Yubu 6

Yubu ojuku luwote

1Yubu odok iye kun waco ni,

2“Kono ceng kipimo cwercwinya,

kono kiporo i mijan kit can ma opoto ikoma!

3Pien kono obedo pek makato kweyo dog nam;

en gin ma omiyo ceng aloko lok atata.

4Atero pa Wontwer ducu dong otucu koma,

kwirgi tye kanya kaducu ikoma;

Lubanga dong okelo ikoma kit tice ducu makelo lworo.

5Itamoni kana me tim kok ka en tye ki lum idoge?

Dok itamoni twon dyang kok ka kiketo came inyime?

6Itamoni gin mabot twero came labongo kado?

Dok itamoni pig otigo lwaka bile mamit labongo kado?

7Iya pe mito wa bilone;

gin calo cam ma lemo cwinya.

8Ka nene Lubanga omiya gin ma alego bote,

ka nene omiya gin ma cwinya mito.

9Dok kono Lubanga oneka woko cut;

kono oweko cinge otiyo tice me neka woko.

10Ka kono otimo kumeno, kono cwinya okwe;

kono apye ki yomcwiny,

kadi bed arem me koma dwong ma pe wace;

pien onongo yam pe akwero lok ma Ngat Maleng owaco.

11Atye ki teko ango ma miya pud abedo kwo?

Agiki me kwona bibedo ningning wek adii cwinya?

12Tekona rom ki teko me got mono?

Ringo koma rom ki mola ce?

13I ada pe atye ki kero me konye pira kena,

jami ducu ma konya dong kikwanyo woko ki bota.

14Ngat ma pe timo kica ki lawote ikare ma kit man,

nongo dong oweko lworo Lubanga woko.

15Luwota bwola macalo ora kulu ma opong,

ma piine mol woko, ci two woko oyot.

16Piine col pien orube ki daba,

daba ma mol a ki iwi got malo.

17Ikare me oro piine rwenyo woko,

ka piny odoko lyet ci pe dok nen.

18Luwot weko yoogi, ci giwire ata i dye tim pi yenyo pii,

gicoro dye tim, ci gito woko i dye aroo.

19Luwot ma gua ki i Tema guciko wanggi me neno lakit kulu meno,

jo ma gua ki i Ceba gumoko gen gi ikome.

20Gubedo ki gen madwong ento gen gi obale nono,

ka guo kunu, ci lewic omakogi.

21Wun ki tung bota wurom ki laora kulu meno;

wuneno can ma opoto ikoma, ci lworo omakowu cut.

22Onongo yam alego gin mo ki tung botwu?

Yam kong onongo awaco botwu ni wumii limwu me wilo ngat mo me konya?

23Nyo awaco ni wulara ki i cing lakwora?

Nyo ni wukoka ki i cing jo ma gitye kauna?

24Ber wupwonya, ci abiling woko litik;

wunyuta bal ma apoto iye.

25Lok matye atir donyo i cwiny dano!

Ento gin ango ma omiyo wujuka?

26Wun wutamo ni wutwero juku loka woko,

pien wutamo ni loka obedo calo yamo nono.

27Onongo bene wutwero bolo kwir ikom lutino kic,

nyo wutwero laro wel ikom luremwu wek gudok gin acata pi lim.

28Ento koni wutim ber, wunen wanga,

pien pe abiloko lok goba ki inyimwu.

29Wuwek dong meno obed ba,

wuwek ngolo kop ikoma ma pe atir.

Wulok tamwu, pien kop pe twero loya.

30Pud wutamo ni aloko lok goba?

Wutamo ni an pe aromo poko gin maber ki gin marac?