Yubu 13

Yubu omede ki waco ni cwinye leng

1Nen, wanga oneno magi ducu,

atyeko winyo, ci aniang iye.

2Gin ma wun wungeyo, an bene angeyo;

wun pe wuloya wa ki acel.

3Ento kono do amito ni alok ki Won Twer Ducu aye;

amito laro loka ki Lubanga.

4Wun wuumu lok ada woko ki goba;

wun ducu calo ludaktar ma pe konyo.

5Kono onongo wuling alinga,

onongo kitwero nenowu ni wun jo maryek.

6Kong mono wuwiny tama,

wuter itwu wuwiny loka.

7Wun wubiloko lok goba pi Lubanga?

Wun mono wutamo ni lok gobawuni konyo kor Lubanga?

8Wun mono wudoko lucungudwar pa Lubanga?

Wun dong wudoko lupido pire ce?

9Ka Lubanga ongiyowu, ci en tika binongo gin mo maber ma wutiyo?

Wutwero bwolo Lubanga kit macalo dano bwolo lawoteni?

10Atikane en bijukuwu,

ka wucwako kore i mung.

11Dite biryango komwu,

miyo lworo bimakowu inyime.

12Lok butawuni rom ki buru mamwa,

lok ma wupido rom ki lobo ma ngide woko oyot.

13Kong wuling mot, ci abilok,

wek gin ma mito bino ikoma obin.

14Wek an dong ato woko,

pien ajalo kwona woko.

15Wek Lubanga oneka gire, pien pe atye ki gen mo,

kadi bed kumeno pud abilaro lok kom kita ki inyime.

16Man aye bimiyo aloyo kop,

ni meno dano ma pe lworo Lubanga pe o inyime.

17Wuwiny loka mot mupye,

wek lok ma atito odony i itwu.

18Atyeko yube me pido;

ci angeyo ni abiloyo kop.

19Anga ma bipyem kweda wek obin?

Kace tye, abiling woko ci ato gira.

20Alegi lok aryo keken, Lubanga,

ci ka iye, pe abikane gira ki inyimi:

21pe iwek cingi oguda,

dok pe iwek lworo omaka ikomi.

22Ci dong ilwonga, ci abigamo dogi;

nyo wek akwong lok, ka dong idok iye bota.

23Bala ki roca tye adi?

Nyuta tim aranyina.

24Pingo dong iloke woko ikoma?

Pingo itera macalo lakwori?

25Imito imii lworo omaka ce,

kun arom ki oboke ma yamo kolo wokoni?

Iryemo kor cungkal mutwo?

26Pien icoyo lok makec me adot ikoma,

pud imito ni anen can pi bal me tinona. 271

In irwako tyena i okol,

dok ingiyo kama acito iye ducu;

iketo wangacoo kama tyena myero ogik iye.

28Ci omiyo adoko rom ki gin ma otop woko,

nyo bongo ma nyenye ocamo.