lakwele, nyo nyako madong otyeko butu ki laco. Gin pe gunyom dako ma cware oryemo pien ajwaka en dano maleng bot Lubangane. 8Wubitero ajwaki ni gin jo maleng pi ticgi, pien gin tyero cam pa Lubangawu; gin bibedo maleng botwu, pien An a Rwot, an ma alonyowu maleng, an aleng. 9Ka nya pa ajwaka mo odoko lakwele, nongo okelo nyero ki cac ikom wone; kibiwange woko ki mac.

10Ajwaka madit ikin utmegine, ma en aye kionyo moo wir iwiye, ka onongo kidyere wek oruk bongi aruka me tice, pe biweko yer wiye oket ata lijayi, dok bene pe biyeco ginarukane pi kumu pi lato. 11En bene pe bidonyo i ot kama kom dano ma oto tye iye, pe bibale me doko keni, kadi bed pi wone nyo mine. 12Pe bikato woko nia ki i Kabedo Maleng, wek pe opyed Kabedo Maleng pa Lubangane, pien moo wir mayam kidyere kwede bot Lubangane tye iwiye. An a Rwot. 13En myero onyom nyako ma peya ongeyo laco. 14Pe onyom dato, nyo dako ma cware oryemo, nyo nyako madong obutu ki laco, nyo nyako ma lakwele; en onyom anyira tugi ma peya ongeyo laco, 15wek pe opyede ikom lutinone ikin lutugi; pien An a Rwot ma alonye obed maleng.”

16Rwot ociko Moses kun waconi, 17“Wac bot Aron ni, ikare pa likwayowu ducu, lakwaru mo ma kome kimwonyo pe onyik cok katyero cam pa Lubangane. 18Pien dano ma kome kimwonyo pe binyiko cok bota: latowang, langolo, ngat ma wange ki poyo, ngat ma tyene nyo bade tungcel langabu, 19ngat ma tyene nyo ma bade otur, 20dano ma kore orunge, dano ma oran, nyo ma wange ocor, dano ma twoyo gwinyu nyo nyac, nyo ma kikolo mane. 21Dano mo ma kome kimwonyo ikin likwayo pa ajwaka Aron pe binyiko cok ka tyero cam bot Lubangane. 22En twero camo cam maleng makato ki kit cam maleng ducu ma kityero bot Lubangane, 23ento pe binyiko cok ki bongo kicika, dok bene pe bibino cok ki keno tyer, pien kome kimwonyo, wek pe opyed kabedona ducu malengi, pien An a Rwot ma alonyogi gubed maleng.” 24Moses oloko kitmeno bot Aron ki awobene ki bot jo Icrael ducu.