Yubu 2

1Inino mo mukene ma lumalaika pa Lubanga dok gubino gucung inyim Rwot, ci Catan bene obino ikin gi kacungu inyim Rwot. 2Rwot dok openyo Catan ni, “In ia ki kwene?” Catan ogamo dog Rwot kun waco ni, “An aa kawire iwi lobo, ki kawot ikin piny i lobo.” 3Ci Rwot dok openyo Catan ni, “Itye katamo pi latica Yubu, ni pe tye ngat mo macalo en iwi lobo, dano ma peke ki bal mo, dano ma cwinye leng, ma lworo Lubanga, dok dag tim maracu? En pud ocung matek labongo bal mo, kadi bed ipiya ikome wek ityeke woko labongo tyen lok mo.” 4Catan ogamo dog Rwot kun waco ni, “Del pi del! Gin ducu ma dano tye kwede en bimiyo pi kwone. 5Ento tek iketo cingi ikome, iwano cogone ki ringo kome, ci en yeti cut ki inyimi.” 6Ci Rwot owaco bot Catan ni, “Nen, en dong tye itweroni; ento myero igwok kwone keken.”

7Kumeno Catan oa ocito woko ki inyim Rwot, ocako yelo Yubu ki bur maracu ma oonyo cake ki i dye tyene nio kwede wa i cwiny wiye. 8Ci en okwanyo labalatek me cwero kome, ka ocito obedo iwi odur i buru. 9Ma omiyo dakone owace ni, “Pud ibicung matek ma pe ibalo bal mo? Yet Lubanga, wek ito woko.”

10Ento Yubu ogamo dog dakone ni, “In aye iloko lok macalo mon maming ma pe gingeyo Lubanga. Wabigamo gin maber ki i cing Lubanga, ci pe wagamo gin marac?” I can magi ducu Yubu pe obalo ki doge.

Lurem Yubu gubino bote

11Ka lurem Yubu adek guwinyo pi gin maracu magi ducu ma obino ikome gubino kun ngat man a ki i kabedone, Erifaji Lateman, Bildad Lacua ki Jopar Lanaamat. Kumeno gurwate kacel wek gunyut cwercwinygi bot Yubu ki me kweyo cwinye bene. 12Ka guilo wanggi ma pud gitye kamabor, ci pe guniang maber ka dano ma ginenoni aye Yubu. Ento ka guniang ikome, ci gucako koko ki dwon malongo, guyeco wa jorgi ki bene gujuku wigi ki ngom. 13Lacen gubedo piny i ngom gurii bote nino abiro dyeceng ki dyewor, ngat mo ma oloko kwede obedo peke, pien guneno ni arem ma ikome onongo dit mada.