Yubu 41

11

Itamoni itwero ywayo Min Kulu ki goli?

Itwero tweyo lebe ki tol?

2Itamoni itwero rwako tol ogwil i ume,

nyo tucu cwake ki goli?

3Itamoni en bibako doge boti ni iweke,

onyo bilok kwedi ki mwolo?

4Itamoni Min Kulu twero cike kwedi

wek ebed opiini matwal?

5Itamoni ibituku kwede calo winyo,

onyo ibitweyo tyene ki tol wek obed me galo wang anyirani?

6Itamoni lumak rec bilaro wel me wilone,

onyo lucatwil bipokone ikin gi me acata?

7Itamoni ibicobo ki dim mabit maromo kome ducu,

onyo ibicobo wiye ki atero mabit me lacob rec?

8Tem gudu kome ki cingi, ci pe ibinwoyo;

wii pe biwil ikit ma en lwenyo kwede.

9Ngat ma tamo ni etwero loyo Min Kulu nongo bwole abwola kene;

ka tek onene keken, ci bipoto woko piny.

10Ka kituge, ger ma okato kare;

ci anga maromo cung inyime?

11Anga matwero tugu lweny ikome, ci bwot?

Pe tye ngat mo iwi loboni.

12Wek kong atiti lok ikom tyen Min kulu,

ki tekone madwong,

ki kit ma dul kome ducu kikubugi kacel maber mada.

13Anga matwero lunyu ginarukane?

Anga matwero tucu kotine me gwoko kome?

14Anga matwero yabo doge?

Lake ma guryeyo idoge kelo lworo mada.

15Dye ngeye kiumu ki kwot ma kiryeyogi i tyeng,

ocule cokcok calo kimwono amwona.

16Gukube cokcok kacel,

ma yamo pe twero kato ki ikin gi.

17Guribe kacel ma ngat man omoko ikom lawote,

ma gumoko woko liking,

ma pe kitwero poko kin gi.

18Ka ojiro, piine mil maryeny aryenya calo ceng

wange kwar calo ceng matye katuc.

19Ineno calo leb mac raa tye kaa ki idoge,

ma kir kati woko.

20Yito duny ki i ume

calo pii matye kayenyu ki i agulu,

nyo macalo togo matye kawang.

21Yweyo me ume miyo mac lyel,

dok lebmac lyel kato ki idoge.

22Ngute tek tutwal,

ma ka ngat mo orwate kwede ci bedo ki lworo madwong.

23Dul kome ojunge kacel, ojing woko matek likitiki,

tek calo nyonyo ma okube liking.

24Adunune tek calo got,

tek calo min kidi rego.

25Ka otinge malo, oteka ducu gilworo;

cwinygi doko nyap, tipu komgi to woko lirut.

26Kadi ka dano ocobo ki pala lucwan, pe donyo,

kadi tong, atero, onyo dim mabit pe wano.

27Ki tung bote nyonyo obedo reng kal,

mola kono mere rom ki yat ma otop.

28Atero pe twero miyo en ringo;

ki tung bote lagweng ma kibaye kwede rom ki lum ma otwo.

29Odoo koo en lwongo ni tyen gaya;

ka kibaye ki tong en nyero mere anyera.

30Tung piny iye cal ki labalatek ma lake bit;

ka en woto ci goro daba madyak agora.

31En miyo kut yenyo calo pii malyet matye kayenyu ayenya;

nam yenyo bwoyo calo bwoyo moo wir ma kitedo ki agulu.

32Ka tye kakwang, ci kore ryeny woko matar,

miyo kut kwor woko matar calo lwar wic.

33Pe tye gin mo marom kwede iwi lobo,

en aye gin ma kicweyo ma pe tye ki lworo wa ki acel.

34En cayo lee ducu, ma wake;

en rwot pa lee ducu mawake.”