Lulevi 18

Juku tim cira

1Rwot owaco bot Moses ni, 2“Wac bot jo Icrael ni, An a Rwot Lubangawu. 3Pe wubilubu kit tic pa jo Ejipt kama yam wubedo iyeni; nyo kit pa jo me lobo Kanaan kama atye ka terowu iyeni. Pe wulub cikgi. 4Myero wutii gin ma aciko, wumak cika, wulubi. An a Rwot Lubangawu. 51Pimeno, wubimako cika ki gin ma angolo ducu, ngat ma bitimo malube ki cika bikwo; An a Rwot.

6Ngat mo pe obed ki wate me butu kwede. An a Rwot. 7Pe ibibutu ki meni, pien miyo iketo lewic ikom woru; en aye meni, pe ibiketo lewic ikome. 82Pe ibibutu ki ciworu; pe iket lewic ikom woru kumeno. 93Pe i bibedo ki lameru ma nya pa woru nyo nya pa meni, kadi ma kinywalo paco nyo ma kinywalo kamukene. 10Pe ibibutu ki nya pa wodi nyo nya pa nyari, pien miyo ikelo lewic ikomi keni. 11Pe ibibutu ki nya pa ciworu ma woru aye onywalo, pien en lameru kikome. 124Pe ibibutu ki wayu, pien en wat ma iot pa woru kikome. 13Pe ibibutu ki lamin meni, pien en wat ma i ot pa meni kikome. 14Pe ibibutu ki ciomin woru, pe ibinyiko cok ki dakone, pien en ciomin woru. 155Pe ibibutu ki ciwodi, pien en dako pa wodi, pe ibibutu kwede. 166Pe ibibutu ki ciomeru, ma omeru aye bedo kwede. 177Pe ibibutu ki dako mo, kun ibutu ki nyare bene; pe ibitero nya pa wode, nyo nya pa nyare, me butu kwede. 18Pe ibinyomo yweri me bedo nyek lamine, kun ibutu kwede ma lamine pud kwo. 198

Pe ibinyiko cok ki dako me butu kwede ikare ma en tye ki kwer, ma peya olonye. 209Pe ibibutu ki dako pa lawoti, miyo ijere kekeni. 2110Pe ibityero latini mo me awanga ki mac bot jok Molek, pe ibipyedo nying Lubangani kulu; An a Rwot. 2211Pe ibibutu ki laco lawoti macalo ibutu ki dako; meno tim gwok. 2312Pe ibibutu ki lee miyo ipyede kwede kekeni, kadi dako mo pe opyede ikom lee mo me butu kwede; meno tim kipyeda.

24Pe wupyede kekenwu kitiyo tim cilo magi ducu, pien rok ducu ma atye ka ryemogi woko ki i nyimwuni gubedo ka pyede keken gi kun gitiyo tim cilo magi ducu. 25Tim cilogi oweko lobo odoko keni, ci omiyo Rwot oketo can i lobo pi balgi, ci Lubanga oryemogi woko ki i lobogi. 26Ento wun myero wumak cika ki lok ducu ma angolo, kun pe wutimo gin mo ikom tim kipyeda magi ducu, kadi anywali me lobo, nyo larok mo mabedo ikinwu. 27Pien tim kipyeda meno ducu wegi loboni mayam gukwongo nyimwu, gubedo katimone, ci omiyo lobo odoko keni woko. 28Pe wutim tim kipyeda i lobo, wek pe kiryemwu woko ki lobo, macalo con Lubanga oryemo kwede rok ma okwongo nyimwuni. 29Pe wubiye jo ducu ma gitimo lakit tim kipyeda magi me bedo ikinwu. 30Wumak cik ma acikowu kwede. Pe wunyebe ikit me timo kipyeda macalo jo mayam gukwongo nyimwu gunyebe katimone, pe wuket keni ikomwu kekenwu ki kit tim macalo meno. An a Rwot Lubangawu.”