Yubu 35

1Eliu omede ki loke kun waco ni,

2“Yubu, onongo itamo ni lok ma ilokoni tye atir?

Ma iwaco ni i peke ki bal mo inyim Lubanga.

3Ka ipenyo Lubanga ni, ‘Kony ango ma dong anongo?

Gin ango maber ma abinongo ka pe atimo bal?’

4Abigamo loki kit man,

in kacel ki luremi.

5Nen polo ci ingii,

nen pol ma gitye lamal makato in. 61

Ka ibalo, meno pe timo gin mo ikom Lubanga.

Kadi ka inyayo bal mapol, ci itamoni bitimo gin ango ikom Lubanga?

7Ka timi tye atir, nongo imiyo gin ango bote?

Onyo gin ango ma en gamo ki i cingi?

8Timi marac gudu dano marom ki in,

timi ma atir bene itimo bot dano.

9Dano gikok pi aroma mapol ma kiunugi kwede,

gikok pi kony wek kilargi ki itwero pa jo mategu ma unugi.

10Ento pe tye ngat mo ma penyo ni,

‘Lubanga ma ocweya tye kwene,

en ngat mamiyo dano wero wer me pake wa i dyewor,

11en ngat ma pwonyowa makato lee ma iwi lobo,

ci miyo wabedo ryek makato winyo me polo?’

12Gikok bote ki kunu, ento en pe gamo doggi,

pi wake pa jo maracu.

13Adada, Lubanga pe winyo koko ma tere peke,

dok bene Won Twer Ducu pe keto iye cwinye.

14In Yubu dong loki bibedo ningning, in ngat ma iwaco ni pe ineno Lubanga,

dok ni ibibedo kakure mot

pien dong kopi tye inyime me angola!

15Dok in itamo ni ka kiniga omake pe keto can ikom dano,

dok ni pe paro tutwal pi tim aranyi.

16Pimeno konye peke in Yubu, me bedo kalok;

man nyutu ni pe itye kangeyo gin ma iloko.”