Jon 3:16

Yecu gin ki Nikodemo

1Yam tye dano mo ikin Luparicayo ma nyinge Nikodemo, ma en ngat acel ikin jo madito me Judaya. 2En obino bot Yecu i dyewor, kun wace ni, “Lapwony, wan wangeyo ni in lapwony ma ia ki bot Lubanga; pien pe tye ngat mo matwero tiyo lanyut meno ma in itiyoni, ka Lubanga pe tye kwede.” 3Yecu odoke iye ni, “Adada awaci ni, dano ka pe kinywale tyen me aryo pe twero neno ker pa Lubanga.” 4Ci Nikodemo openye ni, “Dano ka dong odoko dit woko kitwero nywale dok ningning? Twero donyo doki i ot nyodo pa mine tyen me aryo, ci kinywale?” 5Ci Yecu odok iye ni, “Adada awaci ni, dano ka pe kinywale ki pii ki Cwiny ci pe twero donyo i ker pa Lubanga. 6Dano kinywale ikom kun a ki bot wone ki mine, ento dano mamito doko latin pa Lubanga myero kinywale ki Cwiny pa Lubanga. 7Pe ibed ki ur pien awaci ni, ‘Myero wun ducu kinywalwu tyen me aryo.’ 8Yamo kodo dok kama en mito; iwinyo dwone, ento pe ingeyo kama oa iye, nyo kama dok iye. I yo acelu, dano ducu ma kinywalo tyen me aryo ki Cwiny pa Lubanga tye kitmeno.”

9Ci Nikodemo openye ni, “Man twero time ningning?” 10Yecu odoke iye ni, “In lapwony madit pa Icrael, pe ingeyo lok man? 11Adada awaci ni, wan waloko ikom gin ma wangeyo, wabedo caden ikom gin ma waneno, ento wun pe wuye lok ma watito botwu. 12Ka atitiwu lok me lobo man, wun pe wuye, ci wubiye ningning ka atitiwu lok me polo? 13Pe tye ngat mo mayam ocito iwi polo, kono en ma ceng olor piny nia ki i polo, en aye Wod pa dano, ma oa ki i polo. 141 Kit macalo Moses yam otingo twol malo i tim ca, kitmeno Wod pa dano bene myero kitinge malo, 15wek dano ducu ma ye en gunong kwo ma pe tum.

16Pien Lubanga yam omaro lobo kumeno, piman omiyo iye Wode acel keken, wek dano ducu ma ye en pe oto, ento obed ki kwo ma pe tum. 17Lubanga pe ooro Wode i lobo ni ongol kop ikom lobo, ento wek lobo olare pi en. 18Ngat ma ye en pe dong kingolo kop ikome, ento ngat ma pe ye en, dong kingolo kop oloye con; pien pe oye Wod pa Lubanga acel keken. 19Ngolo kop tye kit man, dero con obino i lobo, ento dano gumaro piny macol makato dero, pien timgi rac. 20Pien dano ducu ma timo gin marac dag dero, pe bino i dero, wek time pe onen kamaleng. 21Ento ngat ma timo gin me ada bino i dero, wek tice onen kamaleng, ni en tiyo gin ma Lubanga mito.”

Yecu gin ki Jon

22Ka man otum, Yecu ocito i lobo Judaya kacel ki lupwonyene; ci obedo kwedgi kunu kun batija dano. 23Jon bene onongo tye ka batija dano i Aenon, macok ki Calim; pien pii onongo dwong kunu, ci dano gubino, ci en obatijagi. 242 Man otime ma pud peya kitweyo Jon i buc. 25Pyem ocake ikin lupwonye mogo pa Jon ki Lajudaya mo ikom lok me lwok me lonye. 26Ci gucito bot Jon, guwace ni, “Lapwony, ipo ikom ngat ma ninoca wubedo kwede loka Jordan, ma ibolo lok me caden ikomeni, nen, en tye ka batija dano, dok jo ducu tye kacito bote.” 27Jon odok iye ni, “Pe tye ngat mo matwero nongo gin mo pire kene ka pe Lubanga omiye nia ki i polo. 283 Wun ki komwu onongo wubedo cadena ni yam atito ni, ‘An pe a Kricito ma Lubanga oyero ento kiora akwongo nyime.’ 29Nyako ger obedo pa lanyom; larem lanyom ma cung ki tenge kun winye, ci cwinye bedo yom tutwal pi winyo dwon lanyom. Pimeno an bene apong ki yomcwiny mada kawinyo lok man. 30Piman rwome omyero omede, ento rwomma omyero odok piny.”

Ngat ma oa i polo

31Ngat ma a ki malo dit loyo ducu. Ngat ma a i lobo en dano me lobo, dok bene loko lok me lobo; ento ngat ma a i polo dit loyo ducu. 32En bedo caden ikom gin ma oneno ki ikom gin ma owinyo, ento pe tye ngat mo ma ye lok ma en tito. 33Ngat ma ye loke, moko caden ni, Lubanga opong ki ada. 34Ngat ma Lubanga ooro loko lok pa Lubanga, pien Lubanga miye Cwiny labongo lapim. 354 Won omaro Wod, ci omiyo jami ducu i cinge. 36Dano ma ye Wod tye ki kwo ma pe tum; ngat ma pe winyo dog Wod, pe bineno kwo, ento kiniga pa Lubanga bibedo ikome.