Yubu 12

Yubu ogamo ni edoko gin anyera

1Yubu ogamo ni,

2“Adada wun jo matye ki ngec,

ka wuto, ci ryeko bene birwenyo woko.

3Ento an aniang lok bene macalo wun,

wun pe wuryek wuloya wa ki acel.

Anga ma pe ngeyo lok macalo magi?

4Adoko gin anyera bot lurema;

an ma ceng alwongo Lubanga ci en gamo doga,

an ma kita atir, ma bal mo peke ikoma, dong adoko gin anyera.

5Lagumkom cayo ngat ma kome kec,

dok goyo ngat ma mito poto.

6Kema pa luyak tye ki kuc;

jo mamiyo kiniga mako Lubanga gibedo mot mupye,

gin jo ma guloko tekgi odoko lubangagi.

7Peny lee, ci gibipwonyi;

peny winyo me polo, ci gibititi.

8Gin ma lakalaka ingom gibipwonyi;

rec me nam bene gibitucune boti.

9Anga ki ikin gi ducu ma kwiya

ni cing Rwot aye otiyo man?

10Kwo pa gin makwo ducu tye i cinge,

aluu me yweyo pa dano acel acel tye itwerone.

11It dano twero niang ikom lok mabeco ki maracu ducu,

macalo dano bilo cam ki lebe.

12Ryeko bedo bot jo ma otii,

rii iwi lobo miyo dano niang ite lok mapol.

13Lubanga tye ki ryeko dok ki twer;

en tye ki ngec ki niang.

14Ka Lubanga omuku ot, ngat mo pe dok gero odoco;

ka Lubanga oloro wi dano, ngat mo pe dok yabo.

15Ka en ojuku kot pe cwer, ci lobo two woko;

ka en ocwalo pii, ci core iwi lobo.

16En tye ki teko ki ryeko;

langak dano ki ngat ma kingako gin ducu gitye ite twero ma mere.

17En kwanyo ryeko pa lumiitam woko,

ki loko lungolkop miyo gidoko lumingo.

18En kwanyo bongo ker woko ki ikom luker,

ci tweyo dura i pyergi macalo opii.

19En kwanyo twero pa ajwakine woko,

dok miyo wegi twer gipoto.

20En twoyo dog jo mayam kigenogi,

ci weko gikwiya poko gin maber ki gin marac.

21En weko dano gicayo rwodi,

dok kwanyo tek pa wegi twer.

22En yabo mung ma okane i piny macol,

ci kelo piny macol licuc i dero.

23En miyo rok mukene doko madito, ka dok tyekogi woko;

miyo rok mukene ginyayo locgi, ka dok tenyogi woko ata.

24En kwanyo ryeko woko ki bot lutela me lobo,

ci miyo gimal ata i tim kama yoo peke iye.

25Gin gileyo cinggi i colpiny labongo dero;

ci miyo gicato macalo lamero.