Yubu 17

1Cwinya dong tye katum, kwona dong mito gik woko,

kono lyel aye dong tye kakura.

2Adada atye kaneno kit ma lunywar guruma kwede dyere,

atye kaneno kit ma giyenyo kolo kwede ikoma.

3Ai Lubanga winy kokona, pien an ageno in.

Pe tye ngat mo matwero cung pira.

4Macalo dong ikwero yabo tamgi wek guniang lok,

pimeno pe dong iwek guloya.

5Ngat ma tero lok roro ikom lawote wek enong dul me limgi,

piny biloyo lutinone.

6Lubanga omiyo nyinga odoko labol pa lwak;

adoko dano ma lwak gingulu laa ikome

7Wanga dong ocido woko pi kumu,

cinga ki tyena ojony woko likang.

8Pimeno jo ma giwaco ni kitgi atir giuru dok gijwat,

ci gin ducu cako lok ikoma ni pe alworo Lubanga.

9Dong ngat ma kite atir pud mede ki kite macon,

ki ngat ma cwinye leng teke mede ameda.

10Ento ka wun ducu wubino bota,

ci pe abinongo dano mo maryek ikinwu.

11Karena dong okato, yub mayam ayubu dong otur woko,

gena ducu dong peke.

12Ento luwota giwaco ni dyewor aye dyeceng,

kun giwaco ni, ‘Dero dong cok,’

ento an pud angeyo ni atye i colpiny.

13Gena ducu aye odong lyel me bedo oda,

kama abibutu iye i piny macol.

14Kama bur lyel dong alwongo ni wora,

kwidi ma bicamo koma alwongo ni maa, nyo lamera.

15Ci gen ma mera kono dok tye kwene ka?

Anga ma dok bineno gin maber ma ageno?

16Gen mono bicito kweda wa i lyel?

Wan mono wabilor kwede kacel i apwa?”