Yubu 9

Yubu okok ni lacungu dware peke

11

Yubu ogamo ni,

2“Adada angeyo ni tye kitmeno;

ento dano twero loyo kop ningning inyim Lubanga?

3Kace dano mo mito pyem kwede,

ci en twero penyo peny alip acel kulu

ma dano mo pe twero doke iye kadi ki acel.

4Lubanga ryek i cwinye, dok tekone dwong;

anga matye ki tekcwiny maromo loyo en?

5En kobo godi woko ma pe gingeyo,

dok balogi woko ki kiniga.

6En cwalo oyengyeng ci yengo ngom, ci balo pete me lobo woko,

dok myelo kom wir me te lobo ducu.

7En ciko ceng, miyo pe tuc;

en umu lakalatwe woko i dyewor wek pe guryeny.

8En oyaro polo kene,

ka onyono biamwonyi me nam woko. 92

En aye ma oketo Latwok ki Lyernyim,

Yoggo ki lakalatwe ma ginen tung kupiny.

10En tiyo tic madito ma niang iye tek bot dano,

ki tic me aura ma welgi pe kwane.

11Nen, Lubanga kato ki ingeta, kun pe aneno;

dok en mede ki wot anyim, ento an pe angeyo.

12En kwanyo jami ma iye mito cito kwede woko anga matwero juke?

Anga matwero penyo en ni, ‘Itimo ango?’

13Lubanga pe bijuku kinigane;

wa lukony pa Rakab, ma min kulu bene, gibedo ki myelkom inyime.

14Kara man atwero gamo doge ningning,

nyo yero lok ma abipido kwede inyime?

15Kadi bed bala peke, pe atwero gamo doge;

myero aleg ngat ma dota wek otima kica keken.

16Kace nene ogamo doga ikare ma alwonge,

kono pe aye ni onongo twero winyo loka.

17En bedo kapwoda ki yamo matek,

ci medo ret ikoma labongo tyen lok mo.

18En pe ye miya kare me yweyo,

ento miyo abedo ki keccwiny keken.

19Kace me tekkom, ci Lubanga tek adada!

Kace me pido ci anga matwero lwonge kapido?

20Kadi bed bala peke, ento lok ma aloko miyo kop loya;

kadi bed bala peke, en pud twero miyo anen calo dano ma labal.

21An bala peke, ento pe dong aparo;

dong aol ki bedo makwo.

22Loke ducu dong rom aroma; en ma omiyo awaco ni,

Lubanga tyeko jo ducu, jo ma obalo ki jo ma pe gubalo.

23Ka can mo opoto ikom jo ma peke ki bal,

ci en nyero mere anyera.

24Lubanga miyo lobo i cing jo maracu;

kun umu wang lungolkop woko;

ka pe en aye timo, ci anga kono?

25Nino me kwona ringo oyotoyot kato langwec woko,

gilwi girwenyo woko, pe gineno gin mo maber.

26Gicito oyot calo yeya ma kitiyo ki togo,

calo ocur ma lyane ikom lee ma en dwaro.

27Ka atamo ni, ‘Wiya biwil woko ikom pekona,

abibedo ki yomcwiny kun abunyu abunya,’

28ci pud dok abedo ki lworo pi arem ducu ma atye kwede,

pien angeyo ni ibitera macalo dano ma labal.

29Macalo dong ingolo ni kop oloya,

ayele kono dong pingo?

30Kadi bed alwoke ki pee,

kadi bed alwok cinga ki cabun,

31pud ibibola i bur aye,

ci bongina bikwero koma woko.

32Lubanga gire pe dano calo an, ma myero agam doge,

kono obedo dano, kono wapido kwede.

33Ngat mo peke matwero ngolo lok ikinwa,

ma myero ongol kop ikomwa wan aryo ducu.

34Ka onongo Lubanga pe opwoda ki odoone,

dok pe omiyo koma oryange me lworo en,

35kono onongo atwero lok labongo lworo mo inyime,

pien angeyo ni pe atye kit ma jo mogo gitamo kwede.