Yubu 20

Lagam pa Jopar

1Jopar Lanaamat ogamo ni,

2“Pi lok ma iloko oweko tama odiya me dok iloki,

pi rucurucu ma atye kwede i cwinya.

3Gin ma iwaco tye calo yet bota,

ento angeyo kit ma omyero adoki kwede iye.

4In pe ingeyo lok man nia wa con,

nicake ikare ma kiketo dano iwi lobo,

5ni kijira pa dano marac winye pi kare manok,

yomcwiny pa dano ma pe lworo Lubanga rii pi kare manok mo keken?

6Kadi ka odongo mabor ma o wa i polo,

kadi ka wiye gudu pol,

7ci en birwenyo woko matwal macalo cete;

jo mayam gunene gibiwaco ni, ‘En tye kwene ka?’

8En bilal woko macalo lek;

kibiryeme woko macalo ginanyuta me dyewor.

9Jo mayam gunene pe dok gibinene aye,

kadi kabedone pe dok binen matwal.

10Lutinone gibiyenyo cwak ki bot lucan,

gibidwoko lonyo mayam lunyodogi gukwaloni woko cen.

11Cogo kome mayam opong ki teko me awobineni,

kibiyike kwede i apwa.

12Kadi ka timo tim maracu obedo calo gin ma lim idoge,

kadi bed en kano i te lebe,

13kadi en pe ye ngulune,

kun kano pud mede ki bedo kwede idoge,

14ento loke ki i cin iye,

doko kec macalo kwir twol.

15Ngat marac mwonyo lim ma en onongo i yo maraci ci ngoko woko;

Lubanga cwalo kato woko ki i iye.

16En bidoto kwir twol gola,

lak twol ororo bineke woko.

17En pe bineno kulu moo jeituni,

nyo laora mamol kic ki cak.

18En bidwoko gin ma en onongo ki tice matek,

en pe bicamo magoba;

ma en olimo pi cato wile,

pe bilimo iye yomcwiny mo.

19Pien yam odiyo lucan ci otenyogi woko ata

omayo odi ma ceng en pe ogerogi.

20En ngat ma owor ma mitine pe bicobe wa ki acel,

pien gin mo marome peke.

21Yomcwinye ki berbedone pe birii,

pien ceng ikare ma en camo ca, pe oweko gin mo odong.

22Ikare ma jamine dong onya mapol, can bipoto ikome,

cwercwiny ki tekone ducu bipoto ikome.

23Lubanga bicwalo kinigane malyet ikome,

miyo cwer ikome macalo kot ma ka came,

wek oyeng kwede liking.

24Ka en biringo jami lweny me nyonyo,

ci atero mola bicele woko pil.

25Kibiputu ki i tung ngeye,

lebe maryenyi bikato woko ki pig kedane;

kome binyonge woko ki lworo.

26Lim ma en okanoni, bibale woko ducu;

mac ma pe dano aye ocwinyo bityeke woko;

biwango wa jami ducu ma odong i ode.

27Polo binyutu bale,

lobo bikelo lok me caden ikome.

28Lonyone kibiyakone woko,

dano bitero jamine inino me kiniga pa Lubanga.

29Man en aye pok pa dano marac ma a ki bot Lubanga,

man ginaleya ma Lubanga ociko pire.”