Lulevi 17

Cik ma mako kaneko lee

1Rwot owaco bot Moses ni, 2“Wac bot Aron ki awobene ki bot jo Icrael ducu ni, man aye gin ma Rwot ociko. 3Ka dano mo me ot pa jo Icrael oneko twon nyo latin romo nyo dyel ki i dye gony, nyo ka oneko woko ki inge gony, 4kun pe okelo idogola Kema me Rwate me tyerone wek obed mot pa Rwot inyim kema pa Rwot, ci kibikwano alii me remo iwi dano meno. Pien ooyo remo, kibipoke woko ki ikin lwak pa Lubanga. 5Man kiciko wek jo Icrael gucak kelo gitumgi mayam onongo gitumu i dye bari bot ajwaka, i dogola Kema me Rwate, wek kinekgi me bedo gityer me berbedo bot Rwot. 6Ajwaka bikiro remone iwi keno tyer pa Rwot i dogola Kema me Rwate, biwango dwolo obed gin ma ngwece kur ma yomo cwiny Rwot. 7Pe dong wubityero gitumwu bot jogi ma wuworogi ma gubedo calo nyogi oyima ki timgi me kweleni. Man bibedo cik botwu matwal wa ikare pa likwayowu ducu.

8Ci ibiwaco ki gin ni: dano mo me ot pa jo Icrael, nyo ki ikin lubedo ma bedo ikin gi, ma otyero gitum awanga, nyo gitum mo 9ma pe okelo idogola Kema me Rwate pi tumu bot Rwot, pe kibiye dano meno ikin lwak ma mera.

Kigengo camo remo

101

Ka dano mo me ot pa jo Icrael, nyo ki ikin lubedo ma bedo ikin gi, ocamo remo mo, ci abiketo wanga ikom dano meno ma ocamo remoni, dok pe wubiye dano meno ikin lwak ma mera. 112Pien kwo me kom tye i remo; an dong atyeko miyone botwu iwi keno tyer pi kwanyo bal pi tipuwu pien remo aye gin ma kwanyo bal, pi kwo matye iyeni. 12En ma omiyo awaco bot jo Icrael ni, dano mo ikinwu pe ocam remo. 13Dano mo bene ki ikin jo Icrael, nyo ki ikin lubedo ma bedo ikin gi, ma omako lee nyo winyo mo ma kicamo, ka en owoto ka dwar, bionyo remone woko piny i ngom, ci umu woko ki lobo.

14Pien kwo pa ginacweya makwo ducu en aye remone; ma omiyo awaco ki jo Icrael ni: pe wucam remo pa gin mo, pien kwo pa gin makwo ducu en remone; ngat ma ocamo pe kibikwane ikin jo Icrael. 15Dok ka dano mo ocamo gin mo ma oto kene, nyo lee ma nguu omwodo, kadi anywali me lobo, nyo labedo, bilwoko bongine, dok bene bilwoko kome ki pii, ci bedo keni nio wa otyeno, ka dong bedo ma olony. 16Ento ka pe olwoko bongine, nyo pe olwoko kome, ci bal bidok iwiye.”