Lulevi 13

Cik ma mako two mapatpat me del kom

1Rwot owaco bot Moses ki Aron ni, 2“Ka dano mo del kome okwot, nyo orugu, nyo orobo, ce odoko two me dobo i del kome, ci omyero kikele bot ajwaka Aron, nyo bot ngat acel ikin awobene ma gin aye ajwaki. 3Ajwaka bingiyo two ma orugu i del komeni; ce yer ma i del kome ma oruguni odoko lwar matar, dok ka twone onen ni ogole matut ma okato del kome, ci meno two dobo, ka ajwaka dong ongiyo kome, ci bimoko ni, kome kikeni. 4Ento ka del komeni orugu matar kun pe nen ni ogole matut okato del, dok ka yer matye iye bene pe oloke odoko lwar, ci ajwaka bigwoko dano ma latwoni iot kakene pi nino abiro. 5Inino me abirone ajwaka dok bingiyo kome, ci ka onen bote ni twone dong pe onya omede i del kome, ci ajwaka bimede ki gwoko danoni iot pi nino abiro mukene. 6Inino me abirone ajwaka dok bingiyo kome, ci ka two ma onongo orugu komeni dong ojwik woko, dok twone pe onya omede i del kome, ci ajwaka bimoko ni kome pe kikeni, ento onongo orugu aruga. Danoni myero olwok bongine ci bibedo ma olony. 7Ento kace kome ma oruguni onya omede i del kome, madong onongo onyute kene bot ajwaka pi lonyene, ci en myero dok obin inyim ajwaka. 8Ajwaka bingiyo, ci ka onongo ni kome ma oruguni dong onya omede i del kome, ci ajwaka bimoko ni kome kikeni, meno two dobo.

9Ka two dobo omako dano mo ci kibikele bot ajwaka. 10Ajwaka bingiyo, ci ka del kome mo tye ma okwot ma okwor matar, ma otyeko loko yer odoko lwar, dok bur odet manyen kama okwoti, 11meno nongo two dobo mayam orii i del kome. Ajwaka bimoko ni kome kikeni; pe bigwoke iot kakene, pien kome kikeni. 12Ka two ocore i del kome, ma oromo del kom danoni woko nia iwiye nio wa ityene, ma ajwaka twero neno ducu, 13ci ajwaka bingiyo. Ka kome ducu odoko tar, ci ajwaka bimoko ni two meno dong pe ikome; pien nongo kome ducu okwor matar, kome pe kikeni. 14Ento ka bur odet manen ikome, ci kome bibedo kikeni. 15Ajwaka bingiyo bur mudet manyeni, ci bimoko ni kome kikeni; bur ma odet manyeni bedo keni, ma nyutuni meno two dobo. 16Ento kace bur ma odet manyeni dok oloke odoko matar, ci bidwogo bot ajwaka. 17Ajwaka bingiyo kome, ci ka two odoko matar, ajwaka bimoko ni latwo kome pe kikeni; en dong ocang woko.

18Ka odeke okwot i del kom ngat mo ce oboone ci ocang woko, 19ka lacen dok ojer okwot iwang odekenu ma okwor matar, nyo orobo matar kun bedo makwarkwar, ci myero kinyut bot ajwaka. 20Ajwaka bingiyo, ci ka onen ni ogole matut okato del kom, ki yer bene odoko lwar, ci ajwaka bimoko ni kome kikeni: meno two dobo ma otyer iwang odeke. 21Ento ka ajwaka ongiyo, ci yer matye iye pe lwar, dok pe ogole matut ma okato del kom, ento dong ojwik woko, ci ajwaka bigwoko danoni iot kakene pi nino abiro. 22Ka onya omede i del kome, ci ajwaka bimoko ni kome kikeni, pien meno en latwo. 23Ento kace wange ma oruguni ogik i kabedo acel ma pe onya omede, meno poyo wang odeke keken, ci ajwaka bimoko ni kome pe kikeni.

24Nyo ka mac owango dano mo ci opwaco del kome, ce bur odet manyen iwang kama opwaci, ci orugu matar kun obedo makwarkwar, nyo okwor matar, 25ci ajwaka bingiyo. Ka yer ma i wange odoko lwar, dok onen ni ogole matut ma okato del kom, ci nongo meno two dobo aye opoto iwang kama opwaci. Ajwaka bimoko ni kome kikeni; meno two dobo. 26Ento ka ajwaka ongiyo, ci yer ma i wange ma oroboni pe lwar, dok pe ogole matut ma okato del kom, ento ojwik woko, ci ajwaka bigwoko danoni iot kakene pi nino abiro. 27Inino me abirone ajwaka bingiyo; ka tye ka nya mede i del kome, ci ajwaka bimoko ni kome kikeni; meno two dobo. 28Ento kace wange ma oruguni ogik i kabedo acel ma pe onya omede i del kome, ento ojwik woko, ci meno nongo gin ma okwot akwota iwang kama opwac keken; ajwaka bimoko ni kome pe kikeni, pien meno wang poyo kama mac owango.

29Ka laco mo nyo dako mo two orugu iwiye nyo itike, 30ci ajwaka bingiyo twone. Ka onen ni ogole matut okato del kom, dok yer matye iye odoko ocwakocwak, dok ojwer woko, ci ajwaka bimoko ni kome kikeni; meno two akukuc, en dobo me wic nyo me tik. 31Ka ajwaka ongiyo two akukuc, ce onen ni ogole matut okato del kom, kun yer macol pe iye, ci ajwaka bigwoko dano meno matye ki two akukuc iot kakene pi nino abiro. 32Inino me abirone ajwaka bingiyo twone; ka akukuc pe onya omede, dok pe tye iye yer ma obedo ocwakocwak, dok akukuc pe onen ni ogole matut okato del kom, 33ci danoni bilyelo wiye woko, ento pe bilyelo kama obedo akukuci. Ajwaka bimedo gwoko dano meno iot kakene pi nino abiro mukene. 34Inino me abirone ajwaka bingiyo akukuc; ka akukuc pe onya omede i del kome, kun pe nen ni ogole matut okato del kom, ci ajwaka bimoko ni kome pe kikeni. En bilwoko bongine ci bibedo ma olony. 35Ento kace akukuc onya omede i del kome inge lonyene, 36ci ajwaka bingiyo kome. Ka akukuc onya omede i del kome, ajwaka pe dok oyeny yer ma obedo ocwakocwak; te lokeni kome kikeni. 37Ento ka onen bote ni akukuc dong ogiko nya, dok yer macol tye olot iye, nongo akukuc dong ocang woko, en dong ocang woko; ajwaka bimoko ni kome pe kikeni.

38Ka laco mo nyo dako mo ikinwu del kome otabutabu ma okwor matar, 39ajwaka bingiyo. Ka del kome orobo, ce kome oonyo ma pe okwor matar tutwal, nongo del kome oonyo odugi aduga keken; kome pe kikeni.

40Ka yer wi laco mo otal woko, en bedo lawiye otal, ento kome pe kikeni. 41Dok ka laco mo yer olwer woko ki itur nyime nyo iteng wiye, en bedo ma wiye otal itur nyime, ento kome pe kikeni. 42Ento ka two mo orugu matar kun obedo makwarkwar iwiye nyo itur nyime ma otali, meno two dobo aye ma ocore iwiye ma otali, nyo itur nyime ma otali. 43Ajwaka bingiyo kome: ci ka two ma okwoto wiye nyo tur nyime ma otali obedo matar makwarkwar, kun nen calo two dobo ma i del kom dano, nongo 44en dano ma ladobo, dok kome kikeni. Ajwaka myero otuc ni kome kikeni; twone tye iwiye.

45Ngat matye ki two dobo myero oruk bongi ma ogenyogeny, dok biweko yer wiye ma okeko ma ojany ata lijayi, ci umu del doge mamalo woko, ka bidange ni, ‘Koma kikeni! Koma kikeni!’ 46En bibedo keni pi kare ducu me twone; pien kome kikeni. Dok en bibedo i kabedone kene, woko inge gony.

Cik ma mako bongo ma opuru

47Kace gin mo ma opuru onen ikom ginaruka mo kadi bed me bongo yer romo nyo bongo camanini, 48nyo ikom uci bongo ma kicweyo atir nyo ma ocung arii, nyo ikom laa, nyo ikom gin mo ma kiyubu ki laa, 49ka kama opuruni nen tworotworo nyo makwarkwar ikom bongo, ikom uci bongo ma kicweyo atir nyo ma ocung arii, nyo ikom gin mo ma kiyubu ki laa, meno gin ma opuru, omyero kinyut bot ajwaka. 50Ajwaka bingiyo gin meno ma opuruni, ci bigwoko jami ma opuruni kakene pi nino abiro. 51Inino me abirone en bingiyo gin ma opuruni. Ka gin ma opuruni onya omede i ginaruka, ikom uci bongo ma ocung atir nyo ma obutu arii, nyo ikom laa, kadi bed laa ma kiyubu pi kit tic mo, meno aye gin ma tobo bongo; meno bedo keni, pe dok kibirukune. 52Ajwaka biwango ginaruka meno, kadi bed gin ma opuruni tye ikom uci ma atire nyo ma ariine, ibongo yer romo nyo ibongo camanini, nyo ikom gin mo ma kitiyo ki laa, pien meno gin ma tobo jami; pimeno kibiwango woko awanga ki mac.

53Ka ajwaka ongiyo, ce pe onya omede i ginaruka, ikom uci ma atire nyo ikom uci ma ariine, nyo ikom gin mo ma kitiyo ki laa, 54ci ajwaka biciko ni kilwok jami ma gin ma opuru tye iyeni, ci bimede ki gwokone pi nino abiro mukene. 55Dok ajwaka bingiyo jami ma opuruni inge lwokogi. Ka rangi pe oloke kama opuruni, kadi bed gin ma opuruni pe onya omede, jaminu keni; wubiwango woko awanga ki mac, kadi bed gin ma opuruni otobo tung ngeye nyo tung iye.

56Ento kace ajwaka ongiyo, ci gin ma opuruni pe nen tutwal inge lwokone, en biyeco dul meno woko ki ikom ginaruka, nyo ki ikom laa, ki ikom ucine ma atire nyo ikom uci ma ariine. 57Lacen ka gin ma opuruni dok onen ikom ginarukanu, nyo ikom ucine ma atire nyo ma ariine, nyo ikom gin mo ma kitiyo ki laa, nongo tye ka nya mede; ka gin ma opuruni tye iye ci wubiwango woko awanga ki mac. 58Ento ginaruka, kadi bed uci ma atire nyo ma ariine, nyo gin mo ma kitiyo ki laa, ma gin ma opuruni oa ikome ka ilwoko, myero kilwok tyen me aryo, ci kibirukune odoco.

59Man aye cik ma mako gin ma puru ikom ginaruka me bongo yer romo nyo bongo camanini, ikom uci bongo ma atire nyo uci bongo ma ariine, nyo ikom gin mo ma kitiyo ki laa, pi moko ka kiromo ruku bongo meno onyo pe.”