Yubu 19

Lagam pa Yubu

1Yubu ogamo ni,

2“Wubiyela nio wa awene,

kun wuturu cwinya ki lok mapol?

3Man dong tyen me apare ma wuyeta;

lewic pe makowu me bedo katera marac kuman?

4Kadi bed ni dong angak woko ada,

ci balane makowu ningning?

5Ka ada wun wunyate ikoma,

kun wuwaco ni lewic ma kiketo ikoma onyutu ni an labal,

6dong myero wunge ni Lubanga aye otima marac,

dok en otweya woko ki obwone.

7Nen, kadi akok ni, ‘Kineka woko do,’ ci pe kigamo doga;

adange matek, ento ngat mo peke ma ngolo kopa ma atir.

8Lubanga ocego yoo woko bota, pe atwero kato,

oketo colpiny woko inyima kama acito iye ducu.

9Lubanga okwanyo deyo woko ki ikoma,

en okwanyo lalukana woko ki iwiya.

10Lubanga otwoma tungi ki tungi calo ot ci ao ni rubuku,

ki gena bene en oputu woko macalo oputu yat.

11Kiniga omake matek ikoma,

ci otera macalo lakwore.

12Monye gubino ikoma kacel,

gutoro cel lobo guruma woko dyere,

ci gugony gurumu kemana.

13En opoka woko ki bot omegina omiyo atye mabor kwedgi,

jo ma ceng gin luwota ducu adoko welo ki tung botgi.

14Wadina ki lurema gurwenyo woko;

15wele mayam gibino kalima i oda dong wigi owil woko ikoma;

angecana gibedo kweda calo an a welo ki tung botgi,

adoko larok ki i wanggi.

16Ka alwongo latica, en pe gamo doga,

an myero abak doga abaka bote.

17Aluu doga odoko rac wa bot dakona,

omegina ma lutino pa maa gidag ngwec koma.

18Kadi wa lutino matino gicaya;

ka aa, gin loko lok marac ikoma.

19Lurema ma gingeya ducu igi dong okwera woko,

jo mayam amarogi dong guloke ikoma.

20Cogona dong omake woko ki del koma ki ringo koma,

anen ki laka keken.

21Kica omakwu ikoma ba, wun lurema,

pien cing Lubanga dong otyeko gudu koma.

22Pingo wubedo kauna kitma Lubanga tye kauna kwedeni?

Can ma aneno, ki arem koma peya oromowu?

23Loka ducu kono kicoyo woko cut!

Kono ceng kicoyo i buk!

24Kono ceng kigoro loka ki kalam nyonyo ikom pata,

ci kimwono ki gin macol, wek orii matwal.

25Pien angeyo ni Lacungudwara tye,

ci lacen en bicung pira iwi lobo;

26kadi ka dong del koma obale woko kuman,

ci abineno Lubanga nongo pud atye ki komani.

27An kikoma abinene kun cung pira,

abinene ki wanga, pe bibedo welo ki tung bota.

Cwinya opoto ni ling, pien wuwaco ni,

28‘Wabiune ningning?’

Onyo ni, ‘Pagi me peko man oa ki bote.’

29Ento omyero wulwor pala lucwan,

pien kiniga aye kelo can me to,

wek wunge ni ngolo kop tye.”