Yubu 16

Yubu okok pi gin ma Lubanga otimo ikome

1Yubu ogamo ni,

2“Atyeko winyo lok mapol marom ki meno;

wun ducu wun lukwecwiny ma kela ayela keken.

3Lokwu ma wupwodoni mono agikine peke?

Gin ango ma ongeto iwu, ma oweko wuloko kitmeno?

4An bene onongo atwero lok macalo wun,

ka nene wun aye wutye kit ma an atye kwede kombedi;

an bene onongo atwero rado lok pi jukuwu,

kun ayengo ki wiya bene botwu.

5Onongo atwero jingo cwinywu ki loka,

ki kweyo aremwu ki mit doga.

6Kadi ka aloko arem koma pe kwe;

onyo ka aling alinga, itamoni arem koma twero dok cen?

7Adada, Lubanga koni dong oolo koma woko,

oneko jona woko ducu.

8Lubanga dong otyeko maka woko,

ma oweko odoko caden me nyutu bala;

ajony ma koma odong cogo nono,

ma miyo caden ni an abalo.

9Lubanga i akemone otima malit macalo labwor ma kido kom lee,

okayo lake liking ikoma ki kiniga,

lamonena gaya ki wange macalo ngat ma pako tonge me neko dano.

10Dano gungamo doggi ikoma,

gudongo lema me anywar,

guruma woko liking.

11Lubanga dong omiya i cing jo ma kitgi pe atir,

en obola i cing jo maracu.

12Onongo abedo mot ma opye, ci en oturu koma woko,

omaka ki nguta, ci onginya matinotino.

Lubanga tiyo kweda macalo kapwonyo lwenye,

13ma wegi atume guruma dyere.

En otucu olanga pil, labongo kica,

ooyo pig kedana i ngom.

14Oketo can ikoma teretere macalo lamony

ma bedo karingo ikom ot pi mukune woko.

15Akwoyo bongo cola me arukana,

abutu i apwa ma piny oloya woko.

16Wanga dong obok ki koko,

del wanga ocido macol licuc,

17kadi bed pe atimo gin mo me bwami,

dok kadi legana bal mo peke iye.

18In lobo, pe ium bal ma kitimo ikoma,

dok pe iwek kokona obed me nono. 191

Kadi kombedi, i ada, cadena tye iwi polo,

ngat ma pido pira tye kunu.

20Lurema gicaya,

ci pig wanga cwer kun akok kwede bot Lubanga.

21Amito ni ngat mo opid loka inyim Lubanga,

macalo dano ma pido lok kun cung pi lawote.

22Pien mwakana dong tye kakato akata,

abicito kama pe dong aromo dwogo ki iye.