Yubu 42

Yubu ogamo dog Lubanga

1Yubu ogamo dog Rwot kun waco ni,

2“Angeyo ni itwero tiyo gin ducu;

dok yub ma meri weng pe kitwero gengone. 31

Ceng iwaco ni, ‘Meno anga mamito umu tama woko ni,

maloko labongo ngeyo gin moni?’

Ada, dong awaco lok ma pe aniang tere,

aloko ikom gin me aura ma ngeyogi loya woko. 42

Ceng iwaco ni, ‘Winy lok ma aloko;

abipenyi ci myero igam doga.’

5Yam onongo awinyo piri awinya keken,

ento kombedi dong aneni ki wanga.

6Pimeno lewic maka ikom gin ma aloko,

ci dong angut ma abuke ki apwa ki buru.”

Lewic omako lurem Yubu

7Lacen ma Rwot dong otyeko lok ki Yubu, ci ocako waco bot Erifaji Lateman ni, “Kiniga omaka ikomi ki ikom luremi aryoni, pien pe wuloko lok me ada ikoma, kit ma ceng latica Yubu olokoni. 8Kombedi dong wukwany twoni dyangi abiro ki nyogi romi abiro, wucit kwede bot latica Yubu, wek wutyer me gitum awanga pirwu kenwu. Latica Yubu bilego pirwu, ci an abigamo legane, pe abiketo lewic ikomwu ma oporo lokwu; pien pe wuloko lok me ada ikoma kit macalo latica Yubu olokoni.”

9Kumeno Erifaji Lateman, Bildad Lacua ki Jopar Lanaamat gucito, gutiyo kit ma onongo Rwot ocikogi kwede; ci Rwot ogamo lega pa Yubu.

Lubanga odwoko gum pa Yubu

103

Rwot odwoko gum pa Yubu, ikare ma en dong olego pi lureme; omiyo bote lim ma wele ododo mayam en tye kwede tyen aryo. 11Kumeno omegine ki lumegine ki jo mayam ngeye wacon, gubino ci gucamo cam kwede i ode. Gunyutu cwercwinygi bote, gukweyo cwinye pi gin marac ducu mayam Rwot okelo ikome. Dano acel acel ikin gi omiye dul lim ki agit jabu. 12Rwot omiyo gum ki Yubu i agiki me kwone makato i acakine. En obedo ki romi alip apar wiye angwen, kinaga alip abicel, twoni pur alip aryo, ki megi kana alip acel. 13En obedo bene ki awobe abiro ki anyira adek. 14En ocako nying nyako mukwongone ni Yemima, nying me aryone Kejia, ki nying me adeke Keren-apuk. 15Iwi lobo ducu pe onongo tye iye mon mayam gimunya calo anyira pa Yubu. Won gi opoko botgi ginaleya ki ikin omegigi. 16Lacen inge lok meno ducu Yubu orii i lobo dok mwaka miya acel ki pyere angwen, ci oneno awobene ki lutino pa awobene, wa i yalwak me angwen kulu. 17Ci Yubu oto ma otii nikongkong.