Yubu 15

Erifaji dok ojuku Yubu

1Erifaji Lateman ogamo dog Yubu kun waco ni,

2“Itamoni dano ma laryeko twero gamo lok labongo ngec mo,

kun nongo peke ki ngec mo?

3Itamoni en kelo lok pyem ma konye peke,

onyo lok ma pe kelo gin mo maber?

4Ento in igengo dano ni pe gulwor Lubanga,

igengogi ni pe gubed kalwodo lok inyime.

5Pien lok ma a ki idogi aye nyutu ni in labal,

iloko lok pa jo ma bwolo dano ki ryeko.

6Dogi keni aye miyo kop loyi, pe an,

lok dogi aye ma kelo lok ikomi.

7In aye dano ma kikwongo nywalone ce?

Meni onywali ma peya Lubanga oketo godi?

8Yam kong onongo iwinyo yub ma i kacoke pa Lubanga?

Dok itamo ni ryeko ducu obed meri keni?

9Gin ango ma in ingeyo ma wan wakwiya?

Iniang i gin ango ma wan pe waniang iyeni?

10Dano ma otii ki dano ma wiye ki lwar gitye ikinwa,

jo ma otii makato woru.

11Itamoni lok ma Lubanga kweyo ki cwinyi lam mada ki boti?

Kece nyo loke ma en loko kwedi moti obedo gin mo manok ki tung boti ba?

12Pingo cwinyi nen oari woko?

Pingo wangi nen ki kiniga?

13Pingo iloko ki kinigani ikom Lubanga

ma iweko lok macalo meno a ki i dogi? 141

Dano kono gin ango, mamiyo en twero bedo labongo bal?

Ngat ma dako aye onywalo kono gin ango,

ma weko en bedo labongo bal mo?

15Nen, Lubanga pe geno wa lumalaikane,

pe nenogi ni gileng;

16ci dano kono, ma keni dok to woko bibedo ningning inyime,

dano ma labalo ma oloko bal odoko macalo pii me amataneni?

17Winy loka Yubu, wek atiti,

ci abinyuti gin ma dong aneno.

18Jo ma luryeko gubedo katitone,

gin ma kwarigi bene yam guloko.

19Lobogi yam kimiyo botgi pirgi ken gi,

ma larok mo pe ongakogi ki kaworo Lubangagi.

20Dano marac bedo ki arem nino ducu me kwone,

peko tye pi ngat ma labwami pi mwaka ducu me kwone.

21En bedo kawinyo dwon ma kele lworo;

ikare me kuc layak bibino ikome.

22En peke ki gen me loyo ki i to,

pien dong kiyubu ni kibityekogi woko ki pala lucwan.

23En bedo kamal ata kayenyo kwon, kun waco ni, ‘Tye kwene?’

En ngeyo atir ni inyime tye iye to.

24Peko ki can keken aye bedo karyango kome;

ci bwoye woko macalo rwot ma oyube pi mony.

25Pien dano meno oryeyo cinge ikom Lubanga,

obute kene ni etwero lweny ki Won Twer Ducu.

26En ringo ki dingone ikom Lubanga

ki kwot molane ma kinong.

27Wange nen ma ocwe,

ki pyere oyare malac.

28En bibedo i taun madito mayam gudong nononi,

i odi ma dano pe myero gubed iye,

i odi ma dong kicok mukugi woko.

29Pimeno en pe bibedo lalonyo, lonyone pe birii,

lonyone pe binya mede ento birweny woko ki i lobo.

30En pe bibwot ki i peko mabino ikome.

En bibedo rom ki yat ma mac owango pote woko ma pud olot alota,

ki yat ma yamo ooyo ture woko.

31Kace en bwole kene kun keto gen ma mere ikom gin ma konye peke;

kitmeno en bene binongo gin ma konye peke.

32En birweny woko ma peya otii,

macalo jang yat ma ner ma pe dong lot.

33En bibedo rom ki olok ma nyige oo ma peya ocek,

nyo yat jeituni ma ture oo woko.

34Jo ma pe lworo Lubanga gibibedo lulur;

ki mac bene biwango kema pa lucamcana woko.

35Giyubu yub me timo tim aranyi ma adwogine aye tim maracu keken.

Dok gipiro lok goba keken ki i cwinygi.”