Yubu 36

Eliu opako dit pa Lubanga

1Eliu omede ki loke kun waco ni,

2“Dii cwinyi manok, wek kong awaci,

lok ma dok ikom Lubanga.

3Atye ki ngec malac mada, ci abitic kwede,

pi nyutu ni tim pa Lubanga ma ocweya tye atir.

4Pien adada loka goba peke iye;

ngat matye kalok kwedini tye ki ngec ma oromo maber.

5Nen, Lubanga tye ki twero, dok pe cayo ngat mo;

tekone ocung ikom ryekone matut.

6En pe weko jo maracu bedo kwo nakanaka,

ento ngolo kop kakare pi jo ma kiunugi.

7En pe kwanyo wange woko ki ikom jo ma kitgi atir,

ento ketogi kaloc macalo luker,

ci gibedo ki dit nakanaka.

8Ento ka kitweyogi ki pingo,

ma ayelayela otweyogi macalo ogwil,

9ci en nyutu botgi gin ma gutimo,

ki tim aranyigi ki kit ma guwake kwede.

10En miyo giwinyo pwony ma mere,

ci cikogi ni guloke, guwek timo gin marac.

11Ka guwinyo doge ce gucako tiyo gin ma en mito,

ci gityeko kare me kwogi ducu ki yomcwiny kun gitye ki yomcwiny.

12Ento ka gukwero winye, ci kinekogi woko,

gito labongo niang tyenlok ma omiyo Lubanga okelo to ikomgi.

13Jo ma pe lworo Lubanga ki i cwinygi gibedo ki kiniga,

pe gikok bote pi kony ka en otweyogi.

14Gito ma pud gitino,

kwogi tum woko pi timgi me lewic.

15Ento Lubanga laro jo ma gineno can kun tiyo ki can gi me larogi,

en yabo wang dano ki can ma poto ikomgi.

16In Yubu, atamoni Lubanga mito kwanyo in woko ki i atwom,

me teri kama gin mo pe diyi iye,

dok en bipongo mejani jwijwi ki cam mabeco tutwal.

17Ento kombedi can ma kiketo ikom jo maracu opoto boti,

can ma kiketo pi ngolo kop ikomi dong omaki matek.

18Gwoke wek ngat mo pe oywa tami ki lonyo;

pe iwek lim mabup me cam cana olok tami omiyi ingak woko.

19Kokoni pi kony pe twero gengo aroma ma bino ikomi,

kadi wa teko me komi pe twero konyi.

20Pe imit ni dyewor obin;

meno aye kare ma rok mapol kibityekogi woko ki i kabedogi.

21Gwoke, pe iloke katimo bal,

pien Lubanga okelo can ikomi wek ojuki ki itimo bal.

22Nen, twer pa Lubanga dit tutwal;

anga matye lapwony marom kwede?

23Anga ma otyeko nyute gin ango ma myero en otim?

Anga matwero waco bot Lubanga ni, ‘In itimo rac’!

24Nino ducu wapake pi tice ma en tiyo,

pimeno in bene myero ipake.

25Jo ducu guneno gin ma en otimo,

ento kine mogo dano neno ki kamabor.

26Adada Lubanga dit, wan pe wangeye kwicikwici;

wel mwaka ma en orii kwede pe tate.

27Pien en miyo pii duny dok malo,

ci tono lupuune calo kot.

28Kot core piny ki i pol,

ci cwer ikom dano madwong atika.

29Tye ngat mo ma twero niang kit ma pol giyare kwede,

nyo kit ma kot mor kwede i kema pa Lubanga?

30En miyo lutkot wil tungi ki tungi,

ci menyo te nam woko.

31Kitmeno en pito jo me rok ducu,

kun miyogi cam madwong tutwal.

32En mako lutkot ki cinge,

ci ciko ni myero ocel kama kicimo.

33Mor me kot tito pi Lubanga,

ci dyangi gingeyo ni kot tye kabino.