Yubu 33

Eliu ojuku Yubu

1Ento kombedi dong in Yubu, iwiny loka maber,

cik itii ikom lok ducu ma abiwaco.

2Nen, dong angamo doga,

leba dong ocako lok.

3Loka nyutu ni cwinya tye atir,

aloko gin ma angeyo ni tye atir.

4Cwiny pa Lubanga aye ma ocweya,

ki yweyo pa Won Twer Ducu aye omiyo atye makwo.”

5Gam doga, kace itwero,

can loki ducu kikore inyima;

nong kom lok ma icung iye.

6Nen, arom kwedi inyim Lubanga;

an bene kicweya ki lobo.

7Pe myero ibed ki lworo pi neno an,

loka pe binuri ma okato kakare.

8Adada, ityeko loko lok kun awinyo,

dong awinyo lok ma iwaco.

9Ceng iwaco ni, “An aleng, bal mo peke ikoma;

cwinya leng, dok pe atimo gin mo marac.”

10Ento Lubanga tye kayenyo lok ikoma,

en tima macalo lakwore. 111

En otweyo tyena ki nyor,

en ngiyo kama acito iye ducu.

12Ento Yubu, pien iloko kitmeno in dong i poto i bal.

Ma omiyo an agamo kumeno, Lubanga aye dit makato dano.

13Pingo imito pyem kwede kun iwaco ni,

“Pe ogamo lwak lokani wa ki acel”?

14Lubanga loko i yo mapatpat,

ento dano pe niang i loke. 152

Lubanga loko iwang lek, i ginanyuta me dyewor, ka dano onino matek,

kun nino oyutu wanggi ki i kabutugi.

16Meno aye kare ma en loko kwede ki i it dano,

ci ryango komgi ki lok me jukugi,

17wek emii danonu oloke, owek timo tice marac,

dok wek ekwany wake woko ki i cwiny danonu.

18Kumeno en gwoko dano wek pe oto,

en gwoko kwone, wek pe ongol kulu me to.

19Lubanga pwodo dano bene ki arem i kabutune,

kun miyo kome rem kare ducu,

20mamiyo cwinye dag cam,

iye kwero wa cam mamit woko.

21Kome mok ma ringo kome pe dong nen,

cogone mayam pe nen kamaleng cako nen.

22Nongo en dong cok cito piny i bur lyel,

kwone dong cok poto i cing lunek dano.

23Gwok onyo ka lamalaika mo tye ma cung pire,

ma ngat acel ikin lumalaika alip ki alip, ma kubu kin Lubanga ki dano,

ma nyutu bot dano gin ma myero otim,

24ci lamalaika twero time kica kun waco bot Lubanga ni,

“Weke, wek en pe ocit piny i bur,

pien dong anongo gin lakok kwone.

25Wek ringo kome oroc, odok nyen macalo pa latin,

wek tekone odwog macalo ikare me awobine.”

26Ka man otime, ci dano man bilego Lubanga, ci Lubanga bigamo legane,

ci dano meno bicako bino inyim Lubanga ki yom cwiny,

ci Lubanga bicule pi kite ma atir.

27En biwer inyim lwak kun waco ni,

“Nene abalo, angak woko aweko timo gin matye atir,

ento Lubanga pe opwoda marom ki tim ma atimo.

28En okoka, pe dong abicito piny ikin jo ma oto,

pud abibedo kwo ma aneno ceng.”

29Nen, Lubanga tiyo meno ducu bot dano,

en tiyo meno kare ki kare

30pi laro en ki i to,

wek en obed ki yomcwiny me bedo kwo.

31Cik iti, in Yubu, wek iwiny loka;

ling mot, wek an aloki.

32Ka itye ki lok mo me awaca, gam doga;

loki, pien cwinya bibedo yom kace onen ni loki tye atir.

33Ento ka pe, winy loka;

ling mot, ci abipwonyi ki ryeko.