Yubu 22

Lok ma Erifaji ogamo

11

Erifaji Lateman dok ogamo ni,

2“Itamoni dano twero bedo ki kony bot Lubanga?

Tika ngat matye ki ryeko twero bedo ki kony mo bote?

3Itamoni Won Twer Ducu cwinye bedo yom ka kiti atir?

Lubanga mono twero nongo kony mo ki boti ka bal mo peke ikomi?

4Nyo itamo ni pien ilwore ma omiyo en juki,

ci miyo en ngolo kop ikomi?

5Pe tim marac ma itimo aye pol?

Bali agikine peke.

6Pien imiyo omegini gijengo jamigi nonono,

ci ilunyu bongo woko ki ikom dano iweko gudong munero.

7In ceng pe imiyo pii amata bot ngat ma ool,

itwono kwon bot ngat ma kec kwon neko.

8In ibedo ka tamoni in aye oteka me bedo won lobo,

dok pien dano giwori, omiyo dong icako bedo iye.

9In ceng iryemo mon to woko ki cinggi nono,

kun bene itero lutino kic marac.

10Pimeno kirumi woko ki owic,

lworo onyongo komi woko oyotoyot.

11Dero ceng odoko macol, ma oweko pe itwero neno piny,

ki lalele omwonyi woko.

12Itamoni Lubanga mono pe tye wa malo i polo?

Nen lakalatwe ma gitye malo kit ma gibor kwede!

13Pimeno iwaco ni, ‘Lubanga ngeyo gin ango?

Wange romo tucu pol mapek pi ngolo kop?

14Pol ma ocido oboyo kome woko,

pimeno en pe twero neno bal.

En woto mere wa i dan polo.’

15Pud imoko i yo macon

ma jo maracu yam gubedo kalubune?

16Ceng kiceyogi woko ma peya karegi oromo,

gutine lalele omolo woko.

17Ceng guwaco bot Lubanga ni, ‘A woko ki botwa,’

dok ni, ‘Gin ango ma Won Twer Ducu twero timo ikomwa?’

18Kun en aye mayam opongo odigi ki jami mabeco.

An adag tam pa jo maracu!

19Jo ma kitgi atir gineno ki yomcwiny ka kipwodo jo maracu,

jo ma pe ki bal ginyero anyera,

20kun giwaco ni, ‘Lukworwa dong kityekogi,

jamigi ma odong mac dong owango woko.’

21Roc wat ikin in ki Lubanga, ci ibibedo ki kuc;

en aye bimiyo gin maber bino boti.

22Jol pwony ma a ki idoge,

ci iket loke i cwinyi.

23Dwog bot Won Twer Ducu, ci ibed mwol,

bol tim ma pe atir woko ducu ma kitimo i paconi.

24Ka itero jabuni calo apwa,

dok ka itero jabuni me Opir macalo gweng me laora kulu,

25ci ka i iweko Won Twer Ducu aye obedo jabuni,

ki ryal ma pire tek boti,

26ka itimo kitmeno ci cwinyi bibedo yom pi Won Twer Ducu,

ci ibicito inyime labongo lewic mo.

27Ibilego en, ci en biwinyo legani,

ci ibicobo kwongi bote.

28Gin ducu ma itamo bicobe maber,

ci nyimi bibedo leng.

29Pien Lubanga dwoko luwake piny,

ento en laro jo mamwol.

30En laro dano ma pe tiyo gin marac,

Lubanga bilare pi tiyo gin maber.”