Yubu 11

Jopar owaco ni Yubu labal

1Jopar ma Lanaamat ogamo ni,

2“Lwak lok mapol marom meno pe kigamo ce?

Lalok mapol aye ma loke tye atir ce?

3Dog dano myero otwo woko pi loki ma tere pekeni?

Iloko lok me ngala, ci ngat mo pe twero weko lewic maki?

4Pien iwaco ni, ‘Kita tye maleng, iwang Lubanga

dok lok ma aloko tye me ada.’

5Ento kono Lubanga ongamo doge,

ci oloko kwedi,

6kono oyabo boti mung mapol me ryekone,

pien kitwero neno ryeko i yo mapatpat.

Myero inge ni can ma Lubanga oketo ikomi pe oporo bali ducu.

7In itamo ni itwero niang ryeko ki dit pa Lubanga?

Itamo ni itwero nongo kama twero pa Won Twer Ducu gik iye?

8Tye malo makato polo,

in itwero timo iye gin ango?

Tut makato lyel,

in ingeyo iye gin ango?

9Dit pa Lubanga bor makato lobo ducu,

dok lac makato nam.

10Ka en obino ci omako dano,

ce olwonge kapido, ci anga matwero juke?

11Lubanga ngeyo jo ma konygi peke;

ka oneno bal, ci pe keto iye cwinye?

12Ento dano ma laming binongo ryeko,

ka kana me tim onywalo dano.

13Kono ibedo ki cwiny maber, kono itango cingi bote!

14Ka yam itimo tim marac, pe dong imede kwede;

pe iwek jo ma i odi gutim gin mo marac.

15Ci adada ibibedo labongo lewic mo;

dok ibicung matek, ma pe ibilworo gin mo.

16Wii biwil ikom can ma meri;

bibedo boti mucalo pii ma dong omol ocito woko.

17Kwoni bibedo kamaleng makato cwiny dyeceng;

kadi bed itye i piny macol ci bibedo macalo rupiny.

18In dong ibibedo ma cwinyi opye, kun ingeyo ni nyimi leng;

ibiywe mot ki kuc kun Lubanga tye kagwoki.

19Ibibutu piny, ci ngat mo pe bimiyi lworo;

jo mapol gibibino boti wek ginong gum ki boti.

20Ento piny biloyo jo maracu matwal;

pe gibinongo kakane,

gen gi tye acel keken en aye ni to tye kabino.”