Lulevi 16

Nino me kwanyo bal

1Rwot oloko bot Moses ikare madong awobe pa Aron aryo gutyeko to, pien onongo gunyiko cok inyim Rwot kun gucwinyo mac ma pe opore ci guto woko. 21Ci Rwot owaco bot Moses ni, “Tit ki omeru Aron ni, pe obed kadonyo nino ducu i Kabedo Maleng ma bongo kicika oumu, inyim kom me kica matye iwi canduk wek pe oto; pien abinen iwi kom me kica i pol. 32Ento Aron bidonyo i Kabedo Maleng ki wod twon pi gitum me bal, ki nyok romo pi gitum awanga. 4En biruku kanyi maleng me bongo camanini, biruku pali bongo camanini ikome. Bitweyo pyere ki kitambara bongo camanini, ka tweyo kitambara adwala iwiye; man aye bongi aruka maleng. En bilwoko kome ki pii, ka dong birukugi. 5Dok en bigamo ki bot lwak jo Icrael nyogi dyegi aryo pi gitum me bal, ki nyok romo acel me gitum awanga.

6Aron bityero twon pi bedo gitum me bal ma otiko en, kun en bitimo gin lakwany bal ki ikome ki ikom jo ma i ode. 7Dok en bikelo dyegi aryonu, biketogi inyim Rwot i dogola Kema me Rwate. 8Ci Aron bibolo kwir ikom nyogi dyegi aryonu, kwir acel pi Rwot ki kwir mukene pi Ajajel.3 9Aron bikelo dyel ma kwir pa Rwot opoto ikomeni ci bityero me bedo gitum me bal. 10Ento dyel ma kwir pa Ajajel opoto ikomeni kibikelo makwo inyim Rwot pi timo gin lakwany bal ikome, wek kicwale woko cen i tim bot Ajajel.

11Aron bityero twon pi bedo gitum me bal ma otiko en kun timo gin lakwany bal ki ikome ki ikom jo ma i ode; en bineko twon pi bedo gitum me bal ma otiko en. 12En bikwanyo atabo weer ma opong ki lodi mac ma okwanyo ki iwi keno tyer ma inyim Rwot me wango odok ma ngwece kur ma kiluru matinotino pong cing aryo, ci bikelone ityelo kama bongo kicika oumuni. 13En bionyo odok ma ngwece kuri imac ma inyim Rwot, wek yito me odok ma ngwece kuri oduny macalo pol oum kom me kica ma bedo iwi Canduk lok me Caden, wek en pe oto. 14Ka dok bikwanyo remo twon manok, ci bikiro ki lwet cinge inyim laum kom me kica, dok bikiro remo ki lwet cinge tyen abiro piny inyim kom me kica. 154

Ka man otum, en bineko dyel me gitum me bal ma onongo tye pi lwak, ci kelo remone i tyelo ma bongo kicika oumuni, ci timo remo dyel meno kit ma otimo ki remo twon ca; en bikiro inyim laum kom me kica ki inyim kom me kica. 16En bitimo gin lakwany bal ki ikom Kabedo Maleng kitmeno, pi keni pa jo Icrael, pi tim aranyigi ki pi balgi ducu. Dok bitimo kitmeno bene ikom kema pien gony man ocung ikin jo ma komgi kikeni. 17Ngat mo pe bibedo i Kema me Rwate, cake ikare ma en donyo i Kabedo Maleng katimo gin lakwany bal, nio ka dong okato woko ma otyeko timo gin lakwany bal ki ikome ki ikom jo ma i ode, ki ikom jo Icrael mucoke ducu. 18Lacen en bikato woko inyim keno me tyer matye inyim Rwot, ci bitimo gin lakwany bal ki ikome. En bikwanyo remo twon, ki remo dyel, ci bireyo ikom ten keno angwen me keno tyer, rumu kome ducu. 19Ka dok bikiro remo iye ki lwet cinge tyen abiro kun lonyo, kwero doko maleng pi kwanyo keni pa jo Icrael ducu ki ikome.

20Ka en dong otyeko timo gin lakwany bal ki ikom Kabedo Maleng, ki Kema me Rwate, ki keno tyer, ci en bikelo dyel makwo. 21Aron biketo cinge aryo ducu iwi dyel, kun tucu ikom dyel man bal ducu ma jo Icrael gutimo, tim aranyigi ki kwayi balgi ducu. En biketogi iwi dyelu, ci cwale woko kwede i tim, kun dano mo madong ki yero aye tero. 22Dyel meno bitingo balgi ducu ikome, ci danoni bigonyone woko wek ocit omal i dye tim ata kakene. 235

Lacen Aron dok bidonyo i Kema me Rwate, ci bilunyo bongi camanini ma onongo oruku ikare ma en cito i Kabedo Malengi, ci wekogi kunu. 24En bilwoko kome ki pii i kabedo mo maleng, ka ruku bongine ikome, ci kati woko, tyero gitum awangane, ki gitum awanga pi lwak, ci timo gin lakwany bal ki ikome ki ikom lwak. 25Dwolo me gitum awanga en biwango woko iwi keno tyer. 26Ngat ma otero dyel, ocwalo bot Ajajel, bilwoko bongine, dok bene bilwoko kome ki pii, ka lacen bibino i gony. 276Twon me gitum me bal ki dyel me gitum me bal, ma onongo kitero remogi i Kabedo Maleng katimo gin lakwany bal, kibiterogi woko wa inge gony. Pyengi, ringogi ki wee igi kibiwango woko ki mac. 28Ngat ma owango bilwoko bongine, dok bene bilwoko kome ki pii, ka lacen en bidwogo cen i gony. 297

Man bibedo cik matwal botwu ni, i dwe me abiro, inino dwe apar, wubirii kec wun ki lurok mabedo ikinwu kun wuyube me woro Lubanga. Pe wubitiyo tic mo, kadi anywali me lobo, kadi labedo ma bedo ikinwu. 30Pien inino meno aye kibitimo iye gin lakwany bal ki ikomwu me lonyowu; omyero wubed ma wulonye inyim Rwot ki ikom balwu ducu. 31En aye bibedo botwu ceng Cabit me yweyo mot, ki rii kec. Man aye cik ma bedo matwal. 32Ajwaka ma ki wiro ki moo ka kiketo en i dog tice me bedo ajwaka, kun leyo kaka wone, bitimo gin lakwany bal, kun ruku bongi aruka maleng me bongo camanini. 33En bitimo gin lakwany bal ki ikom Kabedo Maleng, dok bitimo gin lakwany bal ki ikom Kema me Rwate ki ikom keno tyer. Ka dok bitimo gin lakwany bal ki ikom ajwaki, ki ikom jo ducu mucoke. 34Man bibedo cik botwu matwal ni, myero kitim gin lakwany bal ki ikom jo Icrael kicel i mwaka acel, pi balgi ducu.” Ci Moses otimo kit ma Rwot ocike kwede.