Yubu 21

Lagam ma Yubu dok ogamo

1Yubu dok ogamo ni,

2“Wuwiny loka maber,

ci meno aye bibedo kit kweyo cwiny ma amito ki botwu.

3Wudii cwinywu, ci abilok,

lacen ka dong aloko otum, ci wumede giwu ki nywara.

4Atye kakoko ikom dano bo?

Myero adi cwinya pingo?

5Ka wunena wunu, ci pe romo weko dogwu two woko,

ma weko wubedo ki ur?

6Ka atamo pi gin ma otime ikoma,

cwinya poto, ma koma myel amyela.

7Pingo jo maracu gimede ki kwo,

gito ma kun nongo gutii matek i lobo, dok lonyogi mede amede?

8Lutinogi doko dito ma lunyodogi pud kwo,

likwayogi dongo kun gineno bene ki wanggi.

9Odigi tye ki kuc labongo lworo,

odoo pa Lubanga pe o ikomgi.

10Twoni dyangigi ito ma pe giloc,

megi dyangigi pe bwogo lutino abwoga.

11Lutinogi mol calo lwak romi,

ka gicito katuku.

12Giwero ki ajaa ki opuk,

ginyutu yomcwinygi ki dwon nyamulere.

13Gityeko karegi ki berbedo keken,

gito mot ki kuc.

14Giwaco ki Lubanga ni, ‘A woko ki botwa!

Pe wamito ngeyo yoni.

15Won Twer Ducu mono en anga ma myero watii bote?

Ka walego en wabinongo kony ango?’

16Nen ba, gin gitamo ni, lonyo ma meggi ginongo pirgi ken gi.

Ento an pe atwero ye tam pa jo maracu.

17In dong ineno ka jo maracu gito atura tyen adi?

In dong ineno tyen adi ka can poto ikomgi?

Lubanga mono dong opoko arem botgi pi kinigane tyen adi?

18Ineno mono ni gibedo macalo cuci ma yamo kolo tero woko ata?

Nyo macalo cuci kal ma yamo kot kolo?

19Wuwaco ni, ‘Lubanga kano can me balgi pi lutinogi.’

Wek ocul botgi gin kikomgi ci guniang.

20Wek gunen ki wanggi ka can poto ikomgi,

ci gubil kiniga pa Won Twer Ducu.

21Gin kono giparo ango pi likwayogi inge togi,

ma dong kityeko ngolo wel dwegi me kwogi woko?

22Ngat mo twero pwonyo Lubanga ki ryeko,

en ngat ma ngolo kop kadi wa pa jo ma gitye malo i polo?

23Jo mukene to ma pud komgi tek,

matye maber ki kuc madwong;

24ma komgi ocwer,

wa cogo komgi bene opong ki teko.

25Ngat mukene to ki cwercwiny madwong,

ma nongo yam peya obilo gin maber.

26Ento gin ducu gito gicito ilyel,

kwidi pong ikomgi ducu.

27Nen, angeyo tamwu,

ki yubwu me timo gin marac ikoma.

28Pien wuwaco ni, ‘Odi pa luker ki pa lulonyo gitye kwene?

Kema mayam jo maracu bedo iyeni tye kwene?

29Wun pe wubedo kapenyo jo ma giwoto i yoo?

Pe wuye ongon ma gubolo botwu,

30ma nyutu ni dano marac kiweke woko inino me can,

dok bene kilare woko ikare me kiniga?

31Anga matwero nyute kite kamaleng?

Dok anga matwero cule pi time maracuni?

32Ka kitero kome i bur,

dano kuru lyele.

33Ngom mapwot aye kionyo kiumu ki kome;

jo ducu gilubu kore,

lwak jo ma gitelo nyime pe kwane.

34Ci wun dok wubikweyo cwinya ningning ki lok ma tere peke ni?

Gin mo peke ma odong ikom lagamwu, kono goba keken.”