Yubu 4

Erifaji ojuku Yubu

1Erifaji Lateman ogamo doge ni,

2“Ka ngat mo otemo lok kwedi, ibijul?

Ento anga matwero juke wek owek lok?

3Nen, in ibedo kapwonyo jo mapol,

ki ibedo kakonyo jo ma lukonygi peke.

4Dano ma oyoke mito poto woko ki i niyene, in yam icuku cwinye ki loki,

kun ibedo kacuku cwiny dano ma ool wek obed matek.

5Ento kombedi can dong obino ikomi, ci pe idiyo cwinyi;

ogudi, ci dong ibange woko.

6Lworoni ikom Lubanga pe kwanyo par woko ki i cwinyi mono?

Cwinyi ma lengi pe miyo in ibedo ki gen?

7Kong itam mono, anga ma peke ki bal mayam oto?

Jo ma cwinygi leng kinekogi ki kakwene?

8Macalo atyeko nenone, dano ma gipuru bal,

kun gicoyo ayelayela macalo kodi,

gin aye gikayo bene kit gin acelu.

9Gito ki yamo yweyo pa Lubanga,

aluu dog Lubanga mamwoc kinigane tyekogi woko.

10Jo ma kitgi racu gibwaro calo labwor,

ento Lubanga miyo dwon gi ling woko ci turu lakgi woko.

11Macalo labwor matek ma to, pien gin ma en dwaro dong peke,

kitmeno gin bene bito ci lutinogi biket woko ata.

12Yam kikelo lok bota i mung,

ita owinyo ka kikwilo akwila. 131

Man obino iwiya macalo lek ma yelo dano i dyewor,

i cawa ma dano nino matek.

14Lworo madwong obino ikoma, ki myelkom,

omiyo cogona ducu oyenge.

15Yamo mo manok okodo i wanga, ci yer koma ducu oa.

16Lacen ocung mot,

ento pe apoko kit manen kwede.

Cal gin mo onongo tye inyima,

piny oling woko litik;

lacen awinyo dwon ma waco ni,

17‘Tika dano ma to wokoni bedo ma kite atir inyim Lubanga?

Dano twero bedo ma olonye inyim Lacwece?

18Ka Lubanga pe geno kadi wa lutice ma i polo,

kadi wa lumalaikane bene en nongo bal ikomgi,

19ci dong dano kono ma kome tye loboni,

ma gutine aye kweyo,

ma kinyotogi macalo nyenye,

gibedo ningning?

20Gitwero bedo kwo odiko ento otyeno gito woko,

girwenyo matwal kun ngat ma paro pirgi peke.

21Gito woko oyot, ma peya gunongo ryeko,

macalo kema poto ka gigonyo tole.’