Lulevi 14

Lonye inge twoyo two delkom

1Rwot owaco bot Moses ni, 21“Man aye bibedo kwer ma mako ngat ma twoyo two delkom inino me lonyene. Kibikele bot ajwaka, 3ci ajwaka bikato woko inge gony ka ngiyo kome. Ka two delkom dong ocang woko ki ikome, 4ci ajwaka biciko ni kikel winyo makwo aryo ma kitwero camogi, ki yat cedar, uci makwar, ki anyero, pi dano ma ki mito kwero wek olonyeni. 5Ajwaka biciko ni kitwom pii ma mol, wek kiony i otako, ci kinek winyo acel ki malo iwi pii meno. 6En bimako winyo makwo kacel ki yat cedar ki uci makwari ki anyero, ci bilutugi kacel ki winyo makwo i remo winyo ma onongo kineko ki malo iwi pii mamoli. 7Ajwaka bikiro remo ikom dano ma kikwero kwer me lonyo two delkom ki ikomeni tyen abiro; lacen bimoko ni en dong olonye gire woko, ci biweko winyo makwoni tuk dok i tim. 8Ci dano man ma kikwero pi lonyeni bilwoko bongine, dok bene bilyelo yer kome ducu, ka bilwoko kome ki pii, ci bibedo ma olonye. I nge meno en dong bidok cen igony, ento bibutu woko inge kemane pi nino abiro. 9Inino me abirone bilyelo yer wiye ducu, dok bilyelo yer tike ki yer pyen wange ki yer kome ducu. Ka dok bilwoko bongine, bilwoko kome ki pii, ci dong bibedo ma olonye.

10Dok inino me aborone en bitero lutino nyogi romi aryo ma komgi pe kimwonyo, ki bwong romo madite romo mwaka acel, ki gityer me moko kwon maromo agwata adek, moko mapwote ma kirubu ki moo, ki moo maromo cupa acel. 11Ajwaka ma okwereni bitero dano man ma kilonyoni, cibo kacel ki jamine inyim Rwot idogola Kema me Rwate. 12Ajwaka bikwanyo nyok romo acel, bityero me gitum pi alii, kacel ki cupa moo acelu, ci kwatogi me bedo gityer akwata inyim Rwot. 13En bineko latin romonu i kabedo ma kineko iye gitum pi bal ki gitum awanga, i kabedo maleng, pien gitum me alii rom ki gitum me bal, ducu bedo pa ajwaka; en gin maleng makato. 14Ajwaka bigwelo remo me gitum me alii, bireyo i ogwilo it dano ma kilonyoni, ma lacuc, ki ikom twon nyig cinge ma lacuc, ki itwon nyig tyene ma lacuc. 15Ka ajwaka bikwanyo moo maromo cupa aceli, bitono manok i dye cinge ma lacam, 16ka lutu lwet cinge ma lacuc i moo ma i dye cinge ma lacami, ci kiro moo ki nyig cinge tyen abiro inyim Rwot. 17Ajwaka bireyo moo ma odong i cingeni i ogwilo it dano ma kilonyoni ma lacuc, ki itwon nyig cinge ma lacuc, ki itwon nyig tyene ma lacuc, ikom remo me gitum me alii. 18Moo ma odong i cing ajwaka en bidunyo iwi dano ma kilonyoni, ka ajwaka bitimo gin lakwany bal ki ikome inyim Rwot. 19Ajwaka bityero gitum me bal me kwanyo bal ki ikom dano ma ki mito lonyo keni ma ikomeni. Lacen en bineko gitum awanga, 20ci ajwaka bityero gitum awanga kacel ki gitum me moko kwon iwi keno tyer. Kitmeno ajwaka bitimo gin lakwany bal ki ikome, ci dong bilonye.

21Ento ka en lacan ma nongo jami meno ducu oloye, ci en bikwanyo latin nyok romo acel obed gitum me alii me akwata, pi kwanyo bal ki ikome, ki agwata moko kwon acel me moko mapwote ma kirubu ki moo pi gityer me moko kwon, ki moo maromo cupa acel; 22dok amam aryo nyo lutino akuri aryo, macalo en romo nongone; acel bibedo gitum me bal, acel bibedo gitum awanga. 23Inino me aborone en bikelo bot ajwaka pi lonyene idogola Kema me Rwate inyim Rwot. 24Ajwaka bikwanyo latin romo me gitum me alii, kacel ki moo maromo cupa aceli, ci bikwatogi me bedo gityer akwata inyim Rwot. 25Ka dok bineko latin romo me gitum me alii; ci ajwaka bigwelo remo me gitum man, bireyone i ogwilo it dano ma kilonyoni ma lacuc, ki itwon nyig cinge ma lacuc, ki itwon nyig tyene ma lacuc. 26Ka ajwaka bitono moo manok i dye cinge ma lacam, 27ci bikiro moo ma i dye cinge ma lacami tyen abiro inyim Rwot ki nyig cinge ma lacuc. 28Ka ajwaka bireyo moo ma i cinge ma lacuc i ogwilo it dano ma kilonyoni, ki itwon nyig cinge ma lacuc, ki itwon nyig tyene ma lacuc, kama kireyo iye remo me gitum me alii. 29Moo ma odong i cing ajwaka bidunyo iwi dano ma kilonyoni, me lakok dano ki ibal ki ikome inyim Rwot. 30Ikom amam nyo lutino akuri ma en romo nongone, 31en bityero acel pi gitum me bal, ki acel pi gitum awanga, kacel ki gityer me moko kwon; ci ajwaka bitimo gin lakwany bal ki ikom dano ma kilonyoni, inyim Rwot. 32Man aye cik ma mako dano matye ki two delkom, ma pe romo nongo gityer ducu ma kiciko pi lonyene.”

Ot ma puru

33Rwot owaco bot Moses ki Aron ni, 34“Ka dong wuo i lobo Kanaan ma abimiyowu me bedo mewu, kace aketo gin mamiyo ot puru i lobo ma abimiyowuni, 35ci won ot bicito tito bot ajwaka kun waco ni, ‘I oda nen calo tye iye lakit gin moni mamiyo ot puruni.’ 36Ajwaka biciko ni kicok jami, kikel woko wek ot odong ma iye nono ma nongo peya en ajwaka odonyo iye ka ngiyone, wek pe kimok ni jami ducu matye i ot meno obedo keni; lacen ajwaka bidonyo ka ngiyo ot meno. 37En bingiyo puru pa ot meno; ce gin ma puru iot tye i kor ot kun omido ma obedo tworotworo, nyo omido makwarkwar, ka nen ni odonyo matut ikor ot, 38ci ajwaka bikato woko ki i ot meno, cito idogolane, cego dog ot meno woko pi nino abiro. 39Inino me abirone ajwaka dok dwogo ci neno. Ka gin ma puruni onya omede i kor ot, 40ci ajwaka biciko ni kimuk but ot ma omidoni woko, wek kibolgi woko inge gang i kabedo ma keni. 41Dok bimiyo kicwero i ot rumu woko ducu, lobo ma kicwero ki ikor otti kibionyo woko inge gang i kabedo ma keni. 42Ka dok kibikelo got apaya mukene, ci kibimwonogi i kabedo ma kikwanyo iye godini, ka dok kibikelo lobo mukene, ci kibipuyu ki ot meno dok kakare.

43Ka gin ma puru otti dok otuc i ot meno, ma onongo dong kityeko muku godi woko, dok kicwero kor ot, ci kipuyu odoco, 44ci ajwaka dok bidok ka nenone. Ka gin ma puruni onya omede i ot meno dok aye, meno lakit gin ma ngunu kor ot; ot meno kikeni. 45Kibimuku ot meno kireto woko piny, godine ki baone ki lobo ma kipuyu kwede ducu, kibiterogi woko inge gang i kabedo ma keni. 46Dano ma odonyo i ot meno ma onongo kicego wokoni bibedo keni nio wa otyeno. 47Ka dano ma obutu piny i ot meno bilwoko bongine; dok ngat ma ocamo i otu bilwoko bongine.

48Ento ka ajwaka obino, ongiyo ot ce onongo gin ma puru otti pe onya omede nia inino ma kipuyuni, ci ajwaka bimoko ni ot meno pe keni, pien lakit gin ma puru ioti mo dong peke iot meno. 49Pi lonyo ot meno, en bikwanyo lutino winyo aryo kacel ki yat cedar, uci makwar ki anyero. 50En bitwomo pii mamol i otako, ci en bineko winyo acel ki malo iwi pii meno. 51En bimako yat cedar ki anyero ki uci makwar, kacel ki winyo makwo, ci bilutugi i remo winyo ma onongo kineko ki malo iwi pii mamoli, ci kiro ikom ot tyen abiro. 52Kitmeno en bilonyo ot ki remo winyo, kacel ki pii mamoli, winyo makwo, yat cedar, anyero ki uci makwari, 53ci biweko winyo makwoni tuk dok woko i tim inge gang. Kitmeno en bitimo gin lakwany bal ki ikom ot, ci dano bidok kabedo iot meno.

54Man aye cik me kwer ma mako two akukuc, two delkom ducu, ki 55lakit gin ma puru ikom ginaruka nyo ikom ot, 56nyo pi gin ma okwot, nyo orugu, nyo orobo del kom dano, 57pi nyutu ka dano twero gudone onyo pe.”