Yubu 18

Bildad oloko pi can ma poto ikom jo maracu

1Bildad ma Lacua ogamo ni,

2“Ibibedo kalok pi kare marom mene in Yubu?

Kong itam iling mot ci wabilok kwedi.

3Pingo inenowa macalo dyangi?

Pingo inenowa macalo jo maming?

4In itye kaketo ret ikomi kekeni ki kinigani.

Itamoni lobo myero kiwek odong nono piri?

Itamoni Lubanga myero okob got woko ki i kabedone piri? 51

Eyo, dero pa dano marac bicido woko,

leb mace pe biryeny.

6Mac ma menyo i kemane bidoko ribiribi,

tara ma kingabo ka wiye kibineko woko.

7Wot ma en woto ki tek bijwik,

lok ma en kikome oyubu aye birete piny.

8En moko i obwo ki tyene kene,

nyo woto iwi bur ma kikwinyo pi mako lee.

9Layuta mako opunye,

owic ma kiciko dwalo tyene.

10Kiciko tol i ngom pire,

kiciko kinu i yoo pi make.

11Jami maracu makelo lworo orume woko tungi ki tungi,

malubu kore kama en cito iye ducu.

12Kec obwoyo tekone woko,

Peko ocung kun kure me poto ikome.

13Two bibalo del kome ducu,

two marac mada bingunu dul kome woko.

14Kibiywaye woko ki i kemane mayam en geno,

kitere bot rwot maloyo kit gin ducu ma dano lworo.

15Kemane biwang woko;

ikare ma kibionyo mac calfa ipacone.

16En bibedo rom ki yat ma lwite otwo woko ki piny,

ki ma jange oner woko ki malo.

17Dano pe dong bipo pire i lobone,

nyinge pe dong biwinye i wanga yoo.

18Kibicwale woko ki kama dero tye iye, wek obed i colpiny,

kibiryeme woko ki iwi lobo.

19En pe bibedo ki latin nyo likwayo ikin lutuggi,

ngat mo pe bidong makwo kama yam en bedo iye.

20Jo ma tung kupotoceng tipu komgi bito woko lirut pi gin ma otime ikome,

atiba bipoto ikom jo matye tung kunyango bene.

21Adada, gang pa lubalo bibedo kumeno,

meno aye gin ma bitime ikom dano ma kwiya Lubanga.”