Yubu 10

Yubu okok ni kwone konye peke

1Adag dong kwona,

pimeno pe abijuku kokona;

abiloko lok ducu, pien cwinya dong odoko kec.

2Abiwaco bot Lubanga ni, ‘Pe ingol kop oloya;

ento tita gin ma omiyo itye kakelo lok ikoma.’

3Nen ber ki boti me bedo kauna,

ki cayo tic ma in dong itiyo,

kun nongo cwinyi yom pi tim pa jo maracu?

4Nenoni rom ki neno pa dano?

Ngeci rom ki ngec pa dano?

5Wel nino me kwoni rom ki pa dano?

Ibiri pi mwaka manok calo dano,

6ma omiyo itye kayenyo bal ikoma,

wek inen kama bala tye iye?

7In kikomi ingeyo ni an pe abalo,

dok ni pe tye dano mo matwero lara ki i cingi.

8In yam icweya ki cingi,

ci koni dong iloke, imito neka?

9Po ni yam icweya ki lobo;

ci dok ibidwoka i apwa aye?

10Ceng pe in aye imiyo wora kero me nywala,

ci imiyo adongo i ot nyodo pa maa?

11In ceng iumu koma ki del ki ringo,

dok ikubu cogona kacel ki ler.

12Imiyo bota kwo ki mar meri ma pe loke,

ci yeleni pira, ki gwok ma meri oweko akwo.

13Ento onongo ikano lok macalo man i cwinyi;

dong aniang ni gin ma otimeni onongo ityeko yubu con.

14Onongo ibedo kakiya kaneno ka apoto i bal,

wek pe i ye weko bala mo wa ki acel.

15Ka atimo gin marac ci dong nongo apoto woko ipeko!

Ento kadi bala peke, pe atwero tingo wanga malo,

pien lewic maka,

pi can ma obwoya woko.

16Kace gum ocako bino bota, ci in itugi dwara cut macalo labwor,

ci itiyo tic me aura me kelo can ikoma.

17In ibedo kakelo cadeni manyen pi nyutu bala,

kinigani mede ameda ikoma,

kun ikelo buca mony manyen ka lweny ikoma.

18Pingo iweko aa ki i maa?

Kono ceng anguku to ma peya wang dano onena, kono ber.

19Kono ceng kitinga nia ki i ic kitera wa i bur lyel,

kono onongo obedo ber marom ki ngat ma pe yam obedo kwo.

20Nino me kwona pe odong manok keken?

Weka mot, wek kong abed ki yomcwiny manok,

21ma peya acito kama pe dong abidwogo ki iye,

i lobo me mutu ki piny macol licuc.

22I lobo me colpiny ma onyobe atata,

kama dero rom ki colpiny.”