Yubu 8

Bildad ocuku cwiny Yubu me ngut

1Bildad Lacua ogamo dog Yubu kun waco ni,

2“Lok magi ibiloko nio wa awene,

kun loki winye calo yamo madit ma kodo matek?

3Itamoni Lubanga pe ngolo kop atir?

Itamoni Won Twer Ducu timo gin ma pe kakare?

4Nen, lutinoni gwok gubedo katimo bal ikome,

ma oweko en omiyo can opoto ikomgi ma oporo balgi.

5Ka ibiyenyo Lubanga,

kun ibako dogi bot Won Twer Ducu,

6ka ii leng ma cwinyi atir, adada ci Lubanga bikonyi,

bidwoko jamini ducu kakare pi kiti ma atir.

7Kadi bed yam i acaki ibedo ki jami manok,

ento i agiki me kwoni ibibedo ki lim mabup.

8Pieno alegi, peny kwariwa macon,

ci itam gin ango mayam kwarigi gubedo kayenyo ci gupwonye iye;

9pien wan wabedo jo ma laworo keken,

pe wangeyo gin mo, ninowa me bedo i lobo loke calo tipu yat.

10Dong iwiny pwony pa ludongo,

ki lok ma gipwonyo pi ngecgi matut.

11Itamoni togo twero dongo kama dogkulu pe iye?

Opiro1 twero dongo kama pii peke iye?

12Ka pud gilot alota, ma peya kitongogi,

giner woko oyot makato ginapita ducu ka gitye kama pii peke iye.

13Meno aye yo pa jo ducu ma wigi wil woko ikom Lubanga;

ki gen pa dano ma pe lworo Lubanga bitum.

14Gin ma en geno rom ki uci ma cod woko oyotoyot,

nyo rom ki obwo oboropyen.

15En jenge ikom jamine, ento jamine pe konye;

en keto gene ikom jamine, ma pe cung mateki.

16En rom ki doo ma lot matek ka ceng pe ryeny,

ma jange lak, rumu poto woko.

17Lwite odwale ikom odur gweng, ci mako liking.

18Ka kiputu woko ki kakare,

kabedone bikwere woko, kun waco ni,

‘An yam peya aneni,’

19Ada doo mukene twi i ngom leyo kakare cut.

Meno aye yomcwiny pa dano ma pe lworo Lubanga.

20Nen, Lubanga pe bikwero dano ma peke ki bal;

dok en pe miyo kony bot jo maracu.

21En pud bimiyo dogi pong ki nyero,

miyo ibidongo oduru me yomcwiny.

22Lewic bimako jo ma dagi,

ki kema pa lutim maracu pe dok binen.”