Yubu 7

1Kwo me lobo man tek calo tic matek pa lumony;

dano tyeko karene macalo lapakaca.

2En cal ki opii ma paro bedo i tipu,

rom ki lapakaca ma kuru gamo mucarane.

3Kumeno an bene kimiya lwak dwe mapol labongo gin atima mo,

dyewor ki dyewor kela cwercwiny keken.

4Ka abutu piny apenyo ni, ‘Abia malo awene?’

Ento dyewor rii nakanaka,

kun abedo kapwode apwoda nio wa okokgweno.

5Kwidi ki cilo ma odile kacel oboyo koma woko,

del koma orobo woko ci dok cwer tut.

6Nino acel acel kato madwir makato yat cweyo bongo,

ci tum woko kun weka labongo gen mo.

7Lubanga, po ni kwona rom ki aluu ma mwa;

wanga pe dok bineno gin maber wa ki acel.

8Ngat ma wange dong onena pe binena doki;

ibiciko wangi pi nena, ci inongo ni an dong apeke.

9Macalo pol ket ci pe dok nen,

kitmeno ngat ma oto cito piny i lyel pe dong dwogo cen.

10En pe dok i ode doki,

kadi wa jo ma gingeye pe dong gipo pire.

11Kumeno pe dok abijuku doga.

Awinyo arem i cwinya, ci myero aloki;

myero akok ki nguru, pien iya kec.

12An abedo Nam bo, nyo Min Kulu,

ma omiyo iketo lakurpiny me kura?

13Ka awaco ni, ‘Kabutuna bikweyo cwinya,’

nyo ni, ‘Arem koma bikwe ka abutu piny,’

14ento in iryango koma ki lwak lek ma bino iwiya,

imiyo lworo maka matek pi gin ma aneno dyewor i wang lek,

15man omiyo cwinya mito ni twora dong kideya woko!

Twora ma ato loyo me bedo ki arem man.

16Adag bedo kit man; pe amito kwo nakanaka.

In iwek abedi, pien nino me kwona odong manok mo keken. 171

Dano obedo gin ango, ma omiyo pire bedo tek botini?

Pingo iketo cwinyi ikome kuman?

18Ibedo kalime odiko ki odiko, kun iteme teretere.

19Ibibedo kanena pi kare marom mene,

ma pe iloko wangi ineno cen kamukeneni?

Pe kong iweka kare manok mo ma roma mwonyo laa keken?

20Ka abalo, ci atimo gin ango ikomi, in ma ipiro wangi kaneno gin ma dano ducu tiyoni?

Pingo ibaya ki tongi kare ducu,

macalo dano ma pwonyo lweny?

Pingo adoko calo yec mapek boti?

21Pingo pe itima kica pi roca?

Dok pe ijwayo bala woko pingo?

Pien koni dong kibiyika ilyel; ci ibiyenya ento pe ibinonga.”