Yubu 40

1Rwot openyo Yubu ni,

2“Itamoni lakwed te bal twero pido ki Won Twer Ducu?

In ma ipyem ki Lubanga, gam lok man.”

Lagam pa Yubu bot Lubanga

3Ci Yubu ogamo dog Lubanga kun waco ni,

4“Nen ba, an pe a gin mo adada, ci abigamo loki ningning?

Pe dong abingamo doga kalok.

5Dong aloko tyen acel keken, pe dong abidok iye;

eyo, aloko dong tyen aryo, ci pe dok abimede.”

Lok ma Lubanga ogamo ki Yubu

6Rwot dok ogamo dog Yubu kun loko ki i yamo lapiru ni,

7“Kong iyube, icung matek calo laco;

abipenyi, ci in ibigama.

8Itye kanyutu ni bal tye ikoma ce?

Imito ni lok oloya wek loki aye obed ma atir?

9Itamoni in itye ki tek marom ki mega?

Dwoni mor winye malongo calo mega?

10Ka kitmeno, a malo iruke ki diti dok ki deyoni,

ka wek tweroni ki woro ma kimiyi onen kamaleng.

11Wek kinigani madwongi okati woko;

wek omol ikom jo ma gin luwake ci okwe awakagi woko.

12Nen lyeregi ci idwokgi woko piny,

dok inyon jo maracu woko piny kama gucung iye.

13Yikgi woko ducu piny i ngom,

um wanggi woko i lyel.

14Ka iromo timo kitmeno ci an abiye

ni iromo lare keni ki tekki.

15Nen Raa mono, lee madit mada;

ma an aye acweyo en macalo acweyo in,

en camo lum calo twon dyang.

16Ento tekone tye i pyere,

ki i ler iye manwang.

17Yibe ocung matek liking macalo yat kijing,

ler eme okube kacel.

18Cogone tek calo paipo mola,

tyene calo rii nyonyo.

19En tye ginaura madit mada ki ikin gin acweyana;

ngat ma ocweyeni keken aye romo tingo pala lucwan ikome.

20Lum ma en camo dongo wa iwi godi

kama lee tim ducu gituku iye.

21En butu ite okutu ma i dog kulu,

ci kane ikin lagada ma i dago.

22Okutu ma i dog kulu giume ki tipugi,

yat oget ma inget kulu girume woko dyere.

23Kadi bed kulu opong ma mol matek, en pe lworo;

dok kadi bed pii ma i kulu Jordan core idoge,

en pud bedo ma cwinye opye.

24Itamoni ngat mo twero make ki goli,

onyo twero tucu ume ki tong twok?