Lulevi 20

Pwod pi turu cik mapatpat

1Rwot owaco bot Moses ni, 2“Wac bot luicrael ni, dano mo ma ikin jo Icrael, nyo labedo ma bedo ikin jo Icrael, ma omiyo latine mo bot jok Molek kibineko woko; lwak gibicele woko ki got. 3An ki koma abiketo pwod ikom dano meno, abimiyo kibiryemo dano meno woko ki ikin jona, pien omiyo latine bot jok Molek, kun nongo obalo kwede kabedona maleng, dok opyedo nyinga maleng. 4Ka lwak pe guyabo wangi ikom dano meno kun en miyo latine mo bot Molek, ce pe gumedo ki neko en, 5ci an ki koma abiketo pwod ikom dano meno ki ikom dogolane dok abimiyo kiryemo dano meno woko ki ikin jona, en kacel ki jo ducu ma gilube pi woro jok Molek.

6Ka dano mo oloke odok bot lukor tipu ki megi jogi kun gilubugi, ci abiketo pwod ikom dano meno, abimiyo kibiryemo dano meno woko ki ikin jona. 7Wulonye kekenwu wubed maleng, pien An a Rwot Lubangawu. 8Wugwok cika wucobgi, pien An a Rwot ma alonyowu wudoko maleng. 91Dano mo ma oceno wone nyo mine kibineko woko; en otyeko ceno wone nyo mine, remone dok iwiye. 102

Ka laco mo otimo abor ki dako pa lawote, laco ki dako ma gutimo abori kibinekogi woko. 113Laco ma obutu ki ciwone, nongo oketo lewic ikom wone; kibineko gin aryo ducu, remogi dok iwigi. 124Ka laco mo obutu ki ciwode, kibineko gin aryo ducu, pien gutimo kir, remogi dok iwigi. 135Ka laco mo obutu ki laco lawote macalo dako, nongo gin aryo ducu gutimo gwok, kibinekogi woko, remogi dok iwigi. 146Ka laco mo onyomo dako ci ododo ki butu ki mine bene, meno kipyeda; kibiwangogi woko ki mac, en ki mon aryonu ducu, wek kipyeda pe obed ikinwu. 157Ka laco mo obutu ki lee, kibineko woko, dok wubineko lee meno bene. 16Ka dako mo obutu ki lee, ci wubineko dakonu ki lee meno kibinekogi woko, remogi dok iwigi. 178

Ka laco mo okwanyo lamine, kun nya pa wone nyo nya pa mine, ce obutu kwede macalo dakone, meno lok me lewic atika kibinegogi woko ki ikin lutugi. En obedo ki lamine, bal bidok iwiye. 189Ka laco mo obutu ki dako matye kaneno kwere, nongo en pe oworo remo pa dako ma cwer, dako bene nongo lewic pe omako pi remone ma cweri; gin aryo ducu kibiryemogi woko ki ikin jo Icrael. 1910Pe ibut ki lamin meni nyo lamin woru, pien meno nongo ipyede ikom watti; kibimiyo pwod ikom gin aryo ducu. 20Ka laco mo obutu ki ciomin wone, meno nongo oketo lewic ikom omin wone; balgi bidok iwigi, gibito labongo latin mo. 2111Ka laco mo obutu ki ciomine, meno otimo kir; nongo okelo lewic ikom omine; gibito labongo latin mo.

22Pimeno wumak cika ducu, ki gin ma angolo ducu, wucobgi, wek pe aryemwu woko ki i lobo ma atye katerowu iyeni. 23Wun pe wulub kit pa lurok ma atye ka ryemogi woko ki i nyimwuni; pien gin gutimo gin magi ducu, ma omiyo iya okwerogi woko. 24Ento atyeko waco botwu ni, ‘Wubileyo lobogi, abimiyo botwu me bedo mewu, lobo ma miu maceko cam mapol.’ An a Rwot Lubangawu ma apokowu woko ki ikom rok mukene. 25Ma omiyo myero wupok kin lee ma cik ye ki lee makeni, ki ikin winyo makeni ki winyo ma cik ye. Pe wubale wudok gin me kwer pi lee, nyo pi winyo, nyo pi gin mo ma core iwi lobo, ma an dong atyeko pokone woko pat, ni obed keni botwu. 26Wubed jo maleng pira, pien an Rwot aleng, dok atyeko pokowu woko ki ikom rok mukene ducu, wek wubed jona.

27Laco nyo dako mo ma lakor tipu nyo ma min jok kibineko woko; kibicelo woko ki got, remogi bidok iwigi.”