Yubu 38

Rwot Lubanga ogamo dog Yubu

1Rwot ogamo dog Yubu kun loko ki i yamo lapiru ni,

2“Meno anga ma mito umu tama woko

kun loko loke labongo ngec mo?

3Bed ma iyube macalo laco,

abipenyi ci in aye igam doga.

4Ikare ma acibo guti me te lobo onongo in mono itye kwene?

Tita, ka itye ki niang matut.

5Anga ma omoko kit ma bore ki lace bibedo kwede?

Anga ma oryeyo tol me pimone?

6Tedi tegutine kigurugi ikom gin ango?

Anga ma ocibo got me twoke kakare,

7ma onongo lakalatwe ducu me odiko giwero kacel,

ma lumalaika pa Lubanga ducu gidange ki yomcwiny? 81

Anga ma oketo kika me gengo nam,

ikare ma omwoc macalo pii me nyodo mamol?

9An aye amiyo pol oumu nam,

aume woko ki pol ma ocido woko licuc.

10Yam aketo wangco kama nam myero ogik iye,

aketo dogola ma kicego ki rii me gengone,

11kun awaco ni, ‘Ibio wa kany, ento pe ibikato,

biamwonyini ma iwake kwedeni bigik kany.’

12Yubu, ikare me kwoni ducu onongo yam in aye ma imiyo cik bot odiko,

kece onyo in aye ma inyutu ki rupiny kit me cako ninone?

13Onongo in aye ma ipwonyo rupiny bo me romo i lobo woko ducu,

wek jo maracu guring gucit kama gikane iye?

14Ka piny oru ci weko lobo loke woko, ci jami ducu cako nen kamaleng,

macalo lobo agulu ma lacwec diyo ajing2 ikome;

ci tyenge bene cako nen calo tyeng ma ibongo aruka ma nen ma ngwalangwala.

15Ci lengpiny pa jo maracu rwenyo woko ki botgi;

pe dong gitwero tingo badgi pi goyo dano.

16Yam kong onongo io wa iwang it me nam ce?

Yam kong onongo iwoto ki tyeni ite kut me nam wek irot ce?

17Yam kong onongo kinyutu boti dogola me to,

nyo ineno dogola me kabedo pa jo ma oto?

18In itamoni iniang kit ma piny lac kwede?

Waca meno ducu ka ingeyo.

19Yone tye kwene ma o i kabedo makelo dero,

ki mutu kono kabedone tye kwene?

20Itwero nyutu botgi kama myero gin gugik iye,

onyo itwero dwokogi cen i kabedogi?

21In myero inge, pien mwakani dong pol,

pien ikare ma kicweyo lobo onongo dong kityeko nywali!

22Yam idonyo i odi kama aketo iye pee mayom,

onyo kama akano iye pee matek calo gweng?

23Ma an agwokogi pi kare me ayelayela,

pi kare me lweny ki me mony?

24Yoo mene ma cito dok tung kama kipoko iye dero,

onyo kama yamo me kunyango kodo ki iye romo i lobo?

25Anga mayam obaro wang lalele pi kot macore matek tutwal,

anga ma oyubu yoo pi lutkot wek owok ki iye?

26Anga mamiyo kot cwer ata i lobo kama ngat mo peke iye,

i tim kama dano pe bedo iye?

27Anga ma cwalo kot cwer maromo i lobo matye aroo,

ci miyo lum twi dongo iye?

28Kot tye mono ki wone,

kece onyo toyo tye ki wone?

29Pee mine tye kwene,

anga ma min bwoyo pee ma opune i lobo, kun a ki i polo?

30Anga ma weko pii make doko matek macalo got,

ki pii ma i kut nam make woko liking? 313

Itamoni in itwero tweyo Yoggo ki nyor,

nyo tuku ogwil ma kitweyo ki Lyernyim?

32Itamoni in iromo nyutu ki oluma lakalatwe ma tung kumalo,

onyo matinone kitma myero gin guryeny kwede?

33Itamoni in ingeyo cik ma kiloyo kwede ki polo?

itwero tic ki cikgi me loyo wi lobo kany?

34Itamoni in itwero miyo dwoni winye wa i polo,

wek imii pii kot ocore, oumi woko?

35Itamoni in itwero cwalo lutkot wek owil, tungi ki tungi,

ma en waco boti ni, ‘An ene, ora’?

36Anga ma oketo ryeko tye i cwiny dano,

onyo anga ma omiyo ngec i adam pa dano,

37anga matwero kwano wel pol ki ryekone,

onyo twero lengo dan polo wek kot ocwer,

38ci miyo apwa doko daba,

ki ngom make kacel doko matek?

39Itamoni in itwero dwaro lee pi labwor,

ci imiyo lutinone giyeng ki cam,

40ma gukane i borogi,

onyo ma gubutu mot kun gikengo lee me amaka?

41Anga mamiyo cam bot agak,

ma nongo lutinone gikok bot Lubanga,

kun gimal ata pi nok pa cam?