Yubu 37

1Mor pa kot miyo cwinya poto,

ma adununa mito tinge woko ki i kabedone.

2Wuwiny mor me dwone

ki dange ma kati ki idoge.

3En cwalo mor kot ite polo ducu,

lutkote wil wa itwok lobo ducu.

4Lacen dwone cako mor;

mor winye malongo macalo dwon laker;

pe juku wil kot ikare ma dwone pud winye.

5Lubanga miyo dwone mor ikit me aura;

en tiyo jami madongo ma wan pe waromo niang iye.

6En ciko pee ni opot i ngom,

dok ciko kot wek ocore madwong tutwal.

7En juku dano pe tiyo tic mo,

wek jo ducu ma en ocweyo gunge tice.

8Ci lee tim ducu gidok i kakanegi,

gibedo mot i borogi.

9Lapiru a ki i ode,

ki yamo ma kodo a tung kupiny kelo koyo ma ngic.

10Yweyo pa Lubanga miyo pii make doko pee;

pii ma omare make ci doko tek.

11En weko pii doko pol;

ci lutkot wil meny ki i pol.

12Gibedo kawire tungi ki tungi kun Lubanga aye telogi,

pi cobo gin ducu ma en ocikogi kwede,

iwi lobo ducu kama dano bedo iye.

13Kine mogo Lubanga miyo kot cwer pi miyo pwod ki dano,

nyo pi konyo lobone, nyo pi nyutu mar mere ma pe loke.

14Winy lok man, in Yubu,

cung mot ka itam pi tic me aura ma Lubanga timo.

15Itamoni in ingeyo kit ma Lubanga miyo kwede cik,

ci miyo lutkot meny ki i pol?

16Itamoni in ingeyo kit ma pol ma mere lyere kwede?

Meno aye tic me aura mada,

pa ngat ma dirone dwong ma okato kare.

17In ngat ma iwinyo lyeto me bongini keken,

ka yamo ma a ki tung kupiny miyo jami ducu cung mot,

18in itamoni iromo yaro polo kit ma en otimoni,

ma imiyo bedo matek macalo mola?

19Pien wan pe watwero laro lok maber kwede;

pi kwiya piny ma watye kwede.

20Pe aromo penyo ni myero alok ki Lubanga;

pingo amito miye kare me tyeka woko?

21Kombedi dong pe tye ngat mo matwero ciko wange kaneno ceng,

kun tye karyeny maleng tutwal i polo,

ma yamo dong okodo, ci pol oware woko.

22Deyo ma mwunya nen kun tuc woko ki tung kumalo maryeny calo jabu;

Lubanga dong oruke ki deyone makelo lworo.

23Twero pa Won Twer Ducu, dit ma pe waromo o cok bote;

en tiyo i yo ma opore, dok ngolo kop atir,

time ducu tye atir ma pe unu dano mo.

24Pimeno dano lwore;

en pe paro pi jo ma gin tamo ni gin luryeko.”