Yubu 34

Eliu omede ki loke

1Eliu omede ki lok kun waco ni,

2“Wuwiny loka, wun luryeko,

wucik itwu ka aloko, wun jo matye ki ngec. 31

Dano bilo dek mamit ki lebe,

ento yero lok mamit ki ite.

4Wek wayer gin matye atir,

wek waniang ikinwa kekenwa lok mene matye kakare.

5Pien Yubu owaco ni, ‘An apeke ki bal mo,

dok Lubanga okwero ngola kop atir.

6Kadi bed loka tye atir, pud kiwaco ni an lagoba;

ret ma kiketo ikoma pe twero cang, kadi bed pe abalo bal mo.’

7Tika tye dano mo macalo Yubu?

Ma yeto dano yot bote calo mato pii.

8En omako lurem ki lutim aranyi,

dok woto kacel ki jo maracu.

9Pien en owaco ni, ‘Konye peke bot dano mo

me tiyo gin ma yomo cwiny Lubanga.’

10Pimeno wuwiny loka, wun jo matye ki niang matut,

Lubanga pe twero timo gin marac kadi ki acel.

Won Twer Ducu pe timo gin mo ma pe tye atir. 112

Pien en culu dano marom ki kit gin ma en otimo,

en timo dano acel acel ma oporo kit kwone.

12Ada, Lubanga pe timo gin mo marac,

Won Twer Ducu pe ngolo kop alenga.

13Anga mayam omiyo twero ki Lubanga?

Anga ma ceng oketo lobo ducu ni Lubanga oloo?

14Ka Lubanga odwoko yamone me kwo ducu bote,

ma oguru yweyone ducu bote kene,

15man onongo miyo gin makwo ducu to woko lawangacel,

ci dano dok gire i apwa.

16Ka itye ki niang matut, ci winy loka,

ci cik iti iloka ma awaconi.

17Itamoni ngat ma dag ngolo kop atir twero bedo laloc?

Dok itamoni ngat ma kite atir, ma en aye won twero bene, iwaco ni kite rac?

18Lubanga ngolo kop bot rwot ni, ‘In konyi peke,’

dok waco bot laker ni, ‘In idano marac.’

19Lubanga pe dworo kor luker,

pe paro pi lulonyo makato pi lucan,

pien gin ducu en ma ocweyogi ki cinge.

20I dakika acel keken gito woko i cwiny dyewor,

Lubanga goyowa ci wa to woko,

dok neko dano matek labongo lageng mo.

21En ciko wange pi neno gin ma dano tiyo,

ci neno kama en cito iye ducu.

22Pe tye mutu mo nyo piny ma ocido licuc

ma lutim maracu gitwero kane iye.

23Lubanga pe omoko kare ki dano mo

me cito inyime wek engol kop ikome.

24En turu dit pa wegi twer labongo yenyo telokgi,

ci keto jo mukene iwi komgi.

25Pien Lubanga ngeyo ticgi con,

retogi piny i dyewor ci tyekogi woko.

26En pwodogi pi rac kitgi

ki inyim lwak,

27pien onongo gubare woko ki kalubu kore,

pe dong guketo cwinygi katimo kit ma Lubanga mito.

28Kitgi omiyo koko pa lucan oo wa bot Lubanga,

ci en owinyo koko pa jo ma kiunugi.

29Ka Lubanga obedo mot, anga ma waco ni en otimo bal?

Ka okano wange woko, anga matwero nene,

kadi rok mo onyo kadi dano mo?

30En gengo dano ma pe gilworo Lubanga me bedo luloc,

wek pe gubed macalo owic ki bot lwak.

31Yubu in mono dong ityeko tucu bali bot Lubanga kun iwaco ni,

‘Apoto i bal, ento pe dok abitimo gin marac,

32nyuta bala,

ka yam abalo, pe dok abinwoyo timo aye’?

33In itamoni myero Lubanga otimi gin ma in imito

in ngat ma idag gin ma Lubanga otimoni?

In myero iyer, ento pe an,

pimeno tit gin ma ingeyo.

34Jo maryek ma giniang lok

ka guwinyo loka gibiwaco bota ni,

35‘Yubu tye kalok labongo ngec mo,

loke ryeko peke iye matwal.’

36Cwinya onongo mito ni kono kong kitemo Yubu nio wa i agiki me tekone,

pien lagam ma mere obedo lagam pa jo maracu.

37Yubu lacere, pud mede ameda i bal,

dok dongo cinge ikinwu pi cayo Lubanga,

dok nyayo loke me cac.”