Yubu 39

1Itamoni in ingeyo kare me nywal pa dyegi ma gibedo iwi godi?

Yam ineno ka til nywalo lutinogi?

2Itamoni in ingeyo kwano wel dwe me durugi,

wek inge kare ma gibinywal iye.

3Itamoni in ingeyo cawa ma giture kwede piny pi nywal kun gicole,

ci ginywalo lutinogi?

4Lutinogi dongo i bar ma komgi yot,

ci gicito gigi matwal ma pe dok gidwogo cen bot megigi.

5Anga ma oweko kana me tim lone ken gi?

Anga ma ogonyogi me cito kama igi mito?

6Atyeko miyogi aroo wek obed pacogi,

ki lobo ma obedo punu wek gubed iye.

7Pe gimito wo me taun madito,

pe tye ngat mo ma burugi ma weko gitiyo tic.

8Wi godi odoko oletgi ma gin wire iye ata,

kun giyenyo lum me acamagi.

9Itamoni jubi biye tic mo piri,

onyo bibutu i dwoli i dyewor?

10Itamoni in itwero tweyo jubi ikom kweri dyang wek opur potoni,

onyo ni en bilubi kun loko potoni ma i lung?

11Itamoni in ibigene ni pien tye ki teko madwong,

ci ibiweko en tiyo tici ducu?

12Igeno ni en bidwogo paco,

ci kelo nganoni ilaro me adina?

13Udu goyo bwome ki yomcwiny,

ento pe gitwero tuk calo winyo acebe ma lakicani.

14Udu weko tonge i ngom,

wek lyeto me kweyo aye omur komgi.

15Wiye wil woko, pe paro pi tonge,

pe paro ni lee tim mo twero nyonogi woko.

16En tiyo ki lutinone ki gero,

calo pe gubedo mere kikome,

en pe paro, kadi bed tonge bale nono;

17pien an Lubanga atwone ryeko woko,

pe amiye ryeko mo me niang.

18Ka inen ocako ngwec,

ci en nyero aguragura ki langwec kwede.

19Yubu in aye ma imiyo tekkom ki aguragura bo?

In aye ma imiyo yer maboco tye ingute?

20In aye ma imiyo pye calo bonyo?

Dok dange macalo won twer ci dano lworo?

21En nyono piny i lung ma wake awaka pi tek kome,

ci ringo anyim ki kero kome ducu pi rwate ki tongi pa lulweny.

22En peke ki lworo mo i cwinye;

pala lucwan bene pe miyo en loke dok cen.

23Juru atero pa langwec kwede yenge makok ni tak tak tak,

ma tongine wil calo mac.

24En ringo anyim oyot mada ki gero ki kiniga;

pe twero cung mot ka buriji okok.

25Teki buriji okok, en bene kok ki yomcwiny;

ngweyo ngwec lweny ki kamabor,

winyo dange pa lawi mony ki mwoc pa lulweny.

26Itamoni pi ryekoni aye omiyo olwit tuk malo,

ka yaro bwome kemo tung kupiny?

27In aye ma iciko ocur ni otuk malo

wek oger ode lamal iwi got?

28En bedo i pata got, dok butu kunu bene,

i kakanene matye i kor got ma ocule.

29En ngiyo came wa ki kunu,

wange neno piny i ngom ki kamabor. 301

Lutinone ginongo remo me acwiya;

dok bene kama kom gin ma oto nonge iye, en pe rwenyo ki iye.”