Yubu 3

Yubu obedo ki nguru bot Lubanga

11

Olo twal Yubu ongamo doge, oceno nino mayam kinywale iye.

Yubu

2Yubu owaco ni,

3“Wek nino mayam kinywala iye ki cen woko matwal,

ki wor mayam maa ogama i ic

bene ki cen woko.

4Wek nino meno obed macol!

Lubanga matye malo pe otam pire,

lengpiny mo bene pe omeny nino meno.

5Wek mutu ki piny ma ocido licuc aye ogam.

Wek pol obed iwiye,

cido piny me dyeceng bene omiye lworo.

6Wek piny ma ocido licuc omak wor meno,

wek kijwar wor meno woko ki ikin nino me mwaka,

wek pe bene kikwan ikin nino dwe.

7Eyo, wek wor meno obed lalur,

dwon dange me yomcwiny pe owinye iye.

8Wek jo ma giceno nino gucen nino meno,

gin jo ma gitwero lwongo Min Kulu.

9Wek lakalatwe me kwarpiny gudok col,

wek okur lengpiny ento pe onong,

wek pe bene onen wang ceng me odiko;

10pien wor meno pe oloro ot nyodo pa maa woko,

omiyo alimo ayelayela man.

11Pingo pe ato woko ikare me nywala?

Pingo kwona pe otum cut ka aa ki i ic?

12Pingo yam maa otinga i eme?

Pingo tunune ogama, wek adote?

13Onongo kono ceng abutu piny mot lilwe,

kono anino, dok kono onongo atye kayweyo,

14kacel ki luker ki luryeko me lobo,

mayam guroco odi me gang ker ma gudong iwi odur,

15nyo ki rwodi mayam gitye ki lonyo,

ma gupongo odigi ki lim.

16Pingo yam pe abedo macalo latin abwoga ma kikano,

macalo latin ma pe oneno dero ceng?

17Ki i bur lyel kunu jo maracu pe dong gikelo ayela,

ki kunu jo ma guol gitye kayweyo.

18Kunu mabuc gibedo mot kacel,

ma pe dong giwinyo dwon ladit tic mo.

19Jo matino ki ludito gitye kunu,

opii nongo kigonyogi woko ki i twer pa rwotgi.

20Pingo kimiyo lengpiny bot ngat matye ki can,

pingo kimiyo kwo bot jo ma cwinygi kec? 212

Giparo pi to, ento to pe bino,

giyenyo pire makato pi lim mukane ducu.

22Jo meno cwinygi pe kwe,

cwinygi bibedo yom ka kiyikogi i lyel.

23Pingo kimiyo dero bot dano ma pe neno wangayo,

ma Lubanga orume ki cel?

24Pien cura dong odoko calo kwon ma acamo,

dok bene pe atwero giko cur.

25Pien gin ma alworoni dong obino ikoma,

ki gin ma alworo ma okato kare dong opoto ikoma.

26Kuc mo peke bota, kadi wa yweyo bene peke;

pe atye ki kuc, ento ayelayela keken.”