Lulevi 15

Gin ma cwer ikom dano mamiyo dano bedo keni

1Rwot owaco bot Moses ki Aron ni, 2“Wuwac bot jo Icrael ni: ka laco mo kome me cone cwer tut, cwer tut meno miyo kome bedo kikeni. 3Kadi ka kome me cone opong tut, onyo mol tut, nongo kome kikeni. 4Kitanda ducu ma dano ma kome cwer tut obutu iye bibedo keni, ki gin ducu ma en obedo iye bibedo keni. 5Ngat ma ogudu kom kitandane myero olwok bongine, dok bene olwok kome ki pii, ci bedo keni nio wa otyeno. 6Ngat ma obedo ikom gin ma dano ma kome cwer tut obedo iye bilwoko bongine, dok bene bilwoko kome ki pii, ci bedo keni nio wa otyeno. 7Ngat ma ogudu kom dano ma kome cwer tuti bilwoko bongine, dok bene bilwoko kome ki pii, ci bedo keni nio wa otyeno. 8Ka ngat ma kome cwer tut ongulu laa ikom dano mo ma kome pe kikeni, danoni bilwoko bongine, dok bene bilwoko kome ki pii, ci bibedo keni nio wa otyeno. 9Kit kom mo keken me bedo iwi kinaga ma dano ma kome cwer tut obedo iwiye bibedo keni. 10Ka ngat ma ogudu gin mo ma en obedo onyo obutu iye, bibedo keni nio wa otyeno; ki ngat ma otingo jami meno bilwoko bongine, dok bene bilwoko kome ki pii, ci bedo keni nio wa otyeno. 11Ka dano ma kome cwer tut ogudu kom dano mo ma onongo pe olako cinge ki pii, danoni bilwoko bongine, dok bene bilwoko kome ki pii, ci bedo keni nio wa otyeno. 12Ka dano ma kome cwer tut ogudu kom agulu mo, ci agulune kibineko woko, ki jami macalo weer bao ducu kibilako komgi ki pii.

13Ka dano mo ma onongo kome cwer tut dong ocang woko, ci bikwano nino abiro pi lonyene, ka bilwoko bongine, dok bene bilwoko kome i pii mamol, ci bedo ma kome pe kikeni. 14Inino me aborone en bitero amam aryo nyo lutino akuri aryo, bibino inyim Rwot idogola Kema me Rwate, bimiyogi bot ajwaka. 15Ajwaka bityerogi, acel me gitum me bal, acel me gitum awanga. Kitmeno ajwaka bitimo gin lakwany bal ki ikome inyim Rwot pi kome ma obedo kacwer tuti.

16Ka laco mo kodine me cone omol ikome, en bilwoko kome ducu ki pii, ci bedo keni nio wa otyeno. 17Ginaruka onyo pyen mo ma kodine me cone omol iye omyero kilwok ki pii, ci bedo keni nio wa otyeno. 18Ka laco obutu ki dako ci gin aryo ducu gibilwoko komgi ki pii, ci gibibedo keni nio wa otyeno.

19Dako ma remo mol ki ikome ikit me kare me kwere ducu bibedo pi nino abiro ma kome kikeni; dano ducu ma ogudu kome bibedo keni nio wa otyeno. 20Gin ducu ma en obutu iye ikare matye ki kwer bibedo keni, ki gin ducu ma en obedo iye bibedo keni. 21Ngat ma ogudu kitandane omyero olwok bongine, dok bene olwok kome ki pii, ci bedo keni nio wa otyeno. 22Ngat ma ogudu kom gin ma en obedo iye bilwoko bongine, wa kome bene ki pii, ci bedo keni nio wa otyeno. 23Kadi bed kitanda nyo gin mo ma en obedo iye, dano ma ogudu bibedo keni nio wa otyeno. 24Ka laco mo obutu kwede, ce kwere ogudu kome, en bibedo keni pi nino abiro, dok kitanda ducu ma danoni obutu iye bibedo keni.

25Ka dako mo remo obedo kamol ki ikome pi nino mapol, ma pe ikare me neno kwere keken, nyo ka remone mol ma okato kare me neno kwere, en bimede bedo keni pi kare ducu ma remone mol; en bibedo keni macalo ikare me neno kwere. 26Kitanda ducu ma en obutu iye, ikare me kwere bibedo keni; dok gin ducu ma en obedo iye bibedo keni, macalo ikare me neno kwere. 27Ngat ma ogudu jami magi bibedo keni; myero olwok bongine wa kome bene ki pii, ci bedo keni nio wa otyeno. 28Ento ka kare me mol pa remone dong ogik, ci en bikwano nino abiro, lacen en bibedo ma kome pe kikeni. 29Inino me aborone en bitero amam aryo nyo lutino akuri aryo, ci bikelogi bot ajwaka idogola me Kema me Rwate. 30Ajwaka bityero acel me gitum me bal, acel me gitum awanga; kitmeno ajwaka bitimo gin lakwany bal ki ikome inyim Rwot pi remone ma omol ma omiyo en obedo keni.

31Myero wumii jo Icrael gugwoke ikom gin ma miyogi bedo keni kitmeno, wek pe guto ma gitye keni pi balo kemana matye ikin gi.

32Man aye cik ma mako laco ma kome cwer tut, onyo kodine me cone omol ki ikome, 33ki dako ikare me neno kwer; ki laco bene ma obutu ki dako ma kome kikeni.”