Yubu 24

Yubu omede ki lagam ma mere

1Pingo Won Twer Ducu pe oketo kare me ngolo kop?

Pingo jo ma gingeyo en pe gineno ninone?

2Dano gidiro kidi me wangco lobo pi medo ngomgi,

gimayo lee pa jo mukene, ci gikwayogi calo meggi.

3Gikwanyo kana pa lutino kic,

ki gikwanyo twon pa dato nio ka otyeko culu banya.

4Gicoro lucan gidirogi cen ki i yoo;

ci lucan ma i lobo giringo gikane woko liweng.

5Pimeno, lucan giwoto macalo kana me tim ka gicito kacane ki tic matek;

giyenyo camgi ki i tim ata,

wek obed kwon pa lutinogi.

6Gigwero obot cam ma i poto ma pe meggi,

gibeko nyig olok ki i poti pa jo maracu.

7I dyewor gibutu nono labongo gium,

gin mo peke me gwokogi ki i ngico piny.

8Kot ma a ki iwi got pwodogi,

gipade ikom pata got pien kagwokegi peke.

9Jo maracu gimayo lutino kic ki i kor mon, wek gubed opiigi,

gitero lutino pi den.

10Ento lucan giwire nono, labongo ginaruka;

giyeyo ngano ma kikayo, kun gitye ki kec.

11Gibiyo moo jeituni i poti pa jo maracu,

gibiyo nyig olok bwino ki laa doggi nono.

12Lucan ma gito ki i taun madito gikok matek,

ki jo ma olimo ret gikok ki cwinygi ducu,

ento Lubanga pe paro pi legagi.

13Tye jo mogo ma igi dag dero;

pe gungiyo tic kwede,

pe gimaro lubu yone.

14Lanek a kwarpiny

me neko lacan ki dano ma piny oloyo;

ki i dyewor en doko lakwo.

15Lakwele bene kuru piny ma ribiribi,

kun waco ni, ‘Ngat mo pe ma nena’; ci kano wange woko.

16Ka piny col gituru odi;

ka dyeceng ci gicego wigi i ot; pe gimaro dero piny.

17Pien ka piny col, meno aye rupiny ki tung botgi;

piny macol ma dano lworoni en aye laremgi.”

[Jopar]

18“Ento jo maracu aye pii ma opong mologi woko oyotoyot;

ki lobo ma meggi bene Lubanga oceno woko;

dok pe lapakaca mo yenyo tic i poto olokgi.

19Kit macalo pee mee woko pi lyeto me ceng,

kitmeno bene lubalo girweny matwal i lyel.

20Wa megigi wigi biwil ikomgi;

wa kwidi bene binongo ni gimit,

ngat mo ma bipo pirgi dong peke;

kumeno lutim maracu gibitur calo yat.

21Giunu mon ma lulur ma lutinogi peke,

pe bene gikonyo mon to.

22Ento Lubanga aye ki tekone tyeko jo matego;

kadi bed gua malo, ci en pud dwokogi piny.

23En weko gicung kun gitamo ni gitye maber,

ento en bedo kangiyo gin ducu ma gitimo.

24Giile malo pi kare manok, lacen girwenyo woko,

macalo doo ma ner ci two woko,

nyo macalo wit ngano ma kimworo woko.

25Ka pe kumeno, anga matwero nyutu ni an lagoba?

Anga ma waco ni lok ma awaconi pe kakare?”