Yubu 14

1Dano ma dako onywalo nino me kwone nok,

dok opong ki ayelayela.

2En dongo macalo ature ci ner woko oyotoyot;

en rwenyo calo tipu yat, pe rii nakanaka.

3Ci in dok iciko wangi ikom ngat macalo meno?

Ikela inyimi wek ingola kop?

4Anga matwero kelo gin maleng ki ikom gin ma pe leng?

Pe tye ngat mo wa ki acel.

5Kityeko ngolo wel nino me kwone,

in ingeyo wel dwe ma imiye;

ityeko nyutu kama kwone bigik iye ma pe dok kato.

6Lok wangi inen cen, wek en obedi,

wek otyek ninone ki kuc macalo latic pi mucara.

7Kadi wa yat bene tye ki gen makato,

ni meno ka kireto piny ci dok binyuru,

pud dok bilot aye.

8Kadi lwite dong orii ma otegi i lobo,

kadi ka ajute yam oto woko i ngom,

9ento teke pii tye i ngom ci bicwiyone woko,

ci bolo jange calo yat ma pud kipito apita.

10Ento dano ka dong guto pe dong gia malo;

ci kwogi dong gik woko matwal.

11Macalo pii tum woko ki i nam,

ki kulu dwon two woko,

12kumeno dano bene to woko ci pe dok gia malo;

macalo polo bedo mere nakani,

gin bene pe gibico ki iwang ninogi.

13Kono onongo ikana i lyel,

ci wi owil ikoma nio ka kinigani dong okato,

ci dong iket kare madong ibipo pira iye!

14Ka dano dong oto, pud dok gibidwogo ka kwo odoco?

Ka onongo tye kitmeno, kono adiyo cwinya,

kun akuru nino ma omyero kigonya iye ki i cana.

15Ci onongo ibilwonga, ci abigamo dogi;

pira bibedo miti mada, pien in aye icweya.

16Ci onongo ibineno kama acito iye ducu,

ento pe ibikiya pi neno bala.

17Onongo ibitweyo bala woko i kicaa,

ci ibiumu wi roca ducu.

18Ento got madit poto ci ngide woko,

pata gikobo woko ki i kakare,

19pii mudu gweng woko,

kot ma cwer matek molo lobo woko;

in bene ityeko gen pa dano woko kitmeno.

20In ibwoyogi woko matwal, ci gin cito gire;

imiyo wanggi loke, ka gito ci iryemogi woko.

21Lutinogi ginongo deyo, ma gin pe dok gingeyo;

kidwokogi piny, ci gin pe giniang gin mo iye.

22Gin gibedo kawinyo mere arem me komgi keken,

gin gikoko cwercwiny ma meggi keken gi.”