Yubu 1

Catan otemo Yubu

1Yam tye dano mo i lobo Uj ma nyinge Yubu. Dano man onongo peke ki bal mo, dok dano ma cwinye leng ma lworo Lubanga, dok dag tim marac. 2En onywalo awobe abiro ki anyira adek. 3Lim mayam tye bote obedo romi alip abiro, kinaga alip adek, twoni pur alip acel, megi kana miya abic. En onongo tye ki lutice mapol adada; ma oweko en obedo dano madit makato jo ducu matye tung kunyango.

4Awobe pa Yubu yam gimaro cito kacamo karama i ot pa ngat acel acel i ninone; ci gicwalo kwena gilwongo nyimegigi adeki kacam ki kamat kwedgi. 5Ka kare me karamagi otum, ci Yubu yam cwalo kwena, lwongogi ci lonyogi. En yam a malo odiko con, ci tyero gitum awanga ma oporo welgi ducu, pien Yubu onongo tamo ni, gwok onyo awobene gubalo nyo guyeto Lubanga ki i cwinygi. En yam timo kitmeno kare ki kare. 61

Inino mo acel ma lumalaika pa Lubanga gubino gucung inyim Rwot, ci Catan bene obino ikin gi. 7Rwot openyo Catan ni, “In ia ki kwene?” Catan ogamo dog Rwot kun waco ni, “An aa kawire iwi lobo, ki kawot ikin piny i lobo.” 8Ci Rwot dok owaco bot Catan ni. “Itamo pi latica Yubu? Pe tye ngat mo macalo en iwi lobo, en dano ma peke ki bal mo, en dano ma cwinye atir, ma lworo Lubanga, dok dag tim maracu” 92Catan ogamo dog Rwot kun waco ni, “Itamo ni Yubu lwori nono? 10Pe in aye igwoke tungi ki tungi, kacel ki ode ki jami ducu ma en tye kwede? In imiyo gum ikom tic me cinge, ki lime bene onya omede i lobo. 11Ento tugi keto cingi cut, wek igud gin ducu ma en tye kwede, ci en tugi yeti ki inyimi cut” 12Ci Rwot owaco bot Catan ni, “Nen, gin ducu ma en tye kwede tye itweroni; kono nyo ikom en keken aye pe iket cingi.” Kumeno Catan oa ocito woko ki inyim Rwot.

Yubu orwenyo lonyone ki lutinone

13Inino mo acel, awobe ki anyira pa Yubu gubedo kacam ki kamato kongo bwino i ot pa omin gi madite; 14ci lakwena mo obino bot Yubu ma waco ni, “Ikare ma twoni gitye kapur, ki kana bene gicamo kangetgi, 15ci jo Ceba gupoto ikomgi, guyakogi, guneko lukwat woko ki pala lucwan: ci an kena aye abwot me bino ka titi.” 16Ma onongo en pud tye kalok, ngat mukene dok obino ma owaco ni, “Mac pa Lubanga oa ki i polo, ci owango romi ki lukwat, otyekogi woko ducu; ci an kena aye abwot me bino ka titi.”

17Ma onongo en pud tye kalok, ngat mukene dok obino ma owaco ni, “Jo Kaldaya gupoke i buca adek, ci guture ikom kinaga, guyakogi, ci guneko lukwat ki pala lucwan; ci an kena aye abwot me bino ka titi.”

18Ma en pud tye kalok, ngat mukene dok obino ma owaco ni, “Awobeni ki anyirani onongo gitye kacam ki kamato kongo bwino i ot pa omin gi madite, 19ci nen, yamo madit obino, ongole ki tung tim, oyoko twok ot angwen, ot opoto ikom lutino omiyo guto woko; ci an kena aye abwot me bino ka titi.”

20Yubu oa malo, oyeco jore, olyelo wiye, oryebe piny ingom, ci oworo Lubanga. 21Kun waco ni, “Yam abino nono nia ki i i maa, dok abidok bene nono. Rwot ceng omiyo, ci Rwot otyeko kwanyo gire; kipwo nying Rwot.”

22Ikom lok magi ducu, Yubu pe obalo, dok pe owaco ni Lubanga otime rac.