Yubu 5

1Yubu lwong lwongo kombedi ci i nen ka ngat mo bidoki iye.

Ibiloke bot lamalaika mo bo wek okonyi?

2Atika, cwercwiny miyo laming to,

dok nyeko neko dano ma tame nok.

3Atyeko neno laming ma olony matek,

ento oyotoyot kiceno kabedone woko.

4Kakane peke pi lutinone;

kidiyogi woko i dog gang,

ma nongo ngat ma larogi dong peke.

5Cam ma en okayo,

dano ma kec nekogi gicamo,

kun gikwanyo wa ikin okutu;

pi mitigi madwong gilaro lonyone alara.

6Pien can pe a ki i apwa,

ki ayelayela bene pe twi ki i ngom.

7Wan dano kinywalowa i can,

kit macalo mac kir cito malo.

8Kono nene an aye in, kono ayenyo kony ki bot Lubanga.

Ci onongo aketo loka i cinge.

9En tiyo tic madito ma tere pe tate,

tice me aura ma welgi pe kwane.

10En miyo kot cwer iwi lobo,

dok cwalo pii i olet.

11En keto jo matye piny i kabedo mamalo,

tingo jo ma kumu, cibogi malo kama ber. 121

En balo tam pa luryeko me goba,

wek pe gucob ticgi kakare.

13En mako lungol ryeko i ryekogi ken gi, macalo owic,

ci yub pa jo ma tamgi ogom bale woko oyot.

14Gin donyo i colpiny i dyeceng,

gipange apanga i cwiny dyeceng macalo i dyewor.

15Ento en laro jo ma piny obwoyogi,

ki i lok dog jo maracu

ci kwanyogi woko ki i cing jo matego.

16Lubanga miyo lucan gibedo ki gen,

ki jo maracu kimiyo doggi woko. 172

Tye ki yomcwiny, dano ma Lubanga juku;

pimeno pe ikwer pwony pa Won Twer Ducu. 183

Kadi bed Lubanga miyo ret,

en bene tweyo wang bur. En goyo dano, ci cango woko bene.

19En bilari ikom ayelayela abicel,

kadi wa i me abirone bene gin marac mo pe bigudi.

20Ikare me kec en pe biweki i to,

ki i mony en bilari miyo pe kineki.

21En bikani ki i leb me anywar,

pe ibilworo layak ka obino.

22Ikare me kec cam ki tim gerogero ibinyero anyera,

dok pe ibilworo lee tim.

23Pien potini bibedo labongo gweng mo iye,

ki lee tim mo pe bimaki.

24Ibingeyo ni kemani tye maber,

ka ibingiyo dwoli, ci ibinongo romini ducu tye kakare.

25Ibibedo ki likwayu mapol,

lutinoni ma inywalo bibedo madwong calo lum ma i tim.

26Ibito ma dong itii maber,

macalo ngano ma kitero i laro kadinone ka karene oromo.

27Nen, watyeko yenyo telok man ci wanongo ni tye me ada.

Winy, ci wek bene okonyi.”