Yubu 23

Lok ma Yubu dok ogamo

1Yubu ogamo kun waco ni:

2“Tin bene aloko ma iya kec;

kadi bed atye kacur, ento cinge mede ki nura.

3Kono ceng angeyo kama atwero nonge iye,

kono ao wa i kabedone!

4Kono ayeko loka inyime wek ongol,

onongo acano lok koma kore ki kore.

5Kono onongo angeyo gin ma en bigama,

kono aniang gin ma en biwaco bota.

6Onongo en mono bipyem kweda ki twerone maditi?

Pe kumeno; kono en oketo cwinye kawinyo an.

7Dano ma kite atir twero pyem kwede ki kunu,

ci onongo en bitucu ni bal mo peke ikoma.

8Nen ayenye, acito anyim, ento en pe tye kunu;

adok cen, ento pe anonge.

9Ayenye tung kumalo, ento pe amedo ki nene,

ayenye tung kupiny, pe anene bene.

10Ento Lubanga ngeyo yo ducu ma acito iye;

ka en otema, ci abikati macalo jabu maleng.

11Abedo kalubu kore kikome,

pe angak kamukene.

12Pe adok cen aweko lubu cik ma en ociko;

lok ma en owaco akano i cwinya macalo lonyona.

13Ento en pe loke, anga matwero pyem kwede?

En tiyo gire gin ma iye mito.

14Pimeno en bicobo gin ma en oyubu pira,

ki lwak lok macalo meno ma en tye kwede i cwinye.

15Pieno koma onyo koyo inyime;

ka atamo pi jami magi ducu miyo abedo ki lworo.

16Lubanga otyeko kelo lworo woko icwinya.

Won Twer Ducu otyeko miyo koma onyo koyo.

17Lubanga ouma woko ki colpiny

ento an adag ling aling.